18:11 15 մարտի, 2013«Չեմ ցանկանա, որ կինս լինի աշխարհի, Եվրոպայի չեմպիոնուհի եւ այլն: Կանայք թող զբաղվեն սպորտով, բայց ծանրամարտը, բռնցքամարտը եւ այլ ուժային մարզաձեւերը թողնեն տղամարդկանց»: Այդ մասին NEWS.am Sport-ի թղթակցի հետ զրույցում ասել է Լոնդոնի օլիմպիական խաղերի բրոնզե մեդալակիր, հունահռոմեական ոճի ըմբիշ Արթուր Ալեքսանյանը:
«Կանանց դերը սպորտում իսկապես մեծ է: Սակայն այս հարցն ինձ համար մի փոքր բարդ հարց է: Ես սիրում եմ, երբ աղջիկը զբաղվում է սպորտով, կոփում է մարմինը, բայց ինձ դուր չի գալիս, որ հայուհին որպես մասնագիտություն է ընտրում սպորտը: Կանանց դերը հայկական սպորտում մեծ է, հաշվի առնելով մեր հայուհիների նվաճումները, բայց ես գնահատում եմ նրանց դերը այն մարզաձեւերում, որոնք ավելի կանացի են, սազական են կանանց: Իսկզբանե եղել է կին մարզիկների նկատմամբ ոչ դրական վերաբերմունք, բայց տարիների ընթացքում մեր կանայք ապացուցեցին, որ նույնիսկ ուժային մարզաձեւերում նրանք ոչնչով չեն զիջում հայ տղամարդկանց` ավելի լավ հանդես գալով: Ես ինքս կարծում եմ, որ ուժային մարզաձեւերում Հայաստանում կանայք ավելի ուժեղ են: Նրանք ինձ այդպես են ապացուցել:
Չեմ ցանկանում ոչ մեկին վիրավորել, բայց ես, անձամբ լինելով մարզիկ եւ տեսնելով հայուհիների լավ արդյունքները, այնուամենայնիվ, շատ մարզաձեւերում չեմ տեսնում հայուհիներին: Օրինակ` նույն ծանրամարտը: Ճիշտ է` մենք հատկապես այս Օլիմպիական խաղերում ապացուցեցինք, որ ծանրորդ կինն էլ կարող է օլիմպիական մեդալ նվաճել, բայց միեւնույն է, ես որպես հայ տղամարդ եւ սպորտի մարդ, չեմ տեսնում աղջկան ծանրաձողի առջեւ: Սա աղջկան ուղղակի հարմար մարզաձեւ չէ, որ այդ մարզաձեւով պրոֆեսիոնալ զբաղվես եւ դարձնես կյանքիդ ուղի:
Ես դեռ ամուսնացած չեմ եւ ընտրյալ չունեմ, բայց երբ ինձ ապագա հարսնացու գտնեմ, նա չի լինի սպորտի ներկայացուցիչ, չի լինի մարզուհի եւ կապ չի ունենա մարզաշխարհի հետ: Չեմ ցանկանա, որ կինս լինի աշխարհի, Եվրոպայի չեմպիոնուհի եւ այլն: Թող զբաղվեն սպորտով, բայց ծանրամարտը, բռնցքամարտը եւ այլ ուժային մարզաձեւերը թողնեն տղամարդկանց»,- ասել է Արթուր Ալեքսանյանը:
Լուսինե Շահբազյան
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.