Արթուր Աբրահամ. Ներքին Չարբախը դարձնելու եմ մշակութային կենտրոն

Ես իմ Երեւանը, մասնավորապես իմ ծննդավայրը` Ներքին Չարբախը շատ եմ սիրում, որոշել եմ Ներքին Չարբախը դարձնել մշակութային կենտրոն։ Այդ մասին այսօր` մայիսի 10-ին ԵՊՀ  ուսանողների հետ հանդիպման ժամանակ ասաց պրոֆեսիոնալ բռնցքամարտի աշխարհի նախկին չեմպիոն 32-ամյա Արթուր Աբրահամը:

«Ես ապրում եմ Հայաստանում, աշխատում Գերմանիայում: Երկու տեղն էլ շատ սիրում եմ: Բայց ստիպված եմ Գերմանիան չլքել, քանի որ թե սպորտային, թե բիզնեսի աշխատանքն այնտեղ է: Իմ հայրենիքը Հայաստանն է, իմ ծնողները, պապական տունը այստեղ են եւ չեմ կարող այստեղից էլ երբեք կտրվել: Մասնավորապես շատ եմ սիրում իմ Չարբախը: Կարծում եմ՝ յուրաքանչյուր ոք սիրում է իր բակի ամեն մի քարը, թուփը: Չես կարող դա չսիրել: Որոշել եմ Ներքին Չարբախը դարձնել մշակութային կենտրոն: Այնտեղ կբացվի մշակութային կենտրոն, որտեղ երեխաները հնարավորություն կունենան սովորել լեզուներ` անգլերեն, ռուսերեն, գերմաներեն: Կլինի մեծ մարզադահլիճ, որտեղ չարբախցիները կմարզվեն: Իսկ մշակույթի կենտրոնին կից կլինի նաեւ մեծ զբոսայգի` «Հաղթանակ» այգու պես, որպեսզի երեկոները չարբախցիները զբոսնեն, հանգստանան»,- ասաց Արթուր Աբրահամը:

Հայ բռնցքամարտիկը WBO վարկածով երկրորդ միջին քաշային կարգում աշխարհի գործող չեմպիոն 30-ամյա Ռոբերտ Շտիգլիցի պարտադիր մրցակիցն է: Մենամարտը կկայանա օգոստոսի 25-ին։

«Մի քանի օրից կսկսեմ պատրաստվել այդ մենամարտին: Դեռեւս մրցավայրը պարզ չէ` կամ Բեռլին, կամ Համբուրգ: Իմ հակառակորդը արդեն չորս տարի է WBO վարկածով աշխարհի չեմպիոն է: Դա շատ կարեւոր հանդիպում է լինելու ինձ համար, այդ իսկ պատճառով շուտ պետք է սկսեմ մարզումներս»:

Սիրո՞ւմ է գիրք կարդալ Արթուր Աբրահամը։

«Սիրում եմ կարդալ, բայց ժամանակ չի լինում: Վերջին գիրքը, որ կարդացի, դա մասնագիտական էր` մարզչիս հեղինակած գիրքն էր: Կոչվում է`«Կյանքիս 13 ռաունդները»»: Այն սպորտի, իր սաների եւ նրա մասին է: Շատ բաներ իմացա իմ մարզչի մասին, նույնիսկ այնպիսի բաներ, որ մինչեւ օրս չէի իմացել»,- պատասխանեց հյուրը:

Աբրահամը որոշեց նաեւ ինքը հարց ուղղել, թե ո՞ր ուսումնական առարկան են ուսանողներն ամենաշատը սիրում: Ուսանողները հարցին հարցով պատասխանեցին` իսկ դուք ո՞րը չեք սիրել: Երկար մտածելուց հետո բռնցքամարտիկն ասաց.

«Քիմիան չեմ սիրել, բայց լավ սովորել եմ: Ընդհանրապես, ես շատ լավ եմ սովորել: Դպրոցում գերազանցիկ եմ եղել»:

Թե որն է սպորտի բնագավառում հաջողություններ հասնելու գրավականը, ԵՊՀ ուսանողների հյուրը նշեց.

«Ամենակարեւորը մարդու ներքին զգացողությունն է, հոգեբանական պատրաստականությունը: Դու կարող ես  ֆիզիկապես շատ ուժեղ լինել, բայց հոգեպես ոչ: Իսկ եթե հոգեպես ուժեղ չլինես, չես կարող հաղթել: Հաջողության գրավականը աշխատասիրությունն է: Հաջողության համար պետք է լինես չընկճվող, կարգապահ, դժվարություններ հաղթահարող»:

Բռնցքամարտիկ չդառնալու դեպքում Աբրահամն ամենայն հավանականությամն սպորտում չէր լինի. «Մինչեւ բռնցքամարտով զբաղվելը, եղել եմ հեծանվորդ: Զբաղվել եմ հեծանվասպորտով Կրկեսի հարեւանությամբ հեծանվադպրոցում: Եղել եմ հեծանվասպորտի Հայաստանի բազմակի չեմպիոն: Բայց չեմ կարծում, որ կշարունակեի այդ մարզաձեով կարիերաս: Եթե բռնցքամարտով չզբաղվեի, գուցե սպորտում չլինեի կամ էլ ֆուտբոլիստ կդառնայի»:

NEWS.am Sport-ի թղթակցի հարցին, թե ով կամ ինչն է ոգեշնչում աշխարհի նախկին չեմպիոնին, Ա. Աբրահամը պատասխանեց.

«Ինձ ոգեշնչում է իմ մարզիչը: Կան շատ մարզիկներ, որոնց հետ հոգեբաններ են աշխատում, փորձում են հոգեբանության վրա ազդել: Ինձ շատ անգամ են առաջարկել հոգեբանի ծառայություն, որ նա կարողանա ինձ ոգեշնչել, բայց ես հրաժարվել եմ: Ինձ թվում է` դրա կարիքը չկա: Ամենակարեւորն այն է, որ ինձ ոգեշնչողը ես ինքս եմ: Իրականում սնահավատ չեմ, բայց ունեմ թալիսման, որը եւս ինձ ոգեշնչող առարկաներից է: Ունեմ մի խաչ, որն ինձ նվիրել է մեր կաթողիկոսը: Այն միշտ ինձ մոտ է մենամարտերի ժամանակ: Երբեմն մենամարտերի ժամանակ կրում եմ, իսկ եթե ոչ՝ այն պարտադիր իմ մարզիչի գրպանում է: Իսկ իրականում իմ հաջողությունների համար շնորհակալ եմ առաջին հերթին իմ ծնողներին` ինձ լույս աշխարհ բերելու համար: Շնորհակալ եմ նաեւ իմ առաջին մենեջերին եւ ամբողջ իմ մարզչական թիմին: Նրանք բոլորը միասին մոտ 20 հոգի են։ Երիտասարդ տարիներին բռնցքամարտում իմ կուռք ինձ համարել եմ Մայք Թայսոնին: Իսկ հիմա կուռք չունեմ»:

ԵՊՀ ուսանողուհիները չշրջանցեցին նաեւ բռնցքամարտում աղջիկների մասին հարցը:

«Դեմ չեմ որ աղջիկները զբաղվում են բռնցքամարտով: Բայց այդքան էլ գեղեցիկ չէ: Աղջիկների համար ավելի գեղեցիկ մարզաձեւեր կան, օրինակ՝ թենիս: Պատկերացրեք՝ տղամարդը կին ունի եւ ամեն օր նրա կինը աշխատանքից տուն է գալիս աչքի տակ կապտած»,-ասաց Արթուր Աբրահամը:

Պատրաստեց Լուսինե Շահբազյանը