Եվգենի Պլյուշչենկո. Ցանկանում եմ մասնակցել 2018-ի Օլիմպիական խաղերին

Ցանակնում եմ մնալ սպորտում եւ մասնակցել հաջորդ Օլիմպիական խաղերին, ասել է գեղասահքի կրկնակի օլիմպիական չեմպիոն Եվգենի Պլյուշչենկոն: 31-ամյա գեղասահորդը պատմել է Սոչիում ստացած վնասվածքի եւ 2018-ին հարավկորեական Պհենչհանում կայանալիք 23-րդ ձմեռային օլիմպիական խաղերին մասնակցելու ցանկության մասին:

«Այժմ ինձ համար բարդ շրջան է, սակայն մենք միասին կհաղթահարենք դա: Ինձ լիարժեք եմ զգում, կարող եմ քայլել եւ շարժվել: Արդեն առողջ եմ: 2 օրից ընտանիքիս հետ կմեկնեմ Իսրայել, որտեղ կանցնեմ բուժզննում: Մեկնում եմ բժշկիս մոտ: Կարծում եմ՝ ամեն ինչ լավ կլինի:

Ցանակնում եմ մնալ սպորտում եւ մասնակցել ինձ համար 5-րդ Օլիմպիական խաղերին: Դրա համար պատրաստ եմ նոր վիրահատությունների: Ցավեր զգացի թիմային մրցումների ժամանակ: Այդպիսի ցավով սահելը սարսափելի էր»,- Ռուսաստանի Առաջին ալիքի եթերում ասել է Պլյուշչենկոն:

Հիշեցնենք, որ Սոչիի 22-րդ ձմեռային օլիմպիական խաղերում Պլյուշչենկոն Ռուսաստանի հավաքականի կազմում դարձավ օլիմպիական չեմպիոն, սակայն այնուհետեւ մեջքի վնասվածքի պատճառով հրաժարվեց անհատական մրցաշարից՝ հայտարարելով կարիերան ավարտելու մասին։