Հայաստանի թիմի գլխավոր մարզիչ. Հրաչյա Ռոստոմյանն ինձ մեղադրում է մի բանում, ինչից ինքը չի հասկանում
02:19 15 փետրվարի, 2014ՀԱՕԿ գլխավոր քարտուղար Հրաչյա Ռոստոմյանն ինձ մեղադրում է մի բանում, ինչից ինքը չի հասկանում: Որ դահուկորդ լինեին, կհասկանային՝ ինչու ՀԱՕԿ-ի գնած նոր դահուկներով Կատյա Գալստյանին չեմ կանգնեցրել մեկնարկի: Բացատրում եմ, չեն հասկանում: Հիմա էլ ասում են՝ վերադառնում ենք Հայաստան: Ես մարզիչ եմ եւ լավ եմ հասկանում, որ իմ մարզիկը նոր դահուկներով չէր կարող հանդես գալ եւ ցույց տալ այն լավ արդյունքը, ինչ փետրվարի 13-ին ցույց տվեց Կատյան: Նա պետք է տասը օր գոնե կանգներ այդ դահուկների վրա: Իսկ մեզ երկու օր առաջ են տվել այդ դահուկները:
Սոչիում NEWS.am Sport-ի հատուկ թղթակից Լուսինե Շահբազյանի հետ զրույցում այսպես պարզաբանեց դահուկային սպորտի Հայաստանի ազգային հավաքականի գլխավոր մարզիչ Սլավիկ Սարգսյանը իր եւ ՀԱՕԿ գլխավոր քարտուղար Հրաչյա Ռոստոմյանի միջեւ ծագաց խնդիրը:
Սլավիկ Սարգսյանը հրաժարվել է դահուկորդ Կատյա Գալստյանին փետրվարի 13-ին մեկնարկի կանգնեցնել ՀԱՕԿ-ի գնած նոր դահուկներով:
«Խնդիրը մեծ է: Ես իմ գրպանից գումար եմ ծախսել, բայց դեռ մի հատ էլ ինձ են մեղադրում: Փետրվարի 10-ին ՀԱՕԿ-ն իմ մարզիկի՝ Կատյա Գալստյանի համար գնել էր նոր դահուկներ: Բայց ամսի 13-ին Կատյա Գալստյանը մեկնարկի է դուրս եկել իր հին դահուկներով: Ես իմ գրպանից 300 եվրո վճարել եմ եւ Կատյայի դահուկների համար գնել եմ քսուք, եւ այդ քսուկով յուղել եմ Կատյայի դահուկները, որպեսզի նա հանգիստ կարողանար իր հին դահուկներով մասնակցել Օլիմպիական խաղերին: Իսկ ՀԱՕԿ-ի դահուկները սենյակում դրված են: Վերջին օրով դահուկներ են առել եւ պահանջում են, որ երկու օրվա դահուկով իմ աղջիկը դուրս գա մրցուղի:
Մասնագիտական տեսանկյունից Կատյան ուղղակի չէր կարող նոր դահուկներով մրցուղի դուրս գալ: Նոր դահուկները պետք է մինիմում 10 օր քշվեն սառույցի վրա, որ ձեւավորվի, հարթվի դահուկի տախտակը եւ հնարավոր լինի դրանով սահել, արագություն հավաքել: Օլիմպիական կոմիտեն պետք է 10 օր առաջ գներ այդ դահուկները եւ ոչ թե վերջին օրով: Իսկ ես իմ մարզիկին չէի կարող ստիպել ռիսկի դիմել: Սա Օլիմպիական խաղերն են ու Կատյայի առաջին մասնակցությունը: Ես ամեն օր ՀԱՕԿ-ի ներկայացուցիչներին ասում էի՝ դահուկներ, դահուկներ: Իսկ մենք այստեղ ենք հունվարի 30-ից: Դահուկները գնել են փետրվարի 10-ին, թե 11-ին: Իսկ Կատյայի ելույթը ամսի 13-ին է: Հիմա բարկանում են: Սա մասնագիտական հարց է: Նոր դահուկը չի քշվում: Դրանք պետք է 10 օր բացել:
Կատյայի ելույթը ես կգնահատեմ բավարար: Նա արեց այն, ինչ խնդիր իր առջեւ դրված էր: 75 մասնակիցներից 64-րդը մեզ համար լավ է, քանի որ Կատյան վարկանիշ չուներ»,- նշեց Սլավիկ Սարգսյանը:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.