Մայիսի 3-ին Մանչեսթերում կմեկնարկի թաեքվոնդոյի Եվրոպայի առաջնությունը: Հայաստանի հավաքականն այժմ հավաք է անցկացնում Աբովյանի մարզաբազայում: Եվրոպայի առաջնությանը նախապատրաստվում են Լեւոն Փաշաբազյանը (74 կգ), Վարագ Աղաջանյանը (54 կգ) եւ 2010թ. Եվրոպայի չեմպիոն Հայկազ Սամվելյանը (58 կգ): Հավաքականի գլխավոր մարզիչն է Գեւորգ Դանիելյանը:
NEWS.am Sport-ի թղթակիցը զրուցել է Հայկազ Սամվելյանի հետ:
Հայկազ, ինչպե՞ս է անցնում հավաքը:
Ամեն ինչ գերազանց է: Մարզվում ենք օրը երկու անգամ: Պայմանները լավ են: Պատրաստվում ենք մայիսի 1-ին Մանչեսթեր մեկնելուն: Մարզումների գրաֆիկը շատ լարված է, ինչը բնական է, եթե հաշվի առնենք Եվրոպայի առաջնության նման մրցաշարի նշանակությունը: Բոլոր տղաները լավ մարզավիճակում են:
Օլիմպիական ուղեգիր նվաճած Արման Երեմյանի մարզումներն ինչպե՞ս են ընթանում:
Արմանը չի մարզվում: Նա նոր է վերադարձել Վլադիկավկազից, որտեղ հավաք էր անցկացնում: Նա չի այցելելու Մանչեսթեր, քանզի պատրաստվում է Օլիմպիական խաղերին: Ես եւ մյուս տղաները ապրիլի 14-ին Երեւանում նվաճեցինք Հայաստանի չեմպիոնի տիտղոսը:
Ի՞նչ սպասելիքներ ունեք Եվրոպայի առաջնությունից:
Բոլորս հույս ունենք, որ կկարողանանք մեզ լավ դրսեւորել եւ մեդալ նվաճել: Այդ պատճառով էլ համառ մարզվում ենք: Բոլոր տղաների տրամադրությունը մարտական է: Եվրոպայի առաջնությունում թույլ մրցակիցներ չեն լինում: Մտադիր ենք ցուցադրել այն ամենը, ինչ կարող ենք:
Զրուցեց Պարույր Սինյավսկին
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։