Եվրոպայի չեմպիոն Ալեքս Միսկիրտչյան. Հաղթանակներից հետո պարտադիր բարձրացնում եմ հայկական եռագույնը (ֆոտո)

13:53   29 հուլիսի, 2013

«20 տարվա քրտնաջան աշխատելու արդյունքն այն է, որ Եվրոպայի չեմպիոն եմ 57 կգ քաշային կարգում: IBF-ում աշխարհի երրորդ բռնցքամարտիկն եմ: Այժմ նոր բարձրունքների եմ ձգտում»:

Այս մասին NEWS.am Sport-ի թղթակցի հետ զրույցում ասաց բռնցքամարտի Եվրոպայի գործող չեմպիոնը Ալեքս Միսկիրտչյանը, ով վերջերս գտնվում էր Երեւանում: Բելգիայում բնակվող հայ բռնցքամարտիկը ձմռանը կպայքարի աշխարհի չեմպիոնական գոտու համար:

Ալեքս, ծնվել եւ մեծացել ես Վրաստանում: Ինչո՞ւ որոշեցիր բնակվել հենց Բելգիայում:

Վրաստանում ես դարձա երկրի չեմպիոն: Միշտ ցանկանում էի կարիերաս շարունակել Եվրոպայում: Այնպես ստացվեց, որ հայտնվեցի Բելգիայում: Այնտեղ միանգամից սկսեցի հանդես գալ հավաքականի կազմում եւ այդպես շարունակեցի կարիերաս:

Իսկ եթե ավելի հետ գնանք: Ինչո՞ւ ըտրեցիր հենց բռնցքամարտը, որը բավական դժվար մարզաձեւ է:

Այո, դժվար մարզաձեւ է: Պապիկս ու քեռիս նույնպես զբաղվել են բռնցքամարտով: Երբ սկսեցի մարզվել բռնցքամարտով, հասկացա, որ իմ տեղում եմ:

Իսկ ե՞րբ հասկացար, որ ընտրությունը սխալ չէր:

Երբ դարձա Վրաստանի չեմպիոն:

Բռնցքամարտն ունի՞ իր փիլիսոփայությունը, որը նրան առանձնացնում է մյուս մարզաձեւերից:

Բռնցքամարտում պետք է շատ մեծ կարգապահություն, ինչպես նաեւ այսպես ասած կյանքի հիգիենա` ինչպես ապրել, ուտել: Բռնցքամարտիկը պետք է ունենա լայն աշխարհայացք:

Հայաստան եկել ես հանսգտանալո՞ւ, թե՞ մարզվելու նպատակով:

Այտեղ ես ունեմ շատ բարեկամներ: Երեւանում եղել էի շատ փոքր հասակում, բայց կարծես ամեն բան հիշում էի: Ինձ շատ հարազատ եմ զգում այստեղ: Եկել եմ ընկերոջս՝ Վալերի Սաֆարյանի հետ, ով Բելգիայում հայկական համայնքի ղեկավարն է: Ես մազրվում եմ ԱՄՆ-ում: Եկա Հայաստան հանգստանալու նպատակով: Հետո դարձյալ կմեկնեմ ԱՄՆ-ը:

Մաստեր-կլաս եղա՞վ:

Այս անգամ ավելի շատ հանգստանալու համար էի եկել, բայց մեծ ծրագրեր ունենք Հայաստանի հետ կապված: Հոկտեմբերին կվերադառնամ այստեղ:

Կինդ որտեղի՞ց է:

Նա իտալուհի է: Նրանք մեզանից չեն տարբերվում: Ունեմ նաեւ որդի: 

Հայ բռնցքամարտիկների հետ շփվո՞ւմ ես:

Ես մարզվում եմ Լոս Անջելեսում: Այնտեղ շփվում եմ Վանես Մարտիրոսյանի հետ: Իմ մենեջերը շատ լավ գիտի Արթուր Աբրահամին: Ես մեկ անգամ ներկա եմ եղել նրա մենամարտին:

Իսկ այլ մարզաձեւերում հայ մարզիկների ելույթներին հետեւո՞ւմ ես:

Երեւանում ծանոթացա շախմատիստ Տիգրան Պետրոսյանի հետ: Շատ հաճելի էր ծանոթանալ նրա հետ: Շատ լավ մարդ է: Այլ մարզիկների չգիտեմ: Ես հետեւում եմ բռնցքամարտիկների ելույթներին, այլ բանի ժամանակ չի մնում:

Հաղթանակներիդ ժամանակ հայոց եռագույը բարձրացնո՞ւմ ես:

Այո՛, միշտ: Դա պարտադիր է:

Ինչպիսի՞ն են առաջիկա ծրագրերդ:

20 տարվա քրտնաջան աշխատելու արդյունքն այն է, որ Եվրոպայի չեմպիոն եմ 57 կգ քաշային կարգում: IBF-ում աշխարհի երրորդ  բռնցքամարտիկն եմ: Այժմ նոր բարձրունքների եմ ձգտում: Եկող տարի մենամարտելու եմ աշխարհի չեմպիոնի կոչման համար: Իսկ մինչեւ այդ՝ հոկտեմբերի 5-ին, կփորձեմ երրորդ անգամ պաշտպանել Եվրոպայի չեմպիոնի տիտղոսի:

Ո՞րն է քո կարգախոսը:

Իմ մարզաշապիկին գրված է՝ «Աշխարհն իմն է»: Դրա համար պետք է նվաճել աշխարհի չեմպիոնի գոտին:

Աշխարհի չեմպիոնի գոտին նվաճելու դեպքում չե՞ս փորձի փոխել քաշային կարգը:

Դա շատ դժվար է: Մարզումները, սնվելը շատ բարդ է, բայց եթե հաղթեմ, գուցե տեղափոխվեմ 59 կգ կամ 61 կգ քաշային կարգ:

Ցավալի՞ է, որ ոչ պրոֆեսիոնալ բռնցքամարտին այդքան մեծ ուշադրություն չի դարձվում, որքան պրոֆեսիոնալին:

Բոլոր բռնցքամարտիկները սկսում են սիրողականից: Այստեղ շատերն այնքան են հոգնում, որ տեղափոխվելով պրոֆեսիոնալ բռնցքամարտ՝ պարզապես չեն դիմանում եւ ֆիասկո են ունենում: Պրոֆեսիոնալ բռնցքամարտը շատ ավելի դժվար է: Պետք է գիտակցել, թե արժե՞ արդյոք տեղափոխվել, թե դառնալ սպորտի վարպետ:

Ի՞նչ կմաղթես հայ մարզասերներին:

Բռնցքամարտը շատ դժվար մարզաձեւ է: Հանդիսատեսին, լրագրողներին, բոլորին կոչ եմ անում սատարել մեզ: Այդ դեպքում մենք չենք հանձնվում եւ հուսախաբ չենք անում մեզ հավատացողներին:

Վերա Մարտիրոսյան

Ֆոտո՝ Արսեն Սարգսյան / NEWS.am Sport



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։