Մովսիսյանի եւ Օզբիլիսի ազգությունը դեր չի խաղացել «Սպարտակ» տեղափոխվելիս. Ջեւան Չելոյանցի հարցարզրույցը NEWS.am Sport-ին (ֆոտո)

Մոսկվայի «Սպարտակի» բաժնետեր լինելը ո՛չ բիզնես է, ո՛չ էլ հրապուրանք: Դա սեր է կյանքի նկատմամբ, ֆուտբոլը կյանք է:

Այս մասին NEWS.am Sport-ի թղթակցի հետ զրույցում ասաց Մոսկվայի «Սպարտակի» բաժնետեր Ջեւան Չելոյանցը։ Նա Ռուսաստանի նավթային եւ գազային արդյունաբերության վաստակավոր գործիչ է, եղել է «Լուկօյլի» փոխնախագահ։

Պարոն Չելոյանց,  Դուք գրեթե երբեք հարցազրույց չեք տալիս: Շնորհակալություն այս հանդիպման համար: Ձեր մասին շատ քիչ բան է հայտնի: Որտեղի՞ց է արմատներով Ձեր ընտանիքը: Որքանո՞վ են սերտ Ձեր կապերը Հայաստանի հետ:

Ես ծնվել եմ Գրոզնիում: Նախնիներս Արեւմտյան Հայաստանից են: Մենք խարբերդցի ենք: Պապս ու տատս 1915-ին Ցեղասպանության ժամանակ փախել են Ռուսաստան: Առաջին անգամ եկա Հայաստան, երբ 10-11 տարեկան էի:

Հետեւու՞մ եք Հայաստանի իրավիճակին:

Ինձ դժվար է կողքից կարծիք կազմել Հայաստանի իրավիճակի մասին:

Ճի՞շտ է, որ Թուրքիայում տեղի ունեցած շախմատի Համաշխարհային օլիմպիադայից հետո Դուք Հայաստանի տղամարդկանց հավաքականի բոլոր մասնակիցներին դրամանական պարգեւ եք տվել:

Եթե ես ինչ-որ մեկին նվեր եմ տալիս, դա նրա համար չէ, որ այդ մասին խոսվի հարցազրույցում: Դրա համար եկեք այս հարցը բաց թողնենք:

Իսկ ճի՞շտ է, որ Դուք հովանավորում եք Ցեղասպանության թանգարանը:

Օգնում եմ:

Շատերը Յուրա Մովսիսյանի եւ Արաս Օզբիլիսի տեղափոխությունը «Սպարտակ» Ձեզ հետ են կապում: Նրանց ազգությունը այդ տեղափոխության հարցում որեւէ դեր խաղացե՞լ է: Կային նաեւ այլ թեկնածուներ:

Ազգությունը ոչ մի դեր չի խաղացել: Յուրան եւ Արասը ֆուտբոլիստներ են, որոնց պրոֆեսիոնալ մակարդակը համապատասխանում է «Սպարտակին»: Հենց դա է դեր խաղացել:

Ինչպե՞ս եք գնահատում նրանց ելույթները: Նրանք արդարացրի՞ն սպասելիքները:

Ըստ իս, Մովսիսյանն արդեն լիովին հարմարվել է թիմին ու հանդիսանում է թիմի հիմնական կազմի ֆուտբոլիստ: Պատահական չէ, որ նա «Սպորտ Էքսպրեսի» վարկածով Ռուսաստանի լավագույն ֆուտբոլիստն է: Արասը, իմ կարծիքով, դեռ լիովին չի հարմարվել, բայց Ռուսաստանում այդ դիրքում խաղացող ֆուտբոլիստների թվում լավագույններից մեկն է:

Հայաստանի հավաքականում կա՞ն այլ ֆուտբոլիստներ, ովքեր կարող են համալրել «Սպարտակի» կազմը:

Իհարկե, Մխիթարյանը:

Իսկ նրանի՞ց բացի։

Ես ինձ ֆուտբոլային առումով մեծ մասնագետ չեմ համարում: Ես մի ժամանակ զբաղվել եմ ֆուտբոլով, բայց դա վաղուց էր: Ակումբում մարդիկ կան, ովքեր զբաղվում են սելեկցիոն աշխատանքներով: Իմ գործը բաժնետիրությունն է, ոչ թե ֆուտբոլիստներին գնահատելը: Իմ գործը կազմակերպչական բնույթ ունի: Ես երբեք քիթս ուրիշի գործերի մեջ չեմ մտցնում: Ամեն ոք պետք է զբաղվի իր գործով:

Նախորդ ձմռանը խոսակցություններ կային, որ «Սպարտակը» մտադիր է ձեռք բերել նաեւ Մխիթարյանին: Նույնիսկ խոսում էին, որ նրան ակումբում ռեկորդային աշխատավարձ էին խոստացել:

Դա ճիշտ չէ: Մենք, ինչպես այլ ակումբներ, հետաքրքրվել ենք, բայց թվերի քննարկմանը գործը չի հասել: Մխիթարյանը շատ էր ցանկանում Եվրոպայում խաղալ: Մենք դա հասկանում էինք եւ մնում էր միայն հաջողություն մաղթել նրան:

Ո՞րն է Հայաստան այցելելու Ձեր նպատակը: Ակումբը Հայաստանում ձմեռային ուսումնամարզական հավաք անցկացնելու մտադրություն չունի՞:

Ես եկել եմ անձնական գործերով: Այլ հարցերը ինձ չեն վերաբերում: Գոյություն ունի թիմի մենեջմենթ, որն էլ որոշում է՝ որ երկրում անցկացնել հավաքները:

«Սպարտակի» բաժնետեր լինելը Ձեզ համար բիզնե՞ս է, թե՞ հրապուրանք:

Դա ո՛չ բիզնես է, ո՛չ էլ հրապուրանք: Դա սեր է կյանքի նկատմամբ: Ֆուտբոլը կյանք է:

Մի՞թե ռուսական ֆուտբոլում գումարներ ներդնելը եկամտաբեր չէ:

Նայած՝ ինչպես ենք մոտենում հարցին: Եթե սպասում ես նյութական փոխհատուցման, ապա՝ եկամտաբեր չի: Բայց կա նաեւ բարոյական բավարարվածության պահը:

Բազմաթիվ հայ ձեռներեցներ հայկական տարբեր ակումբներ են հովանավորում. օգնում են, որ Հայաստանի առաջնությունը գոյատեւի: Ձեզ մոտ երբեք ցանկություն չի առաջացե՞լ աշխատել հայկական ակումբներից որեւէ մեկի հետ:

Ես ամբողջ կյանքում միայն մեկ սեր ունեմ՝ «Սպարտակը»: Դա կախված է իմ հոր դաստիարակությունից: Նա պրոֆեսիոնալ ֆուտբոլիստ է եղել, խաղացել է Գրոզնիի «Նեֆտյանիկում»: Հայրս է ինձ ներարկել այս խաղի ու «Սպարտակի» նկատմամբ սերը:

Ինչպե՞ս եք գնահատում «Սպարտակի» ելույթները Պրեմյեր լիգայի ընթացիկ առաջնությունում:

Դեռ վաղ է արդյունքներ ամփոփել: Հուսով եմ, որ այս մրցաշրջանը նախկինից ավելի լավը կլինի:

Բայց մրցաշրջանը այդքան էլ լավ չսկսվեց: Թիմը անսպասելիորեն դուրս մնաց Եվրոպայի լիգայից: Մի՞թե այդ մրցաշարից դուրս մնալը նպաստեց ներքին առաջնությունում գրանցած լավ մեկնարկին:

Դե, մենք մինչ շվեյցարացիներից կրած պարտությունը, լավ էինք մեկնարկել: Երեւի այդ պարտությունը նպաստեց, որպեսզի առաջնության հետագա խաղերին թիմն ավելի լավ նախապատրաստվի: Ցավալի պարտություն էր, բայց դե ֆուտբոլ է:

Բազմաթիվ թիմերի հասցեին մեղադրանքներ են հնչում, որ նրանք մեկ տարում ցանկանում են հաղթել բոլոր երեք տիտղոսները, ուժերը սխալ են հաշվարկում եւ ձեռնունայն են մնում: Ոչ բոլոր թիմերն այդպիսի ներուժ ունեն: Նույն «Բորուսիային» այս մրցաշրջանում դրանում մեղադրում են: «Սպարտակը» կարո՞ղ էր միաժամանակ հաղթել թե՛ առաջնությունում, թե՛ Եվրոպայի լիգայում, թե՛ գավաթի խաղարկությունում:

Ես չեմ լսել, որ «Բորուսիայի» պաշտոնատար անձինք հայտարարեն, որ դա իրենց թուլությունն է: Թիմի ուժը հենց այն է, որ նա կարող է տարբեր մրցաշարերի մասնակցել: Պրոֆեսիոնալները նախապես չեն կարող պլանավորել որեւէ մրցաշարից դուրս մնալը:

Շատերը դժգոհ են Ռուսաստանի ֆուտբոլային խաղադաշտերի որակից: «Սպարտակի» նոր մարզադաշտը կհամապատասխանի՞ եվրոպական մակարդակին ու կկարողանա՞ դիմանալ ռուսական ձմռանը:

«Սպարտակի» մարզադաշտը կհամապատասխանի ՈւԵՖԱ-ի եւ ՖԻՖԱ-ի բոլոր պահանջներին: Այդ մարզադաշտում կկայանան 2018թ. աշխարհի առաջնության եզրափակիչ փուլի հանդիպումները:

«Սպարտակում» անփոփոխ ավանդույթներ կա՞ն:

Իհարկե, «Սպարտակի» «ծնողներ» Ստարոստին եղբայրները, մեր փառապանծ վետերաններ Նետտոն, Սիմոնյանը, Խուսաինովը, Չերենկովը, Դասաեւը եւ այլոք: Նաեւ մեր լավագույն, Ռուսաստանում ամենաշատ թվաքանակն ունեցող երկրպագուները: Վերջապես, սպարտակյան ոգին, հաղթողի ոգին:

Հայաստանի հավաքականն ինչպիսի՞ տպավորություն է թողնում:

Հավաքականը բավականին առաջադիմել է:

Հայաստանի հավաքականին ի՞նչը չի հերիքում:

Փորձը: Բայց դա ժամանակի ընթացքում գալիս է:

Բացի «Սպարտակից», ո՞ր թիմերի համար եք ցավում:

Չեմ ցավում, համակրում եմ: Լոնդոնի «Արսենալին»:

«Արսենալ» - «Բորուսիա» խաղում ցավո՞ւմ էիք անգլիացիների համար:

Այո:

Իսկ հավաքականների՞ց:

Ռուսաստան, Հայաստան:

Ո՞վ է բոլոր ժամանակների լավագույն ֆուտբոլիստը:

Մարադոնան, Ղիփիանին:

Ո՞մ կտայիք «Ոսկե գնդակն» այս տարի:

Չեմ կարծում, որ այս տարի Մեսին կհաղթի: Վերջերս Ռոնալդուն իրեն ավելի լավ է դրսեւորել:

Ամենահետաքրքիր հանդիպումը, որը դիտել եք:

Ես մշտապես հետաքրքրվել եմ ֆուտբոլով: Կարող եմ ժամերով դիտել, հատկապես, երբ խաղում է «Սպարտակը»:

Ո՞վ է բոլոր ժամանակների լավագույն մարզիչը:

Այժմ Ֆաբիո Կապելոն, իսկ ընդհանրապես, բրազիլացի Ֆեոլան:

Ֆուտբոլի պատմության ընթացքում լավագույն գոլը:

1988թ. Եվրոպայի առաջնությունում հոլանդացի Վան Բաստենի գոլը՝ ԽՍՀՄ դարպասը:

Իսկ հայ ֆուտբոլիստներից ո՞վ է լավագույնը: Կարելի՞ է արդեն ասել, որ Մխիթարյանը հայկական ֆուտբոլի պատմության լավագույն ֆուտբոլիստն է:

Ոչ, կարծում եմ, որ հայկական ֆուտբոլի պատմության մեջ լավագույն ֆուտբոլիստը Արկադի Անդրեասյանն է: Ամեն դեպքում, դեռ նա է: Իսկ Հենրիխի մոտ ամեն ինչ դեռ առջեւում է: Միգուցե մի քանի տարի անց ես նրան դասեմ Մարադոնայի ու Ղիփիանիի կողքին: Ամեն դեպքում, ես դա շատ եմ ցանկանում:

Վերա Մարտիրոսյան