Ֆուտբոլի Բրազիլիայի հավաքականի գլխավոր մարզիչ Լուիս Ֆելիպե Սկոլարին աշխարհի առաջնության կիսաեզրափակիչում Գերմանիայի հավաքականից 1:7 հաշվով պարտություն կրելուց հետո հայտարարել է, որ Նեյմարը եւս ոչինչ չէր փոխի այդ խաղում, քանի որ Բրազիլիայի խնդիրները հարձակման գծում չեն, փոխանցում է itar-tass-ը Բրազիլայից:
«Սա ահավոր պարտություն է, աղետ է: Ամեն ինչ որոշվեց, երբ չորս րոպեում երեք գնդակ բաց թողեցինք: Առաջին գոլից հետո մեր թիմը կորցրեց վերահսկողությունը, իսկ հետո իրադարձություններն այնքան արագ զարգացան, որ արդեն ոչինչ հնարավոր չէր անել: Արդյունքի համար միշտ պատասխանատու է մարզիչը, սակայն մենք կշարունակենք մարզվել, քանի որ դեռ պետք է խաղանք երրորդ տեղի համար:
Ցանկանում եմ նշել, որ մենք ունենք շատ երիտասարդ թիմ: 14-15 ֆուտբոլիստներ այս կազմից կարող են հանդես գալ հաջորդ առաջնությունում: Պարտությունը սարսափելի է, բայց մենք պետք է դասեր քաղենք: Կյանքը շարունակվում է: Մենք պետք է պատվով հաղթահարենք այս բարդ պահը:
Եթե նույնիսկ Նեյմարը մասնակցեր խաղին, ոչինչ չէր փոխվի: Նա հարձակվող է, իսկ մեր խնդիրները հարձակման գծում չէին: Մրցակցի մոտ ամեն ինչ ստացվում էր: Սա նրանց լավագույն հանդիպումն էր այս մրցաշարում»,- նշել է Սկոլարին:
Աշխարհի առաջնության երրորդ տեղի համար հանդիպումը տեղի կունենա հուլիսի 12-ին: Հուլիսի 13-ին կայանալիք եզրափակիչում Գերմանիան կմրցի Հոլանդիա - Արգենտինա զույգի հաղթողի հետ:
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։