Արթուր Գեւորգյան. Իմ սիրտը հավասար է ցավում հավաքականի բոլոր մարզիկների համար

Իմ սիրտը հավասար է ցավում հավաքականի բոլոր մարզիկների համար: Եթե ձեզ թվում է, որ ձեր սիրտը ավելի շատ է ցավում որեւէ բռնցքամարտիկի համար, քան իմը՝ սխալվում եք: Ամենաշատը ես եմ ուզում, որ մեր տղաները մեդալներով վերադառնան աշխարհի, Եվրոպայի առաջնություններից:

Այդ մասին մարտի 28-ին կայացած Հայաստանի բռնցքամարտի ֆեդերացիայի նիստի ժամանակ հայտարարեց Հայաստանի բռնցքամարտի ֆեդերացիայի նախագահ Արթուր Գեւորգյանը:

 «Եթե ես փողոցում տեսնեմ լավ բռնցքամարտիկի, հավատացեք, ձեռքից կբռնեմ կբերեմ հավաքական, որպեսզի տեսնեմ նրան եւ նրա կարողությունները:

Իմ սիրտը հավասար է ցավում հավաքականի բոլոր մարզիկների համար, եթե ձեզ թվում է, որ ձեր սիրտը ավելի է ցավում որեւէ բռնցքամարտիկի համար, սխալվում եք: Ամենաշատը ես եմ ուզում, որ մեր տղաները մեդալներով վերադառնան աշխարհի, Եվրոպայի առաջնություններից:

Սա գեղեցկության մրցույթ չի, որ նայենք ասենք լավն է՝ անցի առաջ: Սա բռնցքամարտ է, որտեղ պետք է տեսնենք մարզիկի կամային որակները:

Մի խնդրանք, հորդոր անձնական մարզիչներին՝ երբ հավաքականի գլխավոր մարզիչը մարզում է անցկացնում, մի միջամտեք, մի փիլիսոփայեք: Կլինեն ազատ օրեր, երբ հավաքականի մարզիչը թույլ կտա, եկեք ձեր սաներին հոգեբանորեն սատարեք, խոսեք, բայց մի խանգարեք: Նոր հեծանիվ չենք հորինում: Այս գոծի մեջ կերպարը բռնցքամարտիկն է: Ո՛չ ես եմ, ո՛չ դուք: Թող ճանաչելի դառնան բոլորը:   

Հաջողություն մաղթենք մեր երիտասարդ բռնցքամարտիկներին, նրանք նախապատրաստական վերջին  փուլն են անցնում: Բոլորը հավասար տղաներ են, նոր տղաներ են, չկա վառ արտահայտված մեկը, ում նայելով կարող ենք ասել , որ նա պոտենցիալ չեմպիոն է»,- ասաց Գեւորգյանը:

Նիստի ժամանակ ամփոփվեցին Հայաստանի  ավարտված առաջնությունները: Մարզիչները ֆեդերացիայի նախագահին հայտնեցին իրենց առարկությունները, խոսեցին խնդիրների եւ հետագա անելիքների մասին:

Շուշանիկ Հակոբյան