Հայաստանի հավաքականի ֆուտբոլիստը տեղափոխվեց Ռուսաստան
16:45 1 սեպտեմբերի, 2026Հայաստանի հավաքականի կիսապաշտպան Կառլեն Հովհաննիսյանը Երեւանի «Փյունիկից» տեղափոխվեց ռուսական «Ակրոն»։ Տոլյատին ներկայացնող ակումբը 5 տարվա պայմանագիր է կնքել 21-ամյա ֆուտբոլիստի հետ, հաղորդում է ակումբի կայքը։
«Կառլեն Հովհաննիսյանն «Ակրոնում» է։ Տոլյատիի «Ակրոնը» եւ Երեւանի «Փյունիկը» համաձայնության են հասել կենտրոնական կիսապաշտպանի տեղափոխության վերաբերյալ։ 21-ամյա ֆուտբոլիստը կնքել է 5 տարվա պայմանագիր։
Հովհաննիսյանը Հայաստանի ամենատաղանդավոր խաղացողներից մեկն է։ Նա «Փյունիկի» սան է։ Նա անցել ուղի՝ հասնելով երեւանյան ակումբի հիմնական թիմ, որի հետ մասնակցել է 38 հանդիպման, խփել է 2 գոլ, կատարել 1 գոլային փոխանցում։ «Ակրոնի» նորեկն ունի եվրագավաթային փորձ. մասնակցել է Կոնֆերենցիաների լիգայի 5 հանդիպման։
Հովհաննիսյանը վարձակալությամբ հանդես է եկել նաեւ ԲԿՄԱ-ում, որի կազմում մասնակցել է 53 հանդիպման, խփել է 4 գոլ, կատարել 1 գոլային փոխանցում։
Հովհաննիսյանը Հայաստանի հավաքականի խաղացող է։ Ազգային թիմի կազմում մասնակցել է 3 հանդիպման։ Հովհաննիսյանն արդեն միացել է մեր թիմին։ Նրան մաղթում ենք հաջողություններ, վառ խաղ եւ հաղթանակներ «Ակրոնի» կազմում։ Կառլեն, բարի գալուստ Տոլյատի»,- նշվում է «Ակրոնի» հաղորդագրությունում։
«Ակրոնի» գլխավոր մարզիչն է սերբ Սրջան Բլագոեւիչը։ Ռուսաստանի Պրեմիեր լիգայի ընթացիկ առաջնության 6 տուրից հետո «Ակրոնը» 3 միավորով նախավերջինն է (15-րդ տեղ)։ Անցած մրցաշրջանում «Ակրոնը» գրավել էր 13-րդ տեղը։
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.