15:25 22 սեպտեմբերի, 2013Ֆուտբոլի Ռուսաստանի առաջնության 9-րդ տուրում կայացավ մոսկովյան դերբին: «Սպարտակն» ընդունել էր առաջատար ԲԿՄԱ-ին եւ առավելության հասավ 3:0 հաշվով:
Հայաստանի հավաքականի ֆուտբոլիստներ Յուրա Մովսիսյանն ու Արաս Օզբիլիսը խաղադաշտ էին դուրս եկել «Սպարտակի» մեկնարկային կազմում: Խաղի սկբնամասում հավասար պայքար էր ընթանում: 36-րդ րոպեին Յուրա Մովսիսյանը կարող էր բացել հաշիվը, սակայն 26-ամյա հարձակվողը մի քանի մետրից չկարողացավ գրավել դատարկ դարպասը՝ հարվածելով դարպասաձողին: Այն, ինչ չարեց Մովսիսյանը, քիչ անց արեց Արաս Օզբիլիսը, ով 40-րդ րոպեին առաջ մղեց դաշտի տերերին՝ Ռուսաստանի առաջնությունում խփելով իր առաջին գոլը «Սպարտակի» կազմում:
Ընդմիջումից հետո գնդակը եւս 2 անգամ հայտնվեց բանակայինների դարպասում: 52-րդ րոպեին Ռուսաստանի հավաքականի խաղացող Դմիտրի Կոմբարովը կրկնապատկեց դաշտի տերերի առավելությունը, իսկ 7 րոպե անց ռուս պաշտպան Սերգեյ Պարշավլյուկը խփեց «Սպարտակի» երրորդ գնդակը՝ վերջակետ դնելով խաղին:
Արաս Օզբիլիսը փոխարինվեց 85-րդ րոպեին, իսկ Յուրա Մովսիսյանը մասնակցեց ամբողջ հանդիպմանը:
Այս հաղթանակի շնորհիվ Վալերի Կարպինի թիմը հավասարվեց մրցաշարային աղյուսակը գլխավորող ԲԿՄԱ-ին՝ հավաքելով 20 միավոր: Այս տուրում առաջատարներին կարող է հավասարվել նաեւ Սանկտ Պետերբուրգի «Զենիթը»:
Ռուսաստանի առաջնություն, 9-րդ տուր
«Սպարտակ» - ԲԿՄԱ՝ 3:0
Արաս Օզբիլիս, 40, Դմիտրի Կոմբարով, 52, Սերգեյ Պարշավլյուկ, 59
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.