Հայաստանի մեծաթիվ մարզական պատվիրակությունը մեկնեց Ֆրանսիա

Հայաստանի  մարզական մեծաթիվ  պատվիրակությունը սպորտի նախարար Յուրի Վարդանյանի գլխավորությամբ մեկնել է Ֆրանսիա` մասնակցելու սեպտեմբերի 7-15-ը Նիցայում կայանալիք  Ֆրանկոֆոնիայի միջազգային 7-րդ մարզամշակութային խաղերին, հայտնում է Սպորտի նախարարության լրատվական ծառայությունը:

Հայաստանի մարզիկները երկրորդ անգամ են մասնակցում այս միջազգային խաղերին:

Հայաստանը ներկայացնող մարզիկները հանդես կգան 5 մարզաձեւերում` խճուղային հեծանվավազք, սեղանի թենիս , աթլետիկա, ձյուդո եւ ազատ ոճի ըմբշամարտ:

 Պատվիրակության կազմում ընդգրկված են ազատ ոճի ըմբիշներ Օհան Գիքինյանը (55 կգ), Աշոտ Տերտերյանը (60 կգ քաշային), Նարեկ Սիրունյանը (66 կգ), Մերուժան Զադոյանը (74 կգ), Վահե Թամրազյանը  (84 կգ), Վիկտոր Կազիշվիլին (96 կգ), Անդրանիկ Գալստյանը  (120 կգ ) եւ 3 մարզիչ` Ավետիք Վարդանյանը,  Հապետնակ Կուրղինյանը, Լյովա Վարդանյանը:

Ձյուդոյում Հայաստան կներկայացնեն Գրիգոր Իվանյանը (60 կգ), Տիգրան Վարոսյանը (60-66կգ), Սուրիկ Գառնիկյանը (66-73կգ):

Աթլետիկա մարզաձեւում կներկայանան  հեռացատկորդներ Վարդան Փահլեւանյանը, Արսեն Սարգսյանը, Լեւոն Աղասյանը (եռացատկ), Մելիք Ջանոյանը (նիզակի նետում), Սաթենիկ Հովհաննիսյանը, Ամալյա Շառոյանը (400 մ արգելավազք):

Սեղանի թենիս մարզաձեւում հանդես կգան  Հասմիկ Խաչատրյանը, Համլետ Հակոբյանը   (մարզիչ` Ֆելիքս Սարգսյան):

Խճուղային հեծանվավազքում կմրցեն Տիգրան Վարդազարյանը, Վարշամ Դարբինյանը, Էդուարդ Մաթոսյանը, Հարություն Բարսամյանը, Մհեր Մկրտչյանը (մարզիչ` Ալբերտ Սոլոյան):

Ֆրանկոֆոնիայի մարզամշակութային նախորդ խաղերը անցկացվել են Լիբանանում եւ այն ժամանակ  Հայաստանն ԱՊՀ երկրներից միակ մասնակիցն էր:

Հայաստանի առաջին մասնակցությունն այն ժամանակ նշանավորվեց արծաթե եւ բրոնզե երեք մեդալներով ու անվանական մրցանակների նվաճումով, ինչպես նաեւ լավագույն մասնակցության համար կազմկոմիտեի հատուկ մրցանակով: