Լուչեսկու. Վստահ եմ՝ Մխիթարյանի դիրքում յուրաքանչյուրն էլ փոխանցում կկատարեր
11:22 27 մայիսի, 2013Գլխավորն այն է, որ թիմն աճում է եւ դառնում է ավելի ուժեղ, ամփոփել է մրցաշրջանը Ուկրաինայի նորընծա չեմպիոն եւ գավաթակիր Դոնեցկի «Շախտյորի» գլխավոր մարզիչ Միրչա Լուչեսկուն, հաղորդում է ակումբի կայքը:
Ուկրաինայի առաջնության վերջին տուրում «Շախտյորը» 4:0 հաշվով առավելության հասավ Դոնեցկի «Մետալուրգի» նկատմամբ:
«Երկար ենք մենք եկել այս նվաճմանը: Այս տարիների ընթացքում շատ խաղացողներ են փոխվել: Ոմանք գնացին, մյուսներն աճեցին եւ սկսեցին խաղալ հիմնական կազմում: Բոլորն էլ մասնակից են չեմպիոնությանն ու գավաթի նվաճմանը: Որեւէ ֆուտբոլիստի բացակայություն չի զգացվում խաղադաշտում: Մենք կառուցել ենք լավ թիմ, որի խաղացողները ոչ միայն ընկերներ են, այլ նաեւ եղբայրներ են: Դա շատ կարեւոր է ֆուտբոլում: Դուք տեսաք, թե ինչպես իրեն դրսեւորեց Հենրիխ Մխիթարյանը, որը կարող էր մեկ մրցաշրջանի ընթացքում գոլերի քանակով հավասարվել Ստարուխինին, սակայն նա փոխանցում կատարեց Էդուարդոյին, որը գրավեց դատարկ դարպասը: Վստահ եմ, որ Մխիթարյանի դիրքում յուրաքանչյուրն էլ փոխանցում կկատարեր եւ չէր փորձի հարվածել դարպասին: Ամենագլխավորը ընդհանուր թիմային տրամադրվածությունն է եւ ֆուտբոլիստների հարգանքը միմյանց նկատմամբ: Հենց դա է մեզ տանում նոր նվաճումների, գումարած մեր տղաների տաղանդը, վերաբերմունքը մասնագիտությանը, հաղթելու ձգտումը եւ տիտղոս նվաճելու ցանկությունը»,- ասել է Միրչա Լուչեսկուն:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.