08:12 17 մայիսի, 2012Պրոֆեսիոնալ բռնցքամարտի աշխարհի բազմակի չեմպիոն Վախթանգ Դարչինյանը վերջին երկու մենամարտերում բռնցքամարտիկը երկու պարտություն կրեց: Անսելմո Մորենոյի հետ մենամարտը բազմաթիվ անգամ քննարկվել է, իսկ ահա Շինսուկե Յամանակայի հետ Վիկի անցկացրած վերջին մենամարտից հետո լռություն էր տիրում:
NEWS.am Sport-ի թղթակիցը զրուցել է այժմ Երեւանում գտնվող Վիկ Դարչինյանի հետ:
Վախթանգ, մենք, ինչպես եւ հայ մարզասերները, դիտել ենք Շինսուկե Յամանակայի մենամարտը, որում մրցավարները միաձայն որոշմամաբ հաղթանակը շնորհեցին մրցակցիդ: Ի՞նչ կասես այդ մենամարտի մասին:
Ասեմ, որ մենամարտին ես շատ լավ պատրաստվել էի: Կարծում եմ` նկատել եք, որ ամբողջ մենամարտի ընթացքում ճապոնացին խուսափում էր առճակատումից ու անըդհատ «փախչում» էր: Նա շատ լավ գիտեր, որ ուժեղ հարված կարող է ստանալ ու պարտվել: Բացի այդ, Շինսուկեն գիտեր նաեւ, որ եթե ռաունդների հաշվարկով հավասար արդյունք գրանցվի, հաղթանակը իրեն են տալու, դրա համար էլ պարզապես խուսափում էր նոկաուտի հասցնող իմ հարվածից: Ամեն դեպքում, մենամարտի ընթացքում կոպիտ սխալ թույլ տրվեց ժյուրիի ու մրցավարների կողմից:
Ի՞նչ սխալի մասին է խոսքը:
Ինչպես հիշում եք, հինգերորդ ռաունդում ես հոնքի բացվածք ստացա: Դա ոչ թե ձեռքի հարվածի հետեւանք էր, այլ ձեռքի արմունկի հարվածի հետեւանք: Իհարկե, վնասվածքը փոխեց մարտի ընթացքը: Ես արդեն ստիպված էի մտածել եւ վնասվածքի, եւ մարտավարության փոփոխման մասին: WBC վարկածի կանոնակարգի համաձայն, բռնցքամարտիկներից մեկի խորը վնասվածքի դեպքում մենամարտը պետք է ընդհատվի ու հաշվի առնվի, թե այդ պահին մարզիկները ինչ արդյունք ունեն: Նախ, պետք է ուսումնասիրեին անմիջապես տեսաերիզով վնասվածքի պատճառը ու արմունկով հարվածի համար ճապոնացուն նկատողություն անեին, հետո ընդհատեին մենամարտն ու հաշվեին միավորները: Սակայն այդպես չարվեց, ու մենամարտը շարունակվեց:
Փաստորեն հնարավո՞ր է, որ դու հաղթում էիր այդ պահին:
Ես չեմ ուզում ասել, որ ես հաղթել եմ, բայց իմ հաղթանակը խլել են ձեռքիցս: Սակայն կանոնակարգի կոպիտ խախտում տեղի ունեցավ: Եթե ուսումնասիրեին այդ դրվագը, պարզապես կտեսնեին, որ արմուկով հարված եմ ստանում դեմքիս: Նույնիսկ ռինգի կողքին, մենամարտի ընթացքում իմ թիմի անդամները փորձում էին հրավիրել ժյուրիի ուշադրությունը այդ դրվագի վրա: Պարզապես այդ պահերը դուրս են մնացել հեռուստաեթերից:
Լավ, այդ դեպքում ի՞նչ որոշումներ կարող են ընդունվել:
Մենք բողոքարկել ենք ժյուրիի եւ մրցավարների որոշումը եւ ունենք փաստացի տեսաերիզը, որի վրա պարզ երեւում է, որ Յամանական հարվածում է արմունկով: Սպասում ենք պատասխանին: Ասեմ, որ պատասխանը ուշանում է, քանի որ մենամարտից առավելագույնը երեք-չորս շաբաթ անց բողոքարկման պատասխանը պետք է ստանայինք:
Իսկ ի՞նչ պատասխան կարող է լինել:
Մրցակցի եւ ժյուրիի խախտումը հաստատվելու դեպքում պետք է ռեւանշ մենամարտ անցկացվի չեզոք մրցավայրում, ասենք ԱՄՆ-ում: Բայց Յամանական արդեն հայտարարել է, որ ռեւանշ մենամարտ չի անցկացնի ինձ հետ: Սա եւս մեկ անգամ վկայում է այն մասին, որ նա շատ լավ հասկանում է, որ ես շատ ուժեղ եմ եւ լավ մարզավիճակում: Նման դեքպում ինձ ամենայն հավանականությամբ հնարավորություն կտան կամ մեկ քաշային կարգ ավելի ծանր կամ ավելի թեթեւ, մենամարտ անցկացնել չեմպիոնական գոտիի համար:
Սա արդեն երկրորդ անգամն է, որ դու մենամարտում ես մրցակցի հարկի տակ ու վիճարկելի որոշում են կայացնում: Ի նկատի ունեմ Զեդ Գորեսի մենամարտը Ֆիլիպիններում:
Դե շատ դժվար է, երբ մենամարտում ես մրցակցի հարկի տակ: Մրցավարների հավասար պայմաններում, նույնիսկ փոքր առավելության դեպքում հաղթանակ կարող են շնորհել տեղացի բռնցքամարտիկին: Բայց ես պատրաստ եմ մենամարտել բոլորի հետ, որտեղ էլ որ պատահի: Հակառակ դեպքում, ինձ հետ ուղղակի չեն ուզում մենամարտել:
Վիկ, դու հիմա ընտանիքիդ հետ Երեւանում ես հանգստանալո՞ւ նպատակով:
Այո, հիմա հանգստանալու համար եմ եկել հայրենիք, եւ ընտանիքս էլ իմ կողքին է:
Երբեմն տեղեկություններ են հնչում, որ դու կարող է ավարտես ակտիվ մարզիկի կարիերադ:
Նման բան չկա: Ես դեռ շարունակելու եմ մարզվել, քանի որ շատ լավ եմ ինձ զգում ֆիզիկապես ու բացի այդ էլ դեռ նոր հաղթանակների եմ հասնելու ու ուրախացնելու իմ երկրպագուներին: Պարզապես հիմա չեմ կարող ասել, թե երբ եւ որտեղ դա տեղի կունենա:
Զրուցեց Խաչիկ Չախոյանը
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.