Հովհաննես Բաչկով․ Դուբայում իրավիճակը հանգիստ է, շոուն անպայման տեղի կունենա

Մրցակցիս՝ Լուիս Ակրոնին Օլիմպիական խաղերում հաղթելուց հետո, հերթը պրոֆեսիոնալ ռինգինն է: Սպասում եմ հետաքրքիր եւ դիտարժան մենամարտ:

Այս մասին NEWS.am Sport-ի թղթակցի հետ զրույցում ԱՄԷ-ից ասաց Տոկիոյի Օլիմպիական խաղերի բրոնզե մեդալակիր, Եվրոպայի քառակի չեմպիոն, աշխարհի առաջնության հնգակի բրոնզե մեդալակիր Հովհաննես Բաչկովը:

Հայաստանի հավաքականի ավագն ապրիլի 3-ին Դուբայում BATL Promotions-ի կազմակերպած մրցաշարում 9-րդ մենամարտը կանցկացնի պրոֆեսիոնալ ռինգում, որտեղ մրցակիցը կլինի Ռիո -2016-ի Օլիմպիական խաղերում իրեն պարտված վենեսուելացի Լուիս Արկոնը:

Հովհաննես, հերթական մենամարտումդ մրցելու ես Ռիո-2016 Օլիմպիական խաղերում քեզ պարտված վենեսուելացի Լուիս Ակրոնի հետ: Ինչպե՞ս ես պատրաստվում այս մենամարտին: 

Գոտու մենամարտ եմ անցկացնելու: Իմ տեղեկություններով WBA Intercontinenal գոտու մենամարտ է լինելու: Ես ունեմ WBA Continental գոտի:  Այս պահին դեռ հստակ տեղեկություն չունեմ՝ Intercontinental գոտու համար պետք է պայքարե՞մ, թե՞ պաշտպանելու եմ իմ գոտին: Ամեն դեպքում հստակ է, որ գոտու մենամարտ է լինելու:

Մրցակցիս վաղուց եմ ճանաչում, բայց մենք առաջին անգամ ենք հանդիպելու պրոֆեսիոնալ ռինգում:

Ի՞նչ ես սպասում մրցակցից եւ այս մենամարտից:

Մրցակիցս 33-ամյա վենեսուելացի Լուիս Մարտին Արկոնն է, որը պրոֆեսիոնալ ռինգում տարել է 16 հաղթանակ՝ 15-ը նոկաուտով եւ 1 ոչ ոքի: Ի սկզբանե, արգենտինացի բռնցքամարտիկի հետ էր նախատեսված իմ մենամարտը, բայց Մերձավոր Արեւելքում տեղի ունեցող պատերազմական գործողությունների պատճառով նա հրաժարվեց:

Լուիս Ակրոնը վաղուց էր ցանկանում ինձ հետ մենամարտել պրոֆեսիոնալ ռինգում: Մենք հանդիպել էինք 2016 թ. Ռիոյի Օլիմպիական խաղերում: Շատ լավ եմ հիշում այդ մենամարտը: 1/16 եզրափակիչն էր: Առաջին ռաունդում նա ինձ նոկդաունի ենթարկեց, որից հետո ես կարողացա շարունակել պայքարը: Տանուլ տված առաջին ռաունդից հետո կարողացավ հաղթել երկրորդ ռաունդում եւ հավասարեցնել պայքարը, իսկ երրորդ ռաունդն առավելությամբ անցկացրի եւ դուրս եկավ հաջորդ փուլ: Այդ մենամարտում Ակրոնին հաղթեցի 2:1 հաշվով:

Այժմ հերթը պրոֆեսիոնալ ռինգինն է: Կարծում եմ՝ հետաքրքիր մենամարտ կլինի:

Ի՞նչ կասես մարզավիճակիդ մասին: Այս շրջանում, երբ տարածաշրջանում լարված է, նաեւ Դուբայն է եղել իրադարձությունների կիզակետում, որտեղ դու մարզվում ես, կարողացե՞լ ես լիարժեք մարզավիճակ հավաքել, մարզումներդ անցկացնել:

Լավ մարզավիճում եմ, պատրաստվում եմ, որքան հնարավոր է: Այս օրերին քաշ գցելու շրջանն է, որն իրականում բարդ է:

Այստեղ իրավիճակը հանգիստ է: BATL Promotions-ի կազմակերպած բռնցքամարտի երեկոն բացօթյա մենամարտ պետք է լիներ, մեծ շոու էին նախատեսել, բայց այս լարված իրավիճակով պայմանավորված, որոշեցին անցկացման վայրը փոխել, փակ դահլիճում է լինելու: Կազմակերպիչները հայտարարեցին, որ շոուն անպայման տեղի կունենա: Անկախ ամեն ինչից, ինքս սպասում եմ իմ հերթական մենամարտին եւ ակնկալում եմ հետաքրքիր եւ դիտարժան պայքար ռինգում:

33-ամյա գյումրեցի Հովհաննես Բաչկովը ձեռքերի վիրահատությունից հետո նախորդ տարվա մարտին հաղթական վերադարձ ունեցավ պրոֆեսիոնալ ռինգ։
Դուբայում Grassroots boxing-ի կազմակերպած «Paddy’s day boxing show» երեկոյում պարտության մատնեց վենեսուելացի Ջոս Բաստարդոյին՝ երկրորդ ռաունդում նոկաուտի ենթարկելով նրան եւ նվաճելով WBA Continental տիտղոսը։
Հուլիսի 2-ին էլ Ստամբուլում անցկացված IBA Pro-7 Champions Night մրցաշարում նոկաուտով հաղթեց հարավաֆրիկացի Խոլիսանի Նդոնգենիին եւ նվաճեց IBA Pro չեմպիոնական գոտի:

Լուսինե Շահբազյան