Մարկոս Պիզելի. Այն էլ ինչպես կնշեմ «Կուբանի» դարպասը խփած գոլը

Եթե կարողանամ աչքի ընկնել կրասնոդարյան դերբիում, ապա խփածս գոլն այնպես կնշեմ, որ Կրասնոդարի ստադիոնը երբեք չի տեսել նման բան, հայտարարել է ռուսական «Կրասնոդարի» եւ Հայաստանի հավաքականի կիսապաշտպան Մարկոս Պիզելին։ 29-ամյա ֆուտբոլիստը խոսել է իր նախկին թիմի՝ «Կուբանի» դեմ Ռուսաստանի առաջնության 15-րդ տուրի խաղի մասին:

«Այսպիսի խաղերը շատ հատուկ են: Զգացմունքներ, հետաքրքիր խաղ՝ բազմաթիվ մենապայքարներով: Կողմերը՝ թիմերի նախագահները, երկրպագուները, մարզիչներն ու ֆուտբոլիստները, երազում են միայն հաղթանակի մասին: Դերբիում ոչ ոքին պետք չէ թիմերից ոչ մեկին: Մրցաշարային աղյուսակում զբաղեցրած տեղը նույնպես նշանակություն չունի: Այդ պատճառով միշտ խաղադաշտ ես դուրս գալիս մրցակցին գերազանցելու ցանկությամբ:

Շատ եմ հարգում «Կուբանին» ու նրա երկրպագուներին: «Կուբանի» ֆուտբոլիստներից շատերն ընկերներս են, սակայն եթե կարողանամ աչքի ընկնել այդ խաղում, ապա խփածս գոլն այնպես կնշեմ, որ Կրասնոդարի ստադիոնը երբեք չի տեսել նման բան: Ի վերջո, սա դերբի է: Սակայն սկզբի համար պետք է ընդգրկվել թիմի մեկնարկային կազմում, իսկ հետո դառնալ գոլի հեղինակ»,- Մարկոսի խոսքը մեջբերում է «Կրասնոդարի» կայքը:

Հիշեցնենք, որ Պիզելին «Կուբանում» խաղացել է 2012-2013-ը՝ 31 խաղում խփելով 8 գոլ: