Հայաստանի GTF թաեքվոնդոյի ֆեդերացիայի նախագահ. Առանց կանոնների մարտերում գումար են վճարում միայն իրար ծեծելու համար

Առանց կանոնների մարտերում  գումար են վճարում միայն իրար ծեծելու համար, երեխաներին մարտարվեստի տանելուց առաջ պետք է տեղակացված լինել, NEWS.am Sport-ի թղթակցի հետ զրույցում ասաց թաեքվոնդոյի Եվրասիայի  առաջնության (2004) բրոնզե մեդալակր, քիկբոքսինգի աշխարհի առաջնության (2004) բրոնզե մեդալակր, ITF թաեքվոնդոյի աշխարհի առաջնության (2010) չեմպիոն, Հայաստանի GTF թաեքվոնդոյի ֆեդերացիայի նախագահ, 7-րդ դան Արա Սարգսյանը: Նշենք, որ թաեքվոնդոյի օլիմպիական տարբերակի (WTF) համեմատ, GTF թաեքվոնդոյում մրցակիցներն իրավունք ունեն կատարել հարվածներ նաեւ ձեռքերով:

«Մեր ֆեդերացիան ստեղծվել է 2003-ին, բայց ակտիվ գործունեություն ծավալել է 2005-ից: Մենք ունենք հինգ ակումբներ, որոնցից չորսը Երեւանում են, մեկը՝ Վանաձորում: Հիմա մենք ունենք ուժեղ հավաքական, որի կազմում հանդես են գալիս Արտակ եւ Արթուր Ղամբարյանները, Ռուբեն Արզոյանը, Գրիգոր Դեմիրճյանը, Դավիթ Գյոզալյանը: Արտակ Ղամբարյանը եղբոր հետ իրենց ակումբն են բացում Սանկտ Պետերբուրգում: Նա 2011թ. Եվրասիայի առաջնության արծաթե մեդալակիր է, Ռուբեն Արզոյանը բազմաթիվ միջազգային մրցաշարերի հաղթող է: Կանանց հավաքական դեռ չունենք, բայց աշխատում են այդ ուղղությամբ: Մեր խմբակներում աղջիկները մարզվում են անվճար:

Այս տարի Եվրոպայի գավաթի խաղարկությունում առաջին տեղ գրավեց Լեւոն Ավագյանը: Հունիսին Կիպրոսում կայանալիք աշխարհի առաջնությունում Հայաստանը կներկայացնեն հինգ-վեց թաեքվոնդոիստներ: Հունիսի 1-2-ին Հայաստանում տեղի կունենա միջազգային մրցաշար, որին կմասնակցեն նաեւ Իրանի, Վրաստանի եւ Ռուսաստանի մարզիկները: Առաջիկայում մրցաշարի կմասնակցենք նաեւ Թբիլիսիում: Ֆինանսավորման հետ կապված բոլոր խնդիրները լուծում ենք սեփական ուժերով:

Օտարերկրացի մասնագետների սեմինարների կարիք չունենք: Հայաստանի ITF թաեքվոնդոյի ֆեդերացիայի նախագահ Կարեն Աղաջանյանն ունի 8-րդ դան, ես ունեմ 7-րդ դան: Մեզ են հրավիրում սեմինարների այլ երկրներ:

Ծնողները երեխաներին մարտարվեստի տանելուց առաջ պետք է տեղակացված լինեն: Ապրում ենք ինտերնետի դարում: Չի կարելի երեխային տանել խմբակ այն մտքով, որ նա կռվել սովորի: Մարտարվեստը ոչ մի ընդհանրություն չունի դրա հետ: Մարտարվեստները ամբողջական մշակույթ են, այս կամ այն ժողովրդի պատմությունն են: Մի հետեւեք նորաձեւությանը եւ մի գնացեք առանց կանոնների մարտերի: Այնտեղ գումար են վճարում միայն իրար ծեծելու համար: Նախքան երեխային այս կամ այն ֆեդերացիայի խմբակ տանելը, պետք է հետաքրքրվել, թե այդ մարտարվեստը որ միջազգային ֆեդերացիայի մեջ է, քանի երկիր է անդամակցում, ով է այդ մարտարվեստի պաշտոնական ներկայացուցիչը Հայաստանում: Դա շատ կարեւոր է: Օրինակ՝ իմ ֆեդերացիան GTFI միջազգային ֆեդերացիայի պաշտոնական անդամ է: Մենք ունենք համապատասխան սերտիֆիկատ: Ռուսաստանում այդ ամենը շատ ավելի համակարգված է: Այնտեղ չկան այսքան նորահայտ մարտարվեստներ: Թաեքվոնդոյի Ռուսաստանի առաջնությանը մասնակցում է մինչեւ 6 հազար մարդ եւ մրցումներն ընթանում են մի քանի օր:

Նոր մարտարվեստների ստեղծման միտումը ոչ միայն Հայաստանում է: Օրինակ՝ Ադրբեջանում ստեղծել են այսպես կոչված՝ մուսուլ թաեքվոնդո: Այլ երկրներում այն չեն ճանաչում: Այժմ փորձում են այդ մարտարվեստը տարածել Վրաստանում, որտեղ ներկայացուցիչը Իգոր Դենիսենկոն է: Նա փորձել է կապ հաստատել Հայաստանի ITF թաեքվոնդոյի ֆեդերացիայի նախագահ Կարեն Աղաջանյանի հետ, որն անմիջապես հրաժարվել է քննարկել որեւէ առաջարկ: Մենք չենք կարող որեւէ կապ ունենալ ադրբեջանական մարտարվեստի հետ: Դենիսենկոն մինչեւ հիմա փորձում է գործընկեր գտնել Հայաստանում, որպեսզի քարոզի այդ կեղծ մարտարվեստը»,- ասաց Արա Սարգսյանը:

Պարույր Սինյավսկի