Համլետ Մանուկյանն՝ աշխարհի չեմպիոն, Մամիկոն Խաչատրյանը՝ բրոնզե մեդալակիր (տեսանյութ)
18:32 24 հոկտեմբերի, 2026Եվրոպայի չեմպիոն, երիտասարդների աշխարհի կրկնակի չեմպիոն, 19-ամյա Համլետ Մանուկյանը փայլուն կատարումով նվաճեց աշխարհի չեմպիոնի տիտղոսը, Մամիկոն Խաչատրյանը դարձավ բրոնզե մեդալակիր:
Նիդերլանդների Ռոտերդամ քաղաքում անցկացվող սպորտային մարմնամարզության աշխարհի առաջնությունում նժույգ թափեր վարժության եզրափակիչում Համլետ Մանուկյանը վաստակեց 15.300 միավոր:
2025 թ. աշխարհի եւ Եվրոպայի փոխչեմպիոն Մամիկոն Խաչատրյանը եզրափակիչում վաստակեց 15.000 միավոր:
Համլետ Մանուկյանը աշխարհի չեմպիոն հռչակվելուց հետո չկարողացավ զսպել հույզերը: Մրցահարթակում աշխարհի չեմպիոնի եւ բրոնզե մեդալակրի հետ աշխատում էին մարզիչներ Հայկ Նազարյանը, Արտակ Այդինյանը եւ օլիմպիական փոխչեմպիոն Արթուր Դավթյանը:
Այս վարժության արծաթե մեդալակիր դարձավ իտալացի Գաբրիել Թարգետան 15.233 միավորով:
Աշխարհի նորընծա չեմպիոն Համլետ Մանուկյանը նժույգ թափեր վարժության եզրափակիչ էր դուրս եկել առաջին տեղից: Որակավորման փուլում նա վաստակել էր 14.933 միավոր: Մամիկոն Խաչատրյանը որակավորման փուլում վաստակել էր 14.733 միավոր եւ 4-րդ տեղից դուրս եկել եզրափակիչ:
2025 թ. Ինդոնեզիայի մայրաքաղաք Ջակարտայում անցկացված աշխարհի առաջնությունում Համլետ Մանուկյանը նժույգ թափեր վարժության եզրափակիչում վաստակել էր 14.433 միավոր եւ զբաղեցրել 4-րդ տեղը: Մամիկոն Խաչատրյանը 14.600 միավորով նվաճել էր աշխարհի փոխչեմպիոնի կոչումը:
Ռոտերդամում անցկացվող սպորտային մարմնամարզության աշխարհի առաջնությունում եզրափակիչ է դուրս եկել նաեւ Եվրոպայի չեմպիոն Արթուր Ավետիսյանը եւ օլիմպիական փոխչեմպիոն, աշխարհի չեմպիոն, Եվրոպայի եռակի չեմպիոն Արթուր Դավթյանը:
Օղակների վարժության Եվրոպայի գործող չեմպիոնը եզրափակիչ է դուրս եկել 4-րդ տեղից: Որակավորման փուլում նա վաստակել էր 14.233 միավոր:
Նրա մասնակցությամբ օղակների վարժության եզրափակիչը տեղի կունենա քիչ անց:
Օլիմպիական փոխչեմպիոն եւ բրոնզե մեդալակիր, աշխարհի չեմպիոն, Եվրոպայի եռակի չեմպիոն, աշխարհի քառակի գավաթակիչ Արթուր Դավթյանը հենացատկի վարժության եզրափակիչին կմասնակցի հոկտեմբերի 25-ին: Հիշեցնենք, որ Արթուր Դավթյանը որակավորման փուլում երկու ցատկերի հանրագումարում վաստակել էր 14.633 միավոր:
Նա որակավորման փուլում երկրորդն է։
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.