Հայաստանը՝ ձմեռային Օլիմպիական խաղերում. Լիլեհամերից՝ Սոչի

Փետրվարի 7-ին Սոչիում տեղի կունենա 22-րդ ձմեռային Օլիմպիական խաղերի բացման հանդիսավոր արարողությունը:

Ձմեռային առաջին Օլիմպիական խաղերը կայացել են 1924-ին Ֆրանսիայի Շամոնի քաղաքում: Մասնակցել են 16 երկրից 258 մարզիկ: Ընդգրկված է եղել 9 մարզաձեւ ՝ սահնակային սպորտ, քյորլինգ, չմշկավազք, դահուկային երկամարտ, դահուկավազք, դահուկացատկ, զինվորական բազմամարտ, գեղասահք եւ տափօղակով հոկեյ:

Հայաստանն առաջին անգամ ձմեռային Օլիմպիական խաղերին մասնակցելել է 1994-ին: Խաղերն անցկացվել են Նորվեգիայի Լիլեհամեր քաղաքում: Հայաստանը ներկայացել է երկու մարզիկով՝ Ժոզեֆ Ալմասյան եւ Քենեթ Թոփալյան (բոբսլեյ):

Ճապոնիայի Նագանո քաղաքում կայացած ձմեռային Օլիմպիական խաղերին (1998) Հայաստանը ներկայացել է 6 մարզիկով (4 մարզաձեւում). Ալլա Միքայելյան (դահուկավազք),Արսեն Հարությունյան (լեռնադահուկ), Արմեն Ռաֆայելյան (դահուկային ֆրիսթայլ), Ալեքսանդր Չեստնիխ (գեղասահք, զուգապար), Մարիա Կրասիլցեւա (գեղասահք, զուգապար), Քսենյա Սմետանենկո (գեղասահք, մենապար):

2002-ին Խաղերն անցկացվեցին ԱՄՆ-ի Սոլթ Լեյք Սիթիում: Հայաստանից մասնակցել է 9 մարզիկ, կրկին 4 մարզաձեւում. Արսեն Հարությունյան (լեռնադահուկ),Վանեսա Ռաքեջյան (լեռնադահուկ), Ալեքսանդրու Ջորջոս եւ Դանիել Ջանջիգյան (բոբսլեյ), Արամ Հաջիյան (դահուկավազք),Մարգարիտա Նիկոլյան (դահուկավազք), Քրիստինե Խաչատրյան (դահուկավազք),Արտյոմ Զնաչկով (գեղասահք, զուգապար), Մարիա Կրասիլցեւա (գեղասահք, զուգապար), Յուլյա Լեբեդեւա (գեղասահք, մենապար):

Իտալիայի Թուրին քաղաքում կայացած Խաղերին (2006) Հայաստանը ներկայացրել է 4 մարզիկ՝ 3 մարզաձեւում. Վազգեն Ազրոյան (գեղասահք),Աբրահամ Սարկախյան (լեռնադահուկ), Էդմոնդ Խաչատրյան (լեռնադահուկ),  Հովհաննես Սարգսյան (դահուկավազք):

2010թ. Վանկուվերի Խաղերին Հայաստանը ներկայացավ կրկին 4 մարզիկով, այս անգամ 2 մարզաձեւում. Արսեն Ներսիսյան (լեռնադահուկ), Անի-Մաթիլդա Սերեբրակյան (լեռնադահուկ), Սերգեյ Միքայելյան (դահուկավազք), Քրիստինե Խաչատրյան (դահուկավազք):

Սոչիի ձմեռային 22-րդ Օլիմպիական խաղերում Հայաստանը կներկայացնեն Սերգեյ Միքայելյանը (դահուկավազք), Կատյա Գալստյանը (դահուկավազք), Արթուր Եղոյանը (դահուկավազք) եւ լեռնադահուկորդ Արման Սերեբրակյանը: