Կարեւոր չէ՝ որտեղ է կազմավորվել հավաքականը, կարեւորն այն է, որ թիմի բոլոր անդամները հայ են. Կարլ Բարդակյան
13:04 8 օգոստոսի, 2013«Կարեւոր չէ, թե որտեղ է կազմավորվել հավաքականը, կարեւորն այն է, որ թիմի բոլոր անդամները հայ են եւ միասին լավ են զգում: Եկել ենք Հայաստան՝ համախմբվելու հայաստանցի խաղացողների հետ եւ պատրաստվելու հաջորդ տարի Հայաստանում կայանալիք Եվրոպայի առաջնության C դիվիզիոնի մրցաշարին»:
Այս մասին լրագրողների հետ հանդիպման ժամանակ ասաց Լոս Անջելեսում կազմավորված բասկետբոլի տղամարդկանց Հայաստանի ազգային հավաքականի գլխավոր մարզիչ Կարլ Բարդակյանը: Լոս Անջելեսում ձեւավորված բասկետբոլի Հայաստանի ազգային հավաքականի տասը խաղացողներ այս օրերին գլխավոր մարզիչի եւ երկորդ մարզիչի հետ ժամանել են Հայաստան:
Հայաստանում նրանք ծանոթացել են բասկետբոլով զբաղվող երիտասարդների հետ, Հայաստանում բասկետբոլի զարգացման պայմաններին:
«Եկել ենք Հայաստան այստեղի խաղացողների հետ հանդիպելու եւ միասին մարզվելու համար: Արդեն սկսել ենք մարզումները: Ամեն օր մարզվում ենք: Մեկնելու ենք Արցախ: Արցախից էլ հավաքականի թեկնածու կա: Հույս ունենք Ղարաբաղի նախագահը կաջակցի եւ կընդունի մեզ, մեր խաղացողին էլ կկարողանանք մեզ հետ տանել Լոս Անջելես: Հավաքականն արդեն ձեւավորված է: Դեռեւս պաշտոնական մրցաշարերի չենք մասնակցի, միայն կմարզվենք: Հայաստանի բասկետբոլի ֆեդերացիայի նախագահի եւ սպորտի ղեկավարության ծրագրերով նպատակ կա հաջորդ տարի Երեւանում անցկացնել Եվրոպայի առաջնության C դիվիզիոնի մրցաշարը: Եթե այդպես լինի, մեր առաջին պաշտոնական մեկնարկը կլինի Եվրոպայի առաջնությունը: Իսկ մինչ այդ կսահմանափակվենք միայն ընկերական հանդիպումներով»,- ասաց Կարլ Բարդակյանը:
Լուսինե Շահբազյան
Ֆոտո՝ NEWS.am Sport
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.