Կարեն Ասլանյան. Շատ ուրախ եմ հաղթանակիս համար, վերջապես ոսկին նվաճեցի (տեսանյութ)

Շատ ուրախ եմ հաղթանակիս համար: Վերջապես, Աստծո կամքով, ոսկին նվաճեցի: Չեմ կարծում, որ իմ ոսկե մեդալով թիմին փրկեցի, որովհետեւ մեր թիմը փրկվելու կարիք չունի: Ամբողջ աշխարհը գիտի, թե հունահռոմեական նաեւ ազատ ոճի ըմբշամարտի Հայաստանի հավաքականները որքան հզոր են: Ուզում եմ շնորհակալություն հայտնել մեր թիմի բոլոր տղաներին: Ամեն մեկն իր լուման ունի այս հաղթանակում: Սա բոլորիս հաղթանակն է:

Այս մասին «Զվարթնոցում» ասաց աշխարհի նորընծա չեմպիոն, 2024 թ. աշխարհի առաջնության բրոնզե մեդալակիր, Եվրոպայի փոխչեմպիոն, Տոկիոյի Օլիմպիական խաղերի մասնակից, 31-ամյա Կարեն Ասլանյանը:

Աշխարհի չեմպիոնի տիտղոսը նվաճած Կարեն Ասլանյանը նախորդ գիշեր Հայաստանի թիմի հետ Աստանայից վերադարձել է հայրենիք:

«Այս աշխարհի առաջնությունում ավելի սառնասիրտ էի, հանգիստ եւ հավաքված: Շատ լավ աշխատանք էինք տարել թիմով, որն իր արդյունքը տվեց:

Գոտեմարտերից առաջ իմ առջեւ նպատակ չէի դնում արագ վերջացնել: Դուրս էի գալիս իմ գործն անելու, շատ հանգիստ եւ առանց ավելորդ մտքերի, ինչպես ամեն անգամ լինում էր: Շատ հանգիստ էի: Այսկերպ ավելի լավ ստացվեց: Վերջապես, Աստծո կամքով, ոսկին նվաճեցի:

Եզրափակիչում հաղթելուց հետո գիտակցում էի, որ դարձա աշխարհի չեմպիոն: Էմոցիաներս շատ մեծ էին, լիարժեք հոգեբանորեն բավարարված էի ինձ զգում, քանի որ իմ այսքան տարիների աշխատանքն ասես գնահատվեց այս ոսկե մեդալով:

Մեր թիմը շատ մեծ աշխատանք էր տարել աշխարհի առաջնությունից առաջ: Գորգի վրա կարողանում էի լսել մարզիչներին եւ անել այն, ինչ մշակել էինք հավաքների, մարզումների ընթացքում: 

Չեմ կարծում եւ չեմ կարող ոչ մի դեպքում ասել, որ իմ ոսկե մեդալով թիմին փրկեցի: Չեմ համարում, որ մեր թիմը փրկվելու կարիք ունի, որովհետեւ ամբողջ աշխարհը գիտի, թե հունահռոմեական նաեւ ազատ ոճի ըմբշամարտի Հայաստանի հավաքականները որքան հզոր են: Ուզում եմ շնորհակալություն հայտնել մեր թիմի բոլոր տղաներին: Ամեն մեկն իր լուման ունի այս հաղթանակում: Մրցավայրում բոլորս միմյանց օգնում էինք, նույն Մալխաս Ամոյանը, Սլավիկ Գալստյանը. շատ ենք օգնել իրար: Սա բոլորիս հաղթանակն է եւ սա սպորտ է. մի օր մեկը պարտվում է, մյուսը հաղթում: Թիմի փրկվելու մասին խոսք չի կարող լինել: Բոլորը գիտեն Մալխասի ուժը. նա աշխարհի ամենակայուն ըմբիշներից մեկն է:

Ինչ վերաբերում է մրցակիցներիս եւ մրցակցությանը, բոլորի հետ առաջին անգամ էի գոտեմարտում, բացառությամբ եզրափակիչի մրցակցի՝ ադրբեջանցուց: Նրան գորգում հանդիպել էի 2024 թ. աշխարհի առաջնությունում եւ պարտվել: Այստեղ ռեւանշը ստացվեց:

Բոլորն էլ արժանի մրցակիցներ էին: Կիսաեզրափակիչում Էդմոնդ Նազարյանի հետ գոտեմարտը բարդ ստացվեց, քանի որ մենք նաեւ մտերիմ ընկերներ ենք: Այս պարագայում ավելի է բարդանում պայքարը, բայց երկուսս էլ հասուն մարդիկ ենք եւ հասկանում ենք, որ մրցագորգում այդ 6 րոպեների ընթացքում պետք է գոտեմարտենք եւ դրանից հետո ոչինչ չի կարող փոխվել մեր հարաբերություններում: Կիսաեզրափակիչից հետո զրուցեցինք, միմյանց խորհուրդներ տվեցինք հաջորդ գոտեմարտերի համար»,- ասաց Կարեն Ասլանյանը:

Լուսինե Շահբազյան