ԱԱ-2026. Արգենտինայի կամային հաղթանակը Եգիպտոսի նկատմամբ՝ 3:2 (տեսանյութ)
22:05 7 հուլիսի, 2026Աշխարհի չեմպիոն Արգենտինայի հավաքականը աշխարհի առաջնության 1/8 եզրափակիչում 3:2 հաշվով կամային հաղթանակ տարավ Եգիպտոսի նկատմամբ ընթացքում 0:2 հաշվով պարտվելուց հետո (տեսանյութ)։
ԱՄՆ-ի Ատլանտա քաղաքում տեղի ունեցած հանդիպման հաշիվը 15-րդ րոպեին բացեց եգիպտական «Ալ Ահլիի» 33-ամյա պաշտպան Յասեր Իբրահիմը (տեսանյութ)։
21-րդ րոպեին 11-մետրանոցի իրավունք ստացավ արգենտինացի Լիոնել Սկալոնիի գլխավորած թիմը, սակայն 39-ամյա հարձակվող Լիոնել Մեսին աշխարհի ընթացիկ առաջնությունում երկրորդ անգամ չկարողացավ արդյունավետ իրացնել 11-մետրանոցը (տեսանյութ)։ Սեյվ կատարեց «Ալ Ահլիի» 26-ամյա դարպասապահ Մոստաֆա Շոբեյրը։
58-րդ րոպեին Արգենտինայի հավաքականի դարպասը գրավեց եգիպտական «Պիրամիդսի» 29-ամյա հարձակվող Մոստաֆա Զիկոն, սակայն գրոհի ժամանակ արգենտինացիների պաշտպան Լիսանդրո Մարտինեսի ոտքին կանգնելու համար VAR-ի հուշումից հետո գոլը չգրանցվեց (տեսանյութ)։
Եգիպտոսի թիմը երկրորդ գոլը խփեց 67-րդ րոպեին։ Էմիլիանո Մարտինեսի պաշտպանած դարպասը դարձյալ գրավեց Մոստաֆա Զիկոն (տեսանյութ)։
79-րդ րոպեին Մեսիի փոխանցումից հետո աչքի ընկավ Լոնդոնի «Տոտենհեմի» 28-ամյա պաշտպան Կրիստիան Ռոմերոն (տեսանյութ)։
83-րդ րոպեին գեղեցիկ գոլ խփեց Մեսին, որին գոլային փոխանցում կատարեց արգենտինական «Ռիվեր Փլեյթի» 29-ամյա պաշտպան Գոնսալո Մոնտիելը (տեսանյութ)։
Արգենտինայի հաղթական գոլը ավելացված երկրորդ րոպեին խփեց Լոնդոնի «Չելսիի» 25-ամյա կիսապաշտպան Էնցո Ֆերնանդեսը (տեսանյութ)։ Նրան գոլային փոխանցում կատարեց Միլանի «Ինտերի» 28-ամյա հարձակվող Լաուտարո Մարտինեսը։
Արգենտինան քառորդ եզրափակիչում կմրցի Շվեյցարիա - Կոլումբիա դիմակայության հաղթողի հետ։
Մանե Կոտիկյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.