Հավաքականի մարզիչ. Դավթյանը թեթեւ դիրքային վրիպում ունեցավ
08:23 27 ապրիլի, 2012Չելյաբինսկում մեկնարկած ձյուդոյի Եվրոպայի առաջնության առաջին օրը Հայաստանի հավաքականի երկու անվիճելի առաջատրներից 60 կգ քաշային Հովհաննես Դավթյանը դարձավ փոխչեմպիոն, իսկ Արմեն Նազարյանը մեդալ չնվաճեց: Լոնդոնի Օլիմպիական խաղերի ձյուդոյի մրցաշարում Հայաստանը ներկայացնելու են հենց այս մարզիկները: Եվրոպայի առաջնության առաջին օրվանից հետո NEWS.am Sport-ի թղթակիցը զրուցեց Հայաստանի հավաքականի մարզիչ Արթուր Գեւորգյանի հետ:
Պարոն Գեւորգյան, պարզ է, որ ոսկե մեդալը կլիներ իդեալական արդյունք, բայց արծաթն էլ պակաս արդյունք չէ Եվրոպայի առաջնությունում: Ի՞նչ կարծիքի եք:
Լիովին համաձայն եմ: Արծաթե մեդալը նման ներկայացուցչական մրցաշարում շատ բարձր արդյունք է: Մենք բացի մեդալ նվաճելուց հասկացանք, որ ճիշտ ճանապարհի վրա ենք: Իր նպատակին ծառայեց մինչեւ մրցաշարը Արմավիրում անցկացված հավաքը: Եզրափակիչում էլ Հովհաննես Դավթյանը ուղղակի թեթեւ դիրքային վրիպում ունեցավ, որն էլ վճռեց գոտեմարտի ելքը ռուս ձյուդոիստի օգտին, բայց դա շտկելի է: Համենայնդեպս մրցաշարի ընթացքում Հովհաննեսը, կարելի է ասել, բացարձակ առավելությամբ հաղթանակի հասավ իր մրցակիցների նկատմամբ: Ընդ որում` բոլորն էլ շատ հայտնի ու տիտղոսակիր մարզիկներ էին` թուրք Իսկանդեր Օզկանօղլուն, վրացիներ Բետիկի Շուկվանին եւ Գեորգի Զանտարայան: Անկասկած մենք, հեռու նայելով, մտածում ենք Օլիմպիաական խաղերի մասին, ու եթե Հովհաննեսը շարունակի այսպես գոտեմարտել, կարծում եմ` ակնկալիքներ կունենանք նաեւ Լոնդոնում:
Իսկ ի՞նչ կասեք Արմեն Նազարյանի գոտեմարտերի մասին:
Արմենի գոտեմարտը վրացի ձյուդոիստի հետ շատ լարված պայքարում անցավ: Մեր մարզիկը նկատողություն ստացավ տատամիի վրայից դուրս գալու համար, հետո երկկողմանի նկատողություն տվեցին երկուսին էլ, ու վրացին ունեցավ յուկո: Արմենը հետագայում գցում կատարեց, որը իմ կարծիքով նույնպես արժանի էր յուկո գնահատականին, սակայն միավորը չտրվեց: Շատ դժգույն գոտեմարտ ստացվեց: Բայց Արմենը կարող է դեռեւս իր խոսքն ասել տատամիի վրա: Իսկ ապրիլի 27-ին արդեն մենք ակնկալիքներ ունենք Արտյոմ Բաղդասարյանից, ով հանդես է գալու 81 կգ քաշային կարգում:
Զրուցեց Խաչիկ Չախոյանը
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.