Համլետ Մանուկյան. Շատ ուրախ եմ այս արծաթե մեդալի համար

Շատ ուրախ եմ այս արծաթե մեդալի համար: Փառք Աստծո, կարողացա մեդալ նվաճել: Իտալացու հաղթանակն ավելի մեծ մոտիվացիա տվեց ինձ հետագա պայքարի համար: Երբ քեզ գերազանցում են, ավելի է մոտիվացնում, որ ավելի շատ աշխատես եւ մյուս մրցաշարերում ավելի լավ ներկայանաս ու հաղթես:

Այս մասին NEWS.am Sport-ի թղթակցի հետ զրույցում «Զվարթնոցում» ասաց Եվրոպայի փոխչեմպիոն, 2025 թ. Եվրոպայի չեմպիոն Համլետ Մանուկյանը, որը նախորդ գիշեր Հայաստանի թիմի հետ վերադարձավ Երեւան:

«Շատ ուրախ եմ այս արծաթե մեդալի համար: Փառք Աստծո, կարողացա մեդալ նվաճել: Մարզումների ժամանակ ավելի շատ կաշխատենք, որ մյուս մրցաշարերում արդյունքն ավելի բարձր լինի:

Իտալացի մարմնամարզիկն ինձ հաղթեց մեկ տասնորդականով: Սա Եվրոպայի առաջնություն է, որտեղ մասնակցում են Եվրոպայի ուժեղագույնները: Բոլորն էլ ուժեղ էին: Այս անգամ այդպես ստացվեց, իտալացի մրցակիցը հաղթեց ինձ: Կաշխատեմ այնպես անել, որ հաջորդ անգամ ավելի լավ ստացվի եւ ավելի բարձր գնահատական վաստակեմ:

Առաջինն էինք մասնակցում, որը ենթադրում է մեծ լարվածություն: Մեզ մոտ մի փոքր այլ է՝ ավելի շատ կենտրոնանում ենք մեր կատարած վարժության վրա եւ փորձում ենք այնպես անել, որ լարվածությունը չխանգարի: Մեզ համար կապ չունի՝ առաջինն ենք մասնակցում, թե վերջինը: Ամեն դեպքում՝ լարվածություն կար, որը կարողացանք հաղթահարել եւ մեդալներ նվաճել:

Նժույգ թափեր վարժությունում շատ մեծ էր մրցակցությունը: Տիտղոսակիր մարզիկներ էին մասնակցում, օլիմպիական չեմպիոն, աշխարհի, Եվրոպայի մեդալակիրներ:

Իտալացու հաղթանակն ավելի մեծ մոտիվացիա տվեց ինձ հետագա պայքարի համար: Ցանկացած պարագայում, երբ քեզ գերազանցում են, ավելի է մոտիվացնում, որ ավելի շատ աշխատես եւ մյուս մրցաշարերում ավելի լավ ներկայանաս ու հաղթես: Այժմ կպատրաստվենք աշխարհի առաջնությանը, որտեղ հիմնական մրցակիցները նորից Եվրոպայի ուժեղագույններն են: Ամեն ինչ կանենք, որպեսզի բարձր արդյունքներ գրանցենք»,- ասաց Համլետ Մանուկյանը:

Խորվաթիայի մայրաքաղաք Զագրեբում օգոստոսի 19-24-ն անցկացված սպորտային մարմնամարզության Եվրոպայի առաջնությունում նժույգ թափեր վարժության եզրափակիչում 18-ամյա Համլետ Մանուկյանը փոխչեմպիոնի կոչումը նվաճեց 15.000 միավորով: Այս վարժությունում Հայաստանի երկրորդ ներկայացուցիչ, աշխարհի եւ Եվրոյաի փոխչեմպիոն Մամիկոն Խաչատրյանը 14.900 միավորով բրոնզե մեդալակիր է:

Եվրոպայի չեպիոնի տիտղոսը 15.133 միավորով նվաճեց իտալացի Գաբրիելե Տարգետեն:

Լուսինե Շահբազյան