«Սպարտակը» պարտվեց դերբիում

18:56   23 նոյեմբերի, 2013

Ֆուտբոլի Ռուսաստանի առաջնության 17-րդ տուրում ԲԿՄԱ-ն մոսկովյան դերբիում նվազագույն հաշվով հաղթեց «Սպարտակին», որին առաջին շրջանում պարտվել էր 0:3 հաշվով:

«Խիմկի Արենա» ստադիոնում կայացած խաղի հաշիվը 7-րդ րոպեին բացեց ԲԿՄԱ-ի կոտդիվուարցի հարձակվող Սեյդու Դումբիան, ով օգտվեց հյուրերի դարպասապահի եւ պաշտպանի անհամաձայնեցված գործողություններից: Վնասվածքից ապաքինված Յուրա Մովսիսյանը «Սպարտակի» մեկնարկային կազմում էր, սակայն առաջին խաղակեսում Հայաստանի հավաքականի հարձակվողը չունեցավ իրական գոլային պահեր, իսկ 47-րդ րոպեին ստացավ դեղին քարտ:  

Երկրորդ խաղակեսի մեկնարկային 15 րոպեներին ԲԿՄԱ-ն կարող էր խփել 3 գոլ, սակայն բանակայինները վրիպում էին հարմար դիրքերից: 59-րդ րոպեին Յուրա Մովսիսյանին փոխարինեց պարագվայցի հարձակվող Լուկաս Բարիոսը, իսկ Հայաստանի հավաքականի կիսապաշտպան Արաս Օզբիլիսը խաղադաշտ դուրս եկավ Պավել Յակովլեւի փոխարեն, բայց «Սպարտակին» չհաջողվեց խուսափել պարտությունից:

Այս հաղթանակից հետո ԲԿՄԱ-ն հավասարվեց 2-3-րդ տեղերը բաժանող «Լոկոմոտիվին» ու «Սպարտակին», որոնք հավաքել են 33-ական միավոր: 36 միավոր ունեցող առաջատար «Զենիթին» կարող է հավասարվել «Լոկոմոտիվը», որը նոյեմբերի 24-ին կընդունի «Դինամոյին»:

Ռուսաստանի առաջնություն, 17-րդ տուր 

ԲԿՄԱ – «Սպարտակ»՝ 1:0

Սեյդու Դումբիա, 7

«Տոմ» - «Ռուբին»՝ 0:1

Սերգեյ Կիսլյակ, 80

Հեռացում՝ Պավել Գոլիշեւ, 63 («Տոմ»)

«Ամկար» - «Կուբան»՝ 3:1

Իգորի Պիկուսկիաչ, 77, Իվան Չերենչիկով, 81, Գեորգի Պեեւ, 86 (11մ.) – Դեալբերտ, 27



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.