Daily Mirror. Հեյ - Չիսորա մենամարտը կոյուղային կդարձնի բռնցքամարտը

18:52   7 մայիսի, 2012

Daily Mirror-ի սյունակագիր Դեւիդ Անդերսոնը ներկայացրել է իր դիտարկումները Դեւիդ Հեյ – Դերեկ Չիսորա հնարավոր մենամարտի վերաբերյալ եւ եզրակացրել, որ դա կլինի բռնցքամարտի խայտառակությունը:

«Դեւիդ Հեյի եւ Դերեկ Չիսորայի ծեծկռտուքը բավարար խայտառակություն չէր բռնցքամարտի համար, եւ այժմ նրանք որոշել են գումար վաստակել դրա շնորհիվ եւ դուրս գալ ռինգ:

Չիսորայի պրոմոուտեր Ֆրենկ Ուորրենը կհայտարարի, որ Մյունխենում սկսած ծեծկռտուքը բռնցքամարտիկները կավարտեն հուլիսի 14-ին: Այս երկուսը ցինիկաբար ցանկանում են գումար վաստակել իրենց խայտառակ վարքի շնորհիվ:

Առավել ցավալի է, որ նրանք փորձելու են շրջանցել Չիսորայի որակազրկումը` թույլտվություն ստանալով Լյուքսեմբուրգի նոր ձեւավորված Բռնցքամարտի կոմիտեից: Եթե այդ կոմիտեն թույլ տա մենամարտի անցկացումը, ապա Չիսորային որակազրկած Բռնցքամարտի վերահսկողության բրիտանական խորհուրդը անզոր կլինի որեւէ բան անել:

Առանց այդ էլ բռցքամարտի երկրպագուները երես են թեքում մարզաձեւից, քանի որ ուժեղագույնները հաճախ են հրաժարվում մենամարտել իրար հետ:

Չիսորայի եւ Հեյի ծեծկռտուքը բռնցքամարտի քննադատներին մեկ անգամ եւս ստիպեց պնդել, որ բռնցքամարտը սրիկաների մարզաձեւ է: Եթե Հեյ – Չիսորա մենամարտը տեղի ունենա, ապա այն էլ ավելի կոյուղային կդարձնի բռնցքամարտը:

Գրոշի գին չունի Բրիտանական խորհրդի պատիժը, եթե որակազրկված բռնցքամարտիկը կարող է մենամարտել այլ երկրի հովանու ներքո:

Երբ անցած հոկտեմբերին Հեյը հայտարարեց 30 տարեկանում բռնցքամարտից հեռանալու մասին` ես ծափահարեցի նրա այդ որոշմանը, քանի որ նա խոստացել էր: Երբ նա հայտարարեց, որ կվերադառնա ռինգ միայն Վիտալի Կլիչկոյի հետ մենամարտելու համար, քանի որ անավարտ գործ ունի ուկրաինացի եղբայրների հետ` ես դա համարեցի բավական ազնիվ:

Սակայն Կլիչկոների հետ պատվի եւ վրեժխնդրության մասին բոլոր խոսակցությունները կարժեզրկվեն, եթե Հեյը մենամարտի Չիսորայի հետ: Նրա միակ մոտիվացիան կլինի ինչքան հնարավոր է շատ գումար կորզելը: Պարզաբանենք. Չիսորան երբեք չի եղել Հեյի ծրագրերում, մինչեւ Մյունխենի ծեծկռտուքը: Նրա միակ նպատակը Կլիչկո եղբայրներն էին

Նշանակություն չունի, թե ինչով է ցանկանում քողարկել այդ խայտառակությունը պրոմոուտեր Ուորենը: Այդ մենամարտը միայն պարգեւ կլինի սրիկաների համար: Սպորտում այսպիսի երեւույթը տեղ չունի»:



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.