Հայ բռնցքամարտիկները Թուրքիայում կպայքարեն օլիմպիական ուղեգրերի համար

Լոնդոնի ամառային Օլիմպիական խաղերի բռնցքամարտի մրցաշարին մասնակցելու իրավունք Հայաստանից առայժմ ունի միայն 75 կգ քաշային Անդրանիկ Հակոբյանը: Ապրիլի 14-ին Թուրքիայի Տրապիզոն քաղաքում կմեկնարկի վերջին օլիմպիական վարկանիշային մրցաշարը:

Բռնցքամարտի Հայաստանի հավաքականը Թուրքիա կմեկնի ապրիլի 11-ին: Ռինգ դուրս կգան  երեւանցիներ Կորյուն Սողոմոնյանը (49 կգ), Հովհաննես Դանիելյանը (52 կգ), Արամ Ավագյանը (56 կգ), Հրայր Մաթեւոսյանը (69 կգ), էջմիածինցի Արա Պուլուզյանը (64 կգ), գյումրեցի Վլադիմիր Սարուխանյանը (60 կգ) եւ վանաձորցի Արթուր Խաչատրյանը (81 կգ):

Բռնցքամարտի Հայաստանի հավաքականի գլխավոր մարզիչ Կարեն Աղամալյանը նշել է, որ  բոլոր յոթ մարզիկներն աշխարհի եւ Եվրոպայի տարիքային տարբեր խմբերի առաջնությունների հաղթողներ ու մրցանակակիրներ են եւ ունեն միջազգային մրցումների մասնակցության հարուստ փորձ: Նրանք գտնվում են լավ մարզավիճակում եւ օլիմպիական վարկանիշի արժանանալու նպատակով են մեկնում Տրապիզոն եւ օլիմպիական ուղեգիր նվաճելը նրանց ուժերից վեր գործ չէ, փոխանցում է ՀԱՕԿ-ի պաշտոնական կայքը: