«Փյունիկի» աֆրիկացի նորեկները
17:09 30 սեպտեմբերի, 2026«Փյունիկին» են միացել կոտդիվուարցի կիսապաշտպան Մոհամեդ Բամբան և նիգերիացի հարձակվող Սթիվեն Ալֆրեդը, հաղորդում է երեւանյան ակումբի կայքը։
21-ամյա Մոհամեդ Բամբան 2023 թվականին կարիերան սկսել է մոլդովական «Սակսան» թիմում, ապա 2024 թվականի հունիսին տեղափոխվել բելառուսական «Սմորգոն», որի կազմում անցկացրել է մեկուկես մրցաշրջան:
Մոհամեդ Բամբայի նախորդ թիմը Բելառուսի Բարձրագույն լիգայի ներկայացուցիչ «Տորպեդո-ԲելԱԶ»-ն էր, որտեղ հանդես է եկել այս տարվա հունվարից:
Կոտդիվուարցի ֆուտբոլիստը Բելառուսի Բարձրագույն լիգայում անցկացրել է 65 խաղ՝ դառնալով 3 գոլի և 1 գոլային փոխանցման հեղինակ:
28-ամյա Սթիվեն Ալֆրեդն կարիերան սկսել է Նիգերիայի «Կվարա Յունայթեդ» թիմում, ապա խաղացել է մոլդովական «Սակսանում» և ռուսական «Սոչիում»:
2019 թվականի հուլիսին Սթիվեն Ալֆրեդը վարձավճարով տեղափոխվել է «Փյունիկ» և թիմի կազմում ելույթ է ունեցել մինչև 2021 թվականի հունվար: Այդ ընթացքում նա «Փյունիկի» կազմում մասնակցել է 21 հանդիպման՝ դառնալով 2 գոլի և 2 գոլային փոխանցման հեղինակ:
Սթիվեն Ալֆրեդը հանդես է եկել նաև բելառուսական «Սլուցկում», իսրայելական «Հապոելում» (Հադերա) ու «Մաքաբիում» (Հերցլիա), իսկ 2024 թվականի ամռանը ելույթները շարունակել է Մինսկի «Դինամոյում», որի կազմում այդ տարի դարձել է Բելառուսի չեմպիոն:
Ալֆրեդը դինամոյականների կազմում մասնակցել է Չեմպիոնների լիգայի 2024/25 թթ․ խաղարկության որակավորման առաջին փուլի՝ «Փյունիկի» դեմ հանդիպումներին։ Պատասխան մրցախաղում նիգերիացին խաղավերջում իր թիմի համար 11-մետրանոց վաստակեց, որը կանխորոշեց դիմակայության ելքը։
Այդ մրցաշրջանում նա Մինսկի «Դինամոյի» կազմում մասնակցել է նաև Կոնֆերենցիաների լիգայի խաղարկության հիմնական փուլի հանդիպումներին։
Նիգերիացի ֆուտբոլիստը կես մրցաշրջան խաղացել է նաև Ռուսաստանի Առաջին լիգայի ներկայացուցիչ Յարոսլավլի «Շիննիկում»։
Սթիվեն Ալֆրեդի նախորդ թիմը Բելառուսի Բարձրագույն լիգայում հանդես եկող Ժոդինո քաղաքի «Տորպեդո-ԲելԱԶ»-ն էր, որի գույները պաշտպանել է 2025 թվականի հուլիսից։
Նիգերիացին Իսրայելի Բարձրագույն լիգայում մասնակցել է 26 հանդիպման՝ խփելով 2 գոլ և կատարելով 1 գոլային փոխանցում, իսկ Բելառուսի Բարձրագույն լիգայում անցկացրած 45 խաղում դարձել է 15 գոլի և 8 գոլային փոխանցման հեղինակ։
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.