Kicker. Կլոպը հիացած է եղել Մխիթարյանի գործողություններով Հայաստան - Իտալիա խաղում

22:57   15 հուլիսի, 2013

«Բորուսիայի» առաջին երկու ստուգողական հանդիպումները ցույց տվեցին, որ Հենրիխ Մխիթարյանը կարող է դառնալ Գերմանիայի հերթական առաջնության իսկական հայտնությունը, գրում է գերմանական Kicker-ը Հայաստանի հավաքականի կիսապաշտպանին նվիրված հոդվածում:

«Ընդամենը մեկ շաբաթ է Հենրիխ Մխիթարյանը մարզվում եւ խաղում «Բորուսիայի» հետ, սակայն արդեն հիմա հայ ֆուտբոլիստը հրաշալի ներդաշնակություն է գտել խաղընկերների հետ: Առաջին երկու ստուգողական հանդիպումները ցույց տվեցին, որ նա կարող է Գերմանիայի հերթական առաջնությունում դառնալ իսկական հայտնություն: Ավելի քան 15 տարի «Բորուսիայի» մարզական տնօրենի պաշտոնը զբաղեցնող եւ բազմաթիվ ֆուտբոլիստների թիմ բերած Միխայել Ցորկը պարզապես զարմացած է այն տեմպից, որով Մխիթարյանը ձուլվում է կոլեկտիվին եւ դորտմունդյան թիմի խաղային սխեմային:

«Բուրսասպորի» դեմ հանդիպումը ցույց տվեց, որ Հենրիխն ավելի է արագացրել «Բորուսիայի» առանց այդ էլ արագ խաղը՝ աչքի ընկնելով դիպուկ եւ սուր փոխանցումներով, մշտապես սրելով խաղը: Մխիթարյանն այն աստիճան լավ էր համագործակցում Օբամեյանգի եւ Լեւանդովսկու հետ, որ տպավորություն էր ստեղծվում, թե նա ամբողջ կյանքը խաղացել է այս ֆուտբոլիստների հետ:

Մխիթարյանը հետաքրքրասեր է, միշտ լրացուցիչ հարցեր է տալիս, ուշադիր լսում է, սպունգի նման վերցնում է նոր բառերն ու արտահայտությունները: Հենրիխը մայրենիից բացի, գիտի նաեւ ռուսերեն, անգլերեն, ֆրանսերեն եւ պորտուգալերեն:

«Բորուսիայի» գլխավոր մարզիչ Յուրգեն Կլոպը հիացած է եղել Մխիթարյանի գործողություններով աշխարհի առաջնության ընտրական մրցաշարի Հայաստան - Իտալիա (1:3) խաղում: Գերմանական ակումբի ներկայացուցիչները ուշադիր հետեւել են Մխիթարյանի խաղը Հայաստանի հավաքականում, իսկ Դանիայի դարպասն ուղարկած հրաշալի գնդակը դորտմունդցիների մարզչական շտաբին ստիպեցին ընդունել վերջնական որոշում:

Յուրգեն Կլոպը մտադիր է Մխիթարյանին օգտագործել հարձակողական կիսապաշտպանի դիրքում՝ նրանից ակնկալելով գրոհի կայծակնային զարգացում, թեեւ «Շախտյորում» Հենրիխը հաճախ էր խաղում գրոհն ավարտողի դերում»:



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.