Կառլեն Մկրտչյան. Չեխիայում խաղում էի հեմատոմայով

20:59   13 սեպտեմբերի, 2013

Հայաստանի ազգային հավաքականի եւ «Անժիի» կիսապաշտպան Կառլեն Մկրտչյանը  NEWS.am Sport-ի թղթակցի հետ զրույցում պատմել է Դանիայի հավաքականի հետ աշխարհի առաջնության ընտրական խաղում ստացած վնասվածքի, առողջական վիճակի եւ ընտրական խմբում Հայաստանի հնարավորությունների մասին:

Կառլեն, ինչպե՞ս է առողջական վիճակդ: Կկարողանա՞ս մանսնակցել «Անժիի» հաջորդ խաղին:

Կարող եմ ասել, որ նորմալ եմ ինձ զգում: Այսօր մարզվել եմ, բայց ոչ լիովին ծրագրով: «Անժին» երկու օրից խաղ ունի: Պատրաստվում եմ այդ խաղին: Խաղադաշտ դուրս գալու հնարավորություններս գնահատում եմ 50/50: Դանիայի հետ խաղում վնասվածք ստացա: Ավելի ճիշտ՝ ես այդ վնասվածքը ստացել էի «Անժիի» կազմում իմ առաջին խաղում: Կողոսկրիս վրա հեմատոմա էր առաջացել: Չեխիայում պահի տակ ցավեր զգացի, բայց դա ինձ չանհանգստացրեց: Իսկ այստեղ` Երեւանում, անհաջող ընկա՝ հենց ցավացող կողոսկրիս վրա, համ էլ ուսս վնասեցի: Ծակոցներ զգացի եւ հասկացա, որ այլեւս չեմ կարողանա շարունակել խաղը եւ խնդրեցի ինձ փոխարինել: Ես, եթե զգում եմ, որ պետք է գտնվեմ խաղադաշտում, բայց օգուտ չտամ թիմին, կգերադասեմ դուրս գալ խաղադաշտից: Այժմ փառք Աստծո ապաքինվում եմ:

Հավատո՞ւմ ես, որ Հայաստանի հավաքականի կարող է դուրս գալ խմբից:

Եթե իրատեսորեն նայենք, մեր հնարավորությունները շատ փոքր են: Բայց ամեն բան հնարավոր է: Մենք պետք է մտածենք, որ առաջիկա երկու խաղերում հաղթենք: Մենք պետք է հաղթենք անգամ այն դեպքում, եթե չենք մեկնի Բրազիլիա: Չնայած բոլորս էլ շատ ենք ցանկանում հայտնվել աշխարհի առաջնության եզրափակիչ փուլում:

Ինչպե՞ս ես գնահատում հավաքականի ելույթներն աշխարհի առաջնության այս խմբային փուլում:

Բոլորը տեսան, որ մեզ բաժին հասավ շատ դժվար խումբ: Անգամ Մալթան կարողացավ մեզնից միավորներ վերցնել: Այդ խմբում բոլորը իրարից միավոր էին վերցնում: Մեր հավաքականը ունեցավ շատ լավ խաղեր, բայց խումբն իսկապես ուժեղ էր:

Վերա Մարտիրոսյան



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.