Մանուել Տուլիպա․ Սիրում եմ լինել լուրջ եւ հավասարակշռված, բայց խաղից հետո արտասվեցի

Այսօրվա հաղթանակում երկու գործոն կառանձնացնեմ. ընդմիջումը եւ բախտը: Այսօր կարող ենք ասել, որ բախտը մեր կողմից էր: Անդադար ուզում եմ շնորհակալություն հայտնել իմ ֆուտբոլիստներին: Սովորաբար լինում եմ լուրջ եւ հավասարակշռված, բայց խաղից հետո արտասվեցի: Շատ ուրախ եմ բոլոր նրանց համար, ում ուրախացրեցինք:

Այսպես պորտուգալացի մարզիչ Մանուել Տուլիպան մեկնաբանեց ռումինական «Ունիվերսիտեատեա Կրայովայի» նկատմամբ տարած հաղթանակը, որի շնորհիվ «Արարատ-Արմենիան» դուրս եկավ Եվրոպայի լիգայի հիմնական փուլ:

Ֆուտբոլի Հայաստանի չեմպիոն «Արարատ-Արմենիան» Եվրոպայի լիգայի որակավորման փլեյ-օֆֆի պատասխան խաղում հաղթեց ռումինական թիմին 1:0 հաշվով:

Հետխաղային ասուլիսների սրահում պորտուգալացի մարզիչին դիմավորեցին ծափահարություններով եւ վանկարկումներով:

«Շնորհակալություն եմ հայտնում ինձ այսպես ընդունելու եւ դիմավորելու համար, բայց սա միայն Տուլիպա մարզիչի հաղթանակն ու հաջողություն չի, այլ մի մեծ թիմի, մասնավորապես ֆուտբոլիստների հաջողությունն է: Անդադար ուզում եմ շնորհակալություն հայտնել իմ ֆուտբոլիստներին: Ուզում եմ երկար պահել այս հույզերը եւ փորձել երկար տանել: 

Երբ հնչեց հանդիպման ավարտն ազդարարող սուլիչը, շատ հուզված էի: Առաջին անգամ է, որ աշխատում եմ արտասահմանում: Ինձ այստեղ շատ լավ են ընդունել, իմ ընտանիքին՝ նույնպես: Նման պահերին մտածում ես այն բոլոր մարդկանց մասին, որոնց ուրախացրել ես: Ուրախացա այս երկրի համար, իմ թիմի, երկրպագուների համար: Երկրպագուները փայլուն աջակցություն ցուցաբերեցին, շատ բուռն: Նրանց համար նույնպես շատ ուրախացա: Ուրախացա նաեւ իմ ակումբի համար, որը վճարում է ինձ:

Սիրում եմ լինել լուրջ եւ հավասարակշռված, բայց խաղից հետո արտասվեցի: Շատ ուրախ եմ իմ ֆուտբոլիստների համար, քանի որ նրանք ունեն մեծ աշխատասիրություն եւ ձգտում:

Այս հաղթանակը շատ կարեւոր էր ոչ միայն «Արարատ-Արմենիայի» համար, նաեւ հայկական ֆուտբոլի եւ Հայաստանի համար: Երբ ես եկա այս ակումբ, ես իմ թիմին սովորեցրի երազել: Մենք շարունակելու ենք երազել եւ ավելի մեծ նպատակներ դնել մեր առջեւ:

Կարող եմ ասել, որ այսօր մեր լավագույն խաղը չանցկացրինք: Մասնավորապես առաջին խաղակեսը բարդ ստացվեց. ոչ մի կերպ չէինք կարողանում ճնշում գործադրել մրցակցի վրա:

Ընդմիջմանը զրույց ունեցանք, որոշեցինք մի փոքր փոխել խաղի ընթացքը: Մրցակցին ստիպեցինք մի փոքր ավելի շատ դժվարություններ ունենալ:

Այսօրվա հաղթանակում երկու գործոն կառանձնացնեմ. ընդմիջումը եւ բարեբախտությունը: Այսօր կարող ենք ասել, որ բախտը մեր կողմից էր:

Պաշտպանությունից ընդհանուր առմամբ գոհ եմ: Շատ գոհ եմ բոլորի խաղից:

Խաղից առաջ որոշված էր, որ եթե վաստակենք 11-մետրանոց հարվածի իրավունք, իրացնելու է Սանդրո Լիման:

Ֆուտբոլիստներին, իմ թիմին շատ օգնեց երկրպագուների աջակցությունը: Ամբողջ խաղի ընթացքում երկրպագուները վանկարկում էին մեր անունը, ինչը շատ էր օգնում թիմին:

Քանի որ հայտարարել էի՝ եթե հաղթենք, կսափրվեմ, խաղից հետո հանդերձարանում սափրվեցի:

Եվրոպայի լիգայի հիմնական փուլում կուզեմ խաղանք պորտուգալական երկու ակումբների հետ՝ «Բենֆիկայի» եւ «Բրագայի»: Կուզեի իմ թիմը խաղար այս ակումբների հետ, որպեսզի այցելեմ Պորտուգալիա եւ հանդիպեմ ընկերներիս, որոնց վաղուց չեմ տեսել:

Եվրոպա լիգան այս մրցաշրջանում շատ մրցունակ է, շատ ուժեղ թիմեր են մասնակցում: Եկեք չմոռանանք, որ որակավորման փուլերից չորսում տնային խաղերում հաղթել ենք:

Մենք իսկապես մրցունակ թիմ ունենք: Երբեմն հաճելի գլխացավանք եմ ունենում, երբ որոշում եմ թիմի մեկնարկային կազմը: Իմ թիմը համալրված է շատ լավ ֆուտբոլիստներով: Ունենք նաեւ նորեկներ, որոնք նույնպես շատ լավն են: Իմ թիմը մոտիվացվելու խնդիր չունի: Մենք կարողացել ենք այնպես անել, որ ցանկացած հաղթանակից հետո շարունակենք քաղց ունենալ: Այսպիսի հաղթանակներից հետո թիմից որեւէ ֆուտբոլիստ իրեն արքա չի զգում եւ չի հանում ոտքը խաղադաշտից»,- ասաց Մանուել Տուլիպան:

«Արարատ-Արմենիան» հայկական ակումբներից առաջինը դուրս եկավ Եվրոպայի լիգայի հիմնական փուլ։

Լուսինե Շահբազյան