Համլետ Մանուկյան. Ուրախ եմ, որ աշխարհի գավաթի վերջին երկու փուլերն ինձ մոտ լավ ստացվեց
16:07 15 ապրիլի, 2026Ուրախանում եմ, երբ լսում եմ արձագանքները երկու ոսկե մեդալներ նվաճելու կապացկությամբ: Պարտավորվածություն կա, որ ավելի լավ մարզվեմ եւ մյուս մրցումներում լավ հանդես գամ, բարձր արդյունքներ գրանցեմ:
Այսպես իր հաղթանակներն աշխարհի գավաթի խաղարկության փուլերում մեկնաբանեց Եվրոպայի չեմպիոն, երիտասարդների աշխարհի կրկնակի չեմպիոն Համլետ Մանուկյանը:
18-ամյա մարմնամարզիկը վերջին օրերին երկու անգամ անընդմեջ կանգնեց աշխարհի գավաթի փուլերի պատվո հարթակի ամենաբարձր աստիճանին՝ նվաճելով երկու ոսկե մեդալ:
«Ուրախ եմ, որ վերջին երկու փուլերն ինձ մոտ լավ ստացվեց, ոսկե մեդալներ նվաճեցի: Ցավոք, Մամիկոնի մոտ մի քիչ լավ չստացվեց: Պետք է շատ աշխատենք, ավելի լավ մարզվենք, որպեսզի ավելի լավ հանդես գանք: Ուրախանում եմ, երբ լսում եմ արձագանքները երկու ոսկե մեդալ նվաճելուս կապացկությամբ: Պարտավորվածություն կա, որ ավելի լավ մարզվեմ եւ մյուս մրցումներում լավ հանդես գամ, բարձր արդյունքներ գրանցեմ»,- ասաց Համլետ Մանուկյանը:
Հավաքականի գլխավոր մարզիչ Հակոբ Սերոբյանը վստահ է, որ Համլետ Մանուկյանը, այդ թվում՝ Մամիկոն Խաչատրյանը դեռ մեծ նվաճումներ են ունենալու մեծ սպորտում:
«Համլետին շատ սիրում ենք, լավ տղա է: Ժամանակը ցույց կտա, բայց վստահ եմ՝ չի փոխվի: Ինքն ասաց ուրախ է, բայց ես մրցավայրում չտեսա իր ուրախությունը 6 օրում երկու ոսկե մեդալներ նվաճելու կապակցությամբ: Ավելին՝ դժգոհ էր, լաց էր լինում Մամիկոնի համար: Ասում էր՝ պետք է երկրորդը գոնե լիներ: Սա շատ լավ է, որ այսպիսի ընկերներ են: Կոտբուսում Մամիկոնը լավ մասնակցեց, Համլետը վատ: Այնտեղ էլ Մամիկոնի ուրախությունը չտեսա: Տխրել էր Համլետի համար: Կողքից հետեւում եմ նրանց ընկերությանը եւ ուրախանում: Ինձ համար կարեւոր է, որ լավ մարդիկ մեծանան:
Այս համեստությունը, որ ունի, շատ լավ է: Բոլոր մրցակիցներին թվում է՝ համեստ է, խելոք, կգան, կհաղթեն, բայց Համլետը չի վախենում, հարձակվում է: Ներսում առյուծիկ է: Այս ամենն Արթուր Դավթյանից է գալիս: Նա թիմի ավագն է, առյուծն է, տղաները՝ առյուծիկները»,- նշեց Հակոբ Սերոբյանը:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.