Եթե մտածում ենք, որ այսօր օդանավակայանում վախեցրիք մեզ, ապա իմացեք, որ դա չի ազդի մեր խաղի վրա: Երեւանում մեզ սպասվում է հետաքրքիր հանդիպում: Մեր խմբում յուրաքանչյուր թիմ ունի այնքան միավոր, ինչքանի արժանի է:
Այս մասին հոկտեմբերի 10-ին կայացած ասուլիսում հայտարարել է ֆուտբոլի Բուլղարիայի հավաքականի գլխավոր մարզիչ Լյուբոսլավ Պենեւը, ով խոսեց Հայաստանի հավաքականի դեմ աշխարհի առաջնության ընտրական խաղի մասին։
«Մենք պատրաստ ենք թե՛ այս խաղին, թե՛ Չեխիայի հավաքականի դեմ հանդիպմանը: Եթե մտածում ենք, որ այսօր օդանավակայանում վախեցրիք մեզ, ապա իմացեք, որ դա չի ազդի մեր խաղի վրա: Չեմ ցանկանում այլեւս խոսել ոչ ֆուտբոլային թեմաներով: Կան կոմիտեներ, որոնք կզբաղվեն այդ հարցերով: Իմ գործը ֆուտբոլն է:
Մեզ սպասվում է հետաքրքիր խաղ: Երկու թիմերն էլ ունեն տեխնիկապես լավ պատրաստված ֆուտբոլիստներ: Մեր խմբում եղան շատ հետաքրքիր արդյունքերով մի քանի հանդիպումներ: Յուրաքանչյուր թիմ ունի այնքան միավոր, ինչքանի արժանի է: Կանխատեսում անելը դժվար է: Մենք եկել ենք այստեղ հաղթելու համար:
Մենք չգիտենք, թե ինչպես վերջին հանդիպումներում կխաղա խմբում առաջին տեղն ապահոված Իտալիայի հավաքականը: Մեր գործն այս երկու խաղերում լավ հանդես գալն է: Միջազգային խաղերում կարեւոր է երկրի պատիվը: Չեմ կարծում, որ Իտալիան միտումնավոր թույլ հանդես կգա դանիացիների դեմ:
Սոֆիայում տեղի ունեցած խաղը իսկական պայքար էր: Համաձայն չեմ, որ իմ ֆուտբոլիստները հատուկ սադրանքների էին դիմում: Հայաստանի հավաքականն առաջին խաղում Մալթային հաղթելուց հետո էր ժամանել Սոֆիա, իսկ մենք միավորներ էինք կորցրել Իտալիայի հետ մրցավեճում: Դրա համար մեր հաղթելու ցանկությունն ավելի մեծ էր: Այլեւս չեմ ցանկանում խոսել առաջին շրջանի խաղի մասին»,- նշեց բուլղարացի մասնագետը:
Լյուբոսլավ Պենեւի ասուլիսից հետո Երեւանի «Հանրապետական» ստադիոնում բուլղարացիներն անցկացրին փակ մարզում, որը հսկվում էր բազմաթիվ ոստիկանների կողմից:
Հիշեցնենք, որ Հայաստան - Բուլղարիա խաղը կկայանա հոկտեմբերի 11-ին «Հանրապետական» ստադիոնում։ Նախավերջին տուրից առաջ երկրորդ տեղում գտնվող բուլղարացիներն ունեն 13 միավոր, իսկ Հայաստանի հավաքականը՝ 9:
Վերա Մարտիրոսյան
Ֆոտո՝ Շուշանիկ Հակոբյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։