Ես երբեք չեմ թերագնահատում իմ մրցակիցներին, այդ թվում եւ Ռոբերտ Շտիգլիցին: Եթե նա աշխարհի չեմպիոն է, ուրեմն ուժեղ բռնցքամարտիկ է, բայց ես եմ հաղթելու: Լավ կլինի, որ նոկաուտ անեմ, բայց կարեւորը հաղթանակն է: Ամեն ինչ անելու եմ աշխարհի չեմպիոնի տիտղոսը վերանվաճելու համար:
Այս մասին NEWS.am Sport-ի թղթակցի հետ զրույցում ասաց պրոֆեսիոնալ բռնցքամարտի սուպերմիջին քաշային կարգում WBO վարկածով աշխարհի նախկին չեմպիոն Արթուր Աբրահամը: Մարտի 1-ին տեղի կունենա Արթուր Աբրահամի եւ Ռոբերտ Շտիգլիցի երրորդ մենամարտը աշխարհի չեմպիոնի տիտղոսի համար:
Արթուր, արդեն մեկ օրից կկայանա այդքան սպասված մենամարտը: Ինչպե՞ս է տրամադրվածությունդ:
Ունեմ բարձր տրամադրություն, հաղթական տրամադրվածություն: Հիմա մտածում եմ միայն եւ միայն հաղթանակի մասին, ուրիշ ոչնչի:
Ի՞նչպես է անցել մարզումային փուլը:
Մարզումներս ծանր էին, 2013-ի դեկտեմբերի սկզբից գերծանրաբեռնված ռեժիմով մարզվել եմ Քինբաում քաղաքում, բայց չեմ դժգոհում, քանի որ այդ մարզումների շնորհիվ ես կարող եմ հասնել իմ մեծ նպատակին` հաղթանակին: Մարզիչս` Ուլլի Վեգները, ով սովորաբար դժգոհ է լինում իր մարզիկների մարզավիճակից, հիմա ասում է, որ գոհ է իմ մարզավիճակից:
Ի՞նչ գերխնդիր ես քո առջեւ դրել:
Հաղթել եւ վերանվաճել իմ չեմպիոնական տիտղոսը. ահա իմ գերխնդիրը: Իհարկե, շատ լավ կլինի, որ նոկաուտ անեմ, սակայն, ընդհանուր առմամբ, տարբերություն չեմ դնում միավորներով, թե նոկաուտով կհաղթեմ, կարեւորը հաղթանակն է:
Քո հարցարզույցներից մեկում նշել ես, որ պետք է անես ամեն ինչ՝ արդարացնելու քո հարազատների, երկրպագուների վստահությունը: Որքանո՞վ է քեզ գոտեպնդում այդ վստահությունը:
Շատ-շատ է գոտեպնդում: Բռնցքամարտի սիրահարների, երկրպագուներիս վստահությունն իրոք ինձ համար մեծ ուժ է: Միշտ զգում եմ նրանց քաջալերանքը` թե' ռինգում, թե' ցանկացած պահի: Բազմաթիվ ոգեւորող նամակներ եմ ստանում իմ կայքէջի եւ ֆեյսբուքյան էջի փոստարկղերին: Բոլորիդ շնորհակալ եմ, որ իմ կողքին եք եւ վստահում եք ինձ:
Ի՞նչ ես կարծում, աշխարհի չեմպիոնական տիտղոսը Ռոբերտ Շտիգլիցին տանուլ տալուց հետո, քո երկրպագուները կորցրե՞լ էին քո հանդեպ վստահությունը:
Կդժվարանամ հստակ պատասխանել: Հնարավոր է, որ որոշ մարդիկ կորցրել են իմ հանդեպ վստահությունը, բայց շատ-շատերն էլ հավատում են, որ ես նորից արդարացնելու եմ իրենց սպասելիքները: Բռնցքամարտ է, ամեն ինչ էլ կարող է պատահել: Մեր վերջին մենամարտի ժամանակ եթե Շտիգլիցի ձեռնոցի բթամատը չմտներ աչքս եւ աչքս չայտուցվեր, ամեն ինչ կարող էր այլ կերպ ավարտվել:
Արթուր, երեք անգամ նույն բռնցքամարտիկի հետ դուրս գալ ռինգ եւ երեքն էլ աշխարհի չեմպիոնական տիտղոսը նվաճելու համար: Հոգեբանորեն բա՞րդ չէ արդյոք պատրաստվել մենամարտին:
Գիտեք, ամեն ոլորտում էլ բարդություններ պատահում են: Սպորտը բացառություն չէ: Բայց դա չի կարող հետ պահել այն մտքից, որը քեզ ոգեւորում է դեպի հաղթանակ: Մարզումների ողջ ընթաքցում ինձ ոգեշնչել է հաղթելու միտքը, եւ դա այնքան ուժեղ է, որ ոչնչացնում է ճանապարհին հանդիպող ամեն բարդություն:
Դու արդեն երրորդ անգամ ես հանդիպում Շտիգլիցին ռինգում եւ արդեն, կարծում եմ, հասցրած կլինես ծանոթանալ նրա մարտավարությանը: Ի՞նչ մարտավարություն ես մշակել այս անգամ: Ինչի՞ վրա ես դնելու շեշտը ռինգում:
Այո, արդեն Շտիգլիցի հետ մենամարտելու լավ փորձ ունեմ, եւ մարզիչիս հետ մշակել ենք մարտավարություն, որի մասին նախապես չեմ ուզում բարձրաձայնել: Միայն կարող եմ ասել, որ ամեն ինչ անելու եմ հաղթելու համար:
Ինչպե՞ս կգնահատես Շտիգլիցի հնարավորությունները:
Ես երբեք չեմ թերագնահատում իմ մրցակիցներին, այդ թվում եւ Ռոբերտ Շտիգլիցին: Եթե նա աշխարհի չեմպիոն է, ուրեմն ուժեղ բռնցքամարտիկ է:
Իսկ քոնը:
Ես եմ հաղթելու:
Արթուր, ռինգից դուրս ի՞նչ հարաբերությունների մեջ եք դու եւ Շտիգլիցը:
Շատ նորմալ հարաբերությունների մեջ ենք` հարգանքով ենք վերաբերվում միմյանց:
Որպես մարդ, ինչպե՞ս կբնութագրես Շտիգլիցին: Եվ պրոֆեսիոնալ տեսանկյունից հնարավո՞ր է ռինգից դուրս մրցակից բռնցքամարտիկների միջեւ մտերիմ ընկերական հարաբերություններ:
Շտիգլիցի մարդկային որակներին շատ ծանոթ չեմ, ուստի կդժվարանամ բնութագրել նրան: Այլ բռնցքամարտիկների դեպքում` չգիտեմ ինչպես է, բայց ես մրցակիցներիս մեջ չեմ ունեցել եւ չունեմ մտերիմ ընկերներ: Ամեն դեպքում, մեծ աշխարհ է, ամեն ինչ էլ հնարավոր է, այդ թվում` ռինգից դուրս մրցակից բռնցքամարտիկների միջեւ մտերիմ ընկերական հարաբերություններ:
Արթուր, մի քանի օր առաջ նշեցիր ծննդյանդ 34-ամյակը, ինչի կապակցությամբ NEWS.am Sport-ը շնորհավորում է քեզ: 34-ը բավական լուրջ տարիք է պրոֆեսիոնալ ռինգում: Հնարավո՞ր է, որ այս մենամարտով ավարտես բռնցքամարտիկի կարիերադ, թե՞ դա կորոշես մենամարտից հետո:
Շնորհակալ եմ շնորհավորանքի համար: Դեռ վաղ է խոսել կարիերայիս ավարտի մասին, մինչեւ 2015 թվականը պաշտոնական պայմանագիր ունեմ գերմանական «Զաուերլանդ իվենթ» պրոմոութերական կազմակերպության հետ:
Արթուր, այս օրերին սպորտային կյանքն աշխարհում ուղղակի եռում է: Օրերս ավարտվեցին Սոչիի 22-րդ ձմեռային օլիմպիական խաղերը: Հասցրե՞լ ես հետեւել մեր օլիմպիականների ելույթներին:
Իհարկե, հետեւել եմ մեր օլիմպիականների ելույթներին:
Հենրիխ Մխիթարյանը շարունակում է հաջող ելույթները Գերմանիայում: Հանդիպեցի՞ր Հենրիխի հետ, թե՞ դեռ միայն հեռակա կարգով եք շփվում: Նրան հրավիրե՞լ ես քո մենամարտին:
Ես եւ Հենրիխ Մխիթարյանը միշտ կապի մեջ ենք, սակայն դեռ չենք հանդիպել, սպորտային կյանքը թույլ չի տալիս: Մարտի 1-ին նա չի կարող ներկա լինել իմ մենամարտին, քանի որ բավականին հեռու է` մոտ 800 կիլոմետր:
Վերջում, քեզ մաղթում ենք հաջողություն ռինգում եւ վստահ հաղթանակ: Շնորհակալություն:
Շատ շնորհակալ եմ Ձեզ, ձեր ընթերցողներին եւ իմ երկրպագուներին:
Լուսինե Շահբազյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։