Յուրի Վարդանյան. Ես հերքում եմ, որ նշանակվելու եմ ՀՀ սպորտի նախարար

16:34   12 հունվարի, 2013

«Ես հերքում եմ, որ նշանակվելու եմ ՀՀ սպորտի նախարար: Ես չեմ պատրաստվում նշանակվել սպորտի նախարար: Իհարկե, դա շատ հնարավոր է` ես սպորտից հեռու մարդ չեմ, բայց այս պահին նման ծրագրեր չկան:  Դրանք անհիմն, փողոցային խոսակցություններ են»:

Այս մասին NEWS.am Sport-ի թղթակցի հետ զրույցում ասաց ՀՀ նախագահի խորհրդական, ծանրամարտի օլիմպիական չեմպիոն Յուրի Վարդանյանը:

Հունվարի 12-ին լրատվամիջոցներում լուր է տարածվել, թե ՀՀ նախագահի խորհրդական Յուրի Վարդանյանը նախագահական ընտրություններից հետո զբաղեցնելու է ՀՀ սպորտի նախարարի պաշտոնը:

Պարոն Վարդանյան, ճի՞շտ է, որ նշանակվելու եք ՀՀ սպորտի նախարար:

Ես խորհուրդ կտամ բացարձակ չհավատալ այդ հրապարակումներին, ուշադրության չարժանացնել: Առավոտից ապշում եմ: Ես այնքան լուրջ, կոմպետենտ ընկերներ ունեմ, որ միասին մի կյանք ենք ապրել, ընկերություն արել: Այսօր, նրանք ինձ զանգում են ու նույն հարցն են տալիս: Այն էլ այն դեպքում, որ այդ մարդիկ հստակ գիտեն իմ դիրքորոշումը այդ կապակցությամբ: Բազմիցս ասվել ու հիշատակվել է իմ դիրքորոշումը սպորտի նախարար դառնալու կապակցությամբ: Այդքանից հետո զանգում, ասում են`շնորհավորե՞նք, ճի՞շտ է, թե՞ ոչ: Ուղղակի չեմ հասկանում, թե ինչ հիմքով է նման տեղեկություն տարածվել: Շատ ծանր եմ տանում` ինչպես կարող է լուրջ մարդը նման լրատվությանը հավատալ: Հիմա մի փողոցային խոսակցություն լսում են, կամ չեն լսում, իրենց ենթադրություններով շարադրում են միտքն ու գրում թերթերում:

Այսինքն, նույնիսկ ապագայո՞ւմ նման ծրագիր չկա:

Գիտեք ինչ, դրանք խելքին մոտ խոսակցություններ են: Շատ հնարավոր է, որ ես երբեւէ լինեմ սպորտի նախարար: Բայց չի նշանակում, որ այդ խելքին մոտ բանը կարող է հիմա տեղի ունենալ: Դա հնարավոր էր նաեւ երեկ չէ առաջին օրը: Չեմ ժխտում, ես սպորտից հեռու մարդ չեմ: Բայց այս պահին ու առաջիկայում նման նշանակում չի լինելու: Միայն կցանկանամ խորհուրդ տալ, որ մոտավորապես նյութեր չգրեն:

Հերքում եմ ես այդ ինֆորմացիան: Նախարարներին նշանակում է ՀՀ նախագահը, հաստատում ՀՀ վարչապետը: Այդ ո՞վ է ՀՀ նախագահից իմացել, որ նման նշանակում է լինելու: Ես չգիտեմ այդ մասին:

Ես ցանկանում եմ մի ճշտում մտցնել, որպեսզի բոլորին պարզ լինի, քանի որ ես պարզ մարդ եմ. ես նախագահականում նստած երբեք չեմ մտածում, որ պետք է գնամ սպորտի նախարար: Շատերին թվում է, թե ես այդպես եմ ցանկանում, բայց ես որեւէ նպատակ չունեմ սպորտի նախարարություն գնալ:

Իսկ եթե նշանակվեք սպորտի նախարար, ի՞նչ կփոխեք հայկական սպորտում:

Եթե ես նշանակվեմ սպորտի նախարար` ծայրից ծայր կփոխեմ հայկական սպորտը: Մեծ եւ երկարարտեւ աշխատանք կունենամ անելու որպես սպորտի նախարար:

Զրուցեց Լուսինե Շահբազյանը



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.