Հավաքականն առաջին անգամ կմասնակցի միջազգային մրցաշարի. հարցազրուց

Ֆուտբոլի Հայաստանի մինչեւ 17 տարեկանների հավաքականը շարունակում է նախապատրաստվել սեպտեմբերին մեկնարկելիք Եվրոպայի առաջնության ընտրական առաջին խմբի մրցաշարին: Այս փուլում մեր հավաքականի մրցակիցներն են լինելու Սերբիայի, Բելառուսի եւ Մոլդովայի հավաքականները:  Հայաստանի հավաքականը ապրիլի 26-ին մեկնեց Ղազախստան, որտեղ մասնակցելու է միջազգային մրցաշարի: NEWS.am Sport-ի թղթակիցը զրուցեց հավաքականի գլխավոր մարզիչ Ռոման Սիմոնյանի հետ:

Պարոն Սիմոնյան, եթե չեմ սխալվում, առաջին անգամ է թիմը մասնակցում միջազգային մրցաշարի:

Այո, միջազգային մրցաշարի առաջին անգամ ենք մասնակցում, բայց միջազգային ընկերական հանդիպումներ Վրաստանի ու Իրանի հավաքականների հետ անցկացրել ենք մինչեւ այս: Շատ կարեւոր մրցաշար է մեր թիմի համար: Պատանի ֆուտբոլիստները պետք է զգան նման մրցաշարերի լարվածությունը, ինչպես ասում են` զգան շունչը: Մեր ենթախմբում ընդգրկված են նաեւ Ղազախստանի, Թուրքմենստանի եւ Հունգարիայի հավաքականները: Ապրիլի 28-ին առաջին մրցակիցը լինելու են հունգարացիները:

Իսկ ի՞նչ մրցակարգով է մրցաշարը:

Ենթախմբում երեքական հանդիպումներ անցկացնելուց հետո ըստ զբաղեցրած տեղերի, յուրաքանչյուր թիմ մրցելու է մյուս ենթախմբում նույն տեղը զբաղեցրած  թիմի հետ: Այսինքն` մեր ենթախմբում առաջին տեղը  զբաղեցրած թիմը մրցելու է մյուս ենթախմբի հաղթողի հետ եւ այդպես շարունակ: Նշեմ, որ մյուս ենթախմբում մրցելու են Իրանի, Թուրքիայի, Ադրբեջանի եւ Վրաստանի հավաքականները:

Մեր հավաքականի կորիզը ո՞ր թիմերի խաղացողներն են կազմում:

Հիմնականում «Բանանցի» եւ «Փյունիկի» ֆուտբոլիստներն են, կան նաեւ «Միկայից», «Իմպուլսից» եւ «Ուլիսից»: Արտասահմանից հրավիրվել են դարպասապահ Անատոլի Այվազովը («Լոկոմոտիվ», Մոսկվա), Գրիգորի Գալստյանը («ԲԿՄԱ», Մոսկվա) եւ Ֆուրման Մելքոնյանը («Սեւիլիա», Իսպանիա):

Այս տարիքային խմբում նախորդ մրցաշարում մեր հավաքականը դարպասապահի խնդիր ուներ, հիմա այդ հարցը լուծվե՞լ է:

Այո, իրոք անցյալ մրցաշրջանում մինչեւ 17 տարեկանների հավաքականը դարպասապահի խնդիր ուներ: Հիմա Անատոլի Այվազովի գալով այդ հարցը փակվեց: Մենք, իհարկե, ուշադրության կենտրոնում ենք պահում արտասահմանում հանդես եկող հայ ֆուտբոլիստներին, սակայն աշխատում ենք նաեւ տեղի կադրերի վրա:

Զրուցեց Խաչիկ Չախոյանը