Արթուր Ավետիսյան. Աշխարհի առաջնության գնացել էի մեդալի հետեւից (տեսանյութ)

Եվրոպայի առաջնությունում ոսկե մեդալակիր դառնալուց հետո իմ մեջ ոգեւորվածություն կար. Աշխարհի առաջնությանը գնացել էի մեդալի հետեւից եւ գույնը նշանակություն չուներ:

Այս մասին «Զվարթնոցում» ասաց Եվրոպայի չեմպիոն, աշխարհի առաջնությունում բրոնզե մեդալ նվաճած Արթուր Ավետիսյանը, որը նախորդ գիշեր Հայաստանի թիմի հետ Ռոտերդամից վերադարձել է հայրենիք:  

«Խոսքեր չկան, որ ուրախությունս նկարագրեմ աշխարհի առաջնության մեդալակիր դառնալու կապակցությամբ: Առաջինն էի մոտենում գործիքին, որն իմ ամենասիրելի պահն է: Խնդիրն այն էր, որ իմ կատարած վարժության մեջ թերություն կար: Ինքս հասկացա, որ չարեցի այն, ինչ պետք է անեի: Մինչեւ վերջին վայրկյանը կասկածի տակ էր՝ մեդալ կլինի, թե ոչ: Այդպիսի զգացողություն առաջին անգամ էր:

Աստծո կամքն էր, որ մեդալ նվաճեցի: Օղակների վարժությունը միակ գործիքն է, որ մրցակիցները հիմնականում չեն վրիպում: Առաջին անգամ մրցման ժամանակ տեսա, որ 3-4 մասնակից վրիպեց: Իմ մասնակցությամբ եզրափակիչում ուղղակի մարզիկներ չէին, բոլորն աշխարհի եւ Եվրոպայի մեդալակիրներ էին:

Եվրոպայի առաջնությունում ոսկե մեդալակիր դառնալուց հետո իմ մեջ ոգեւորվածություն կար. Աշխարհի առաջնությանը գնացել էի մեդալի հետեւից: Ամենասկզբում ասել էի՝ մեդալի գույնն էական չի, ինձ համար կարեւոր է, որ մեդալ նվաճեմ: Եվ եղավ, ինչի համար շատ ուրախ եմ: Երբ կողքից տեսնում ենք, որ հայ ժողովուրդն է ուրախ մեր նվաճումներով, ավելի ենք ուրախանում»,- ասաց Արթուր Ավետիսյանը:

Ռոտերդամում անցկացված սպորտային մարմնամարզության աշխարհի առաջնությունում օղակների վարժությունում Արթուր Ավետիսյանը նվաճեց բրոնզե մեդալը՝ վաստակելով 14.233 միավոր: Սա նրա առաջին մեդալն է աշխարհի առաջնություններում:

Լուսինե Շահբազյան