Հակոբ Սերոբյան. Վերադառնում ենք Հայաստան, Արթուր Ավետիսյանը կհասնի իր հարսանիքին
13:19 17 մարտի, 2026Մենք բարեհաջող վերադառնում ենք Հայաստան։ Ամեն ինչ լավ է, բավականին բարդ ու երկար ճանապարհ անցանք, բայց բոլորիս ինքնազգացողությունը շատ լավ է։ Եվ, ամենակարեւորը, Արթուր Ավետիսյանը կհասնի իր ամուսնության արարողությանը։
Այս մասին NEWS.an Sport-ի թղթակցի հետ զրույցում ասաց Հայաստանի հավաքականի գլխավոր մարզիչ Հակոբ Սերոբյանը։
Կատարի մայրաքաղաք Դոհայում մնացած սպորտային մարմնամարզության Հայաստանի հավաքականն այսօր կժամանի Երեւան։
Հայաստանի թիմը Հակոբ Սերոբյանի գլխավորությամբ այս պահին արդեն Թբիլիսիում է եւ ցամաքային ճանապարհով շուտով կհատի Հայաստանի սահմանը։
«Մեզ մոտ ամեն ինչ լավ է, բարեհաջող դուրս եկանք Դոհայից եւ արդեն ճանապարհին ենք դեպի Հայաստան։ Ինչպես արդեն ասել էի, Դոհայում թռիչքներ չկային, կամ լինում էին եւ անմիջապես չեղարկվում։ Կատարում Հայաստանի դեսպանատան հետ քննարկումների արդյունքում որոշեցինք Սաուդյան Արաբիայով վերադառնալ հայրենիք։ Դեսպանատունը կազմակերպեց, բոլորիս տրամադրեցին Սաուդյան Արաբիայի վիզաներ, 9 ժամ ավտոմեքենայով ուղեւորվեցինք Էր Ռիյադ, այնտեղից շատ հաջող տոմսեր կարողացանք ձեռք բերել դեպի Ստամբուլ, որտեղից էլ մենեցինք Թբիլիսի։ Այժմ ավտոմեքենաներով ուղեւորվում ենք Հայաստան եւ մոտ 30 րոպեից կհատենք սահմանը։ Շատ ուրախ եմ, որ Արթուր Ավետիսյանը կհասնի իր հարսանիքին, որը տեղի է ունենալու մարտի 20-ին»,- ասաց Հակոբ Սերոբյանը։
Հիշեցնենք, որ տարածաշրջանում ռազմական գործողությունների հետեւանքով ստեղծված իրավիճակի պատճառով Հակոբ Սերոբյանի գլխավորած հավաքականը չէր կարողանում վերադառնալ Կատարի մայրաքաղաք Դոհայից, որի պատճառով բաց թողեց Անթալիայում անցկացվող աշխարհի գավաթի խաղարկության երրորդ փուլը:
Թիմը Դոհա էր մեկնել փետրվարի 23-ին, տարածաշրջանում լարվածությունը սկսել է փետրվարի 28-ից:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.