Ռալֆ Յիրիկյան. Հայաստանում բասկետբոլի զարգացման ձգտում ու ցանկություն չեմ տեսնում

Ես չեմ տեսնում ձգտում բասկետբոլի զարգացման համար: Ցանկությունը չեմ տեսնում Հայաստանում այս մարզաձեւի զարգացման համար: Նախաձեռնություններ չկան, այդ պատճառով ՎիվաՍել-ՄՏՍ-ը չի աջակցում հայկական բասկետբոլին:

Այս մասին այսօր հունիսի 5-ին լրագրողների հետ հանդիպման ժամանակ ասաց ՎիվաՍել ՄՏՍ-ի գլխավոր տնօրեն Ռալֆ Յիրիկյանը: Աշխարհահռչակ բասկետբոլիստ, Օլիմպիական չեմպիոն Շարունաս Մարչուլյոնիսը այս օրերին Հայաստանում է՝ «ՎիվաՍել-ՄՏՍ»-ի եւ «Մեդիամաքս» ընկերության նախաձեռնած «Մեծ Չեմպիոններ» ծրագրի շրջանակներում:

«Այն տարիների ընթացքում, ինչ ՎիվաՍելն աշխատում է հայաստանյան շուկայում, մշտապես աջակցել է սպորտին, սպորտային յուրաքանչյուր նախաձեռնությանը, աջակցել ենք առանձին մարզաձեւերին, այնպես ինչպես այժմ աջակցում ենք հայկական ֆուտբոլին: Այս ծրագիրը՝ «Մեծ չեմպիոններ», մեզ հետաքրքրեց այնքանով, որ կարող է ոգեշնչման լավ աղբյուր լինել հայ մանուկների եւ պատանիների համար, որոնք ցանկանում են նվաճել սպորտային բարձունքներ: Հուսամ, շփումը համաշխարհային ճանաչում ունեցող մարզիկների հետ մեծ դեր կունենա երեխաներից շատերի կյանքում: Հայաստանում բասկետբոլը զարգացում չունի, քանի որ այդ մարզաձեւի զարգացման համար ջատագովներ չեմ տեսնում: Մեր ընկերությունը չի աջակցում հայկական բասկետբոլին այն պատճառով, որ այս մարզաձեւը զարգացնելու համար ձգտողներ չկան, նախաձեռնություններ չկան: Մենք աջակցեցին «Հատիս» բասկետբոլի կանանց թիմին, եղան հաջողություններ, բայց այդքանով նախաձեռնությունները սահմանափակվեցին: Մենք աջակցում ենք հայկական ֆուտբոլին, քանի որ տեսնում ենք, որ մարդիկ ուզում են զարգացնել ֆուտբոլը, ձգտումը կա, իսկ բասկետբոլում չկան»,- ասաց Ռալֆ Յիրիկյանը:

Լուսինե Շահբազյան