Հենրիխ Մխիթարյան. Ցանկանում եմ հետք թողնել «Բորուսիայի» պատմության մեջ

«Յուրգեն Կլոպը խորհուրդներ է տալիս ինձ, բացատրում է մարզումային առանձնահատկություններն ու բացահայտում ֆուտբոլային այլ գաղտնիքներ»: 

Այս մասին հայտարարել է Դորտմունդի «Բորուսիայի» եւ Հայաստանի հավաքականի կիսապաշտպան Հենրիխ Մխիթարյանը: 24-ամյա ֆուտբոլիստը պատասխանել է գերմանական RuhrNachrichten-ի հարց եին: 

Պարոն Մխիթարյան, դուք գիտե՞ք Կարլ-Հայնց Ռումենիգեին:

Գիտեմ, որ նա մեծագույն ֆուտբոլիստ է եղել: Դիտել եմ նրա մասնակցությամբ տեսանյութեր:

Ռումենիգեն ասաց, որ իրեն ծանոթ չէ Ձեր անունը:

Դա նորմալ է: Ես խաղացել եմ Ուկրաինայում եւ իմ անունը կարող է ծանոթ չլինել բոլորին:

Հիմա նա Ձեզ ավելի մոտիկից կճանաչի: Տարբերություն կա՞ «Շախտյորի» եւ «Բորուսիայի»՝ նոր մրցաշրջանին նախապատրաստական փուլի ծրագրերում:

Ոչ այնքան: Ամեն դեպքում, պետք է մարզվել ջանասիրաբար: Թիմերը կարող են տարբերվել խաղային փիլիսոփայության եւ խաղաոճի առումով: Ես վաղուց չեմ այստեղ եւ շատ բան դեռ չգիտեմ:

Հատկանշական է, որ դու հարմարվելու հետ կապված խնդիրներ չունես:

Փորձում եմ ամեն ինչ արագորեն սովորել եւ լինել շատ ուշադիր: Ես միշտ կատարում եմ մարզիչի հանձնարարականները՝ փորձելով հարմարվել թիմի խաղաոճին: Ես ընդամենը 2 խաղ եմ անցկացրել «Բորուսիայի» կազմում, իսկ ենթադրություններ հնարավոր կլինի անել որոշ ժամանակ անց:

Յուրգեն Կլոպն անդադար հրահանգներ է տալիս քեզ եւ միշտ ինչ-որ բան է ասում մարզման ժամանակ: Ինչի՞ մասին է նա խոսում:

Նա խորհուրդներ է տալիս ինձ, բացատրում է մարզումային առանձնահատկություններն ու պատմում ֆուտբոլային այլ գաղտնիքներ:

«Բորուսիայի» եւ «Շախտյորի» խաղաոճերը նման են: Դա ազդե՞ց քո՝ նոր թիմ ընտրելու որոշման վրա:

Թիմերի խաղաոճերի նմանությունը դեռ չի ապահովում արագ հարմարվելը: Ամեն ինչ կախված է հենց ֆուտբոլիստից:

Ինչի՞ եք ցանկանում հասնել «Բորուսիայի» հետ:

Ցանկանում եմ տիտղոսներ նվաճել «Բորուսիայի» հետ եւ հետք թողնել ակումբի պատմության մեջ: