Ամանորյա շնորհավորանքներ եւ բարեմաղթանքներ` հայկական սպորտի աստղերից

12:12   31 դեկտեմբերի, 2012

Հայկական սպորտի նշանավոր ներկայացուցիչների ամանորյա շնորհավորանքներն ու բարեմաղթանքները` NEWS.am Sport-ում:


Լեւոն Արոնյան

Մաղթում եմ, որ նոր տարում հայացքները լինեն միայն դեպի առաջ: Ձգտենք ավելիին, միշտ փնտրենք: Եվ երբ մեկ տարին անցնի` դուք ասեք, որ իսկապես ինչ-որ բան փոխվեց: Շնորհավոր Նոր Տարի եւ Սուրբ Ծնունդ:


Սերգեյ Մովսեսյան

Ցանկանում եմ, որ ամեն մարդ գտնի երջանկության բանաձեւը եւ մյուս տարի այս ժամանակ ասի, որ տարին իսկապես հաջողվեց: Շնորհավոր Նոր Տարի եւ Սուրբ Ծնունդ:


Տիգրան Պետրոսյան

Շնորհավոր Նոր Տարի եւ Սուրբ Ծնունդ: Բոլորին մաղթում եմ առողջություն, խաղաղություն եւ համբերություն:


Հենրիխ Մխիթարյան

Շնորհավորում եմ բոլորի Նոր Տարին եւ Սուրբ Ծնունդը: Ցանկանում եմ, որ 2013-ն էլ ավելի հաջող լինի հայ ժողովրդի համար: Հասնենք էլ ավելի մեծ հաջողությունների սպորտի ասպարեզում: Թող մեր երկիրը շարունակի ծաղկել: Ցանկանում եմ բոլորին առողջություն, քանի որ առողջության առկայության դեպքում ամեն բանի կարելի է հասնել:


Վարդան Մինասյան

Հաշվի առնելով, թե ինչ է կատարվում աշխարհում այժմ` կարծում եմ, որ աշխարհի եւ հատկապես Հայաստանի համար ամենից կարեւորը խաղաղությունն է: Մեր երկիրը գտնվում է չկարգավորված կոնֆլիկտի մեջ: Մեր ընտանիքներում թող նույնպես լինի խաղաղություն: Երկրորդ բանը, որ ցանկանում եմ` մեր ժողովուրդը լինի առողջ թե՛ մարմնով, թե՛ հոգով: Եթե ֆիզիկապես առողջ չես, դա ազդում է նաեւ քո հոգեկան առողջության վրա: Եվ երրորդը` ցանկանում եմ մեր ժողովրդին բարեկեցություն: Որպեսզի աշխատանք լինի եւ մարդիկ կարողանան բարեկեցիկ կյանքով ապրել:

Ինչ վերաբերում է ֆուտբոլային աշխարհին, ապա կասեմ մեկ բառով` հաղթանակներ: Ինձ մինչեւ այժմ ցույց են տալիս տեսանյութեր, թե ինչպես էր Երեւանը տոնում Հայաստանի ազգային հավաքականի հաղթանակները: Անկախ սեռից, տարիքից, պատկանելությունից` ֆուտբոլային հաղթանակները միավորում են մեր ազգին:

Պատրաստեց Վերա Մարտիրոսյանը



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։