ՀՀՖ նախագահ. Սպասում ենք հայ հրաձիգների լավ մասնակցությանն ու հաղթանակներին

Հավաքականը շատ լավ է պատրաստվել Եվրոպայի առաջնությանը: Սպասում ենք հայ հրաձիգներին լավ մասնակցությանն ու հաղթանակներին: 

Այս մասին լրագրողների հետ հանդիպմանն ասաց Հայաստանի հրաձգության ֆեդերացիայի նախագահ Արթուր Հովհաննիսյանը: 

Երեւանի Կարեն Դեմիրճյանի անվան մարզահամերգային համալիրում փետրվարի 27-ից մարտի 5-ը կանցկացվի հրաձգության Եվրոպայի առաջնությունը: 

«Հավաքականը շատ լավ է պատրաստվել այս առաջնությանը: Եվրոպայի Կոնֆեդերացիաների անդամ երկրների շնորհիվ շատ մեծ աշխատանք կատարեցինք այս առաջնությունն իրականություն դարձնելու համար: Մեզ մնում է միայն գալ, երկրպագել Հայաստանի հավաքականին եւ սպասել նրանց հաջող մրցելույթներին: 

Բոլոր պատվիրակությունները Երեւան կժամանեն փետրվարի 26-ին: Եվրոպայի առաջնությունը կմեկնարկի շքեղ բացման արարողությամբ, որը տեղի կունենա փետրվարի 27-ին: Հրաձգությունը մյուս մարզաձեւերի համեմատ, համեստ կարգավիճակ ունի: Շատ երկրներում բացման արարողություն որպես այդպիսին չեն անցկացնում:

Հայաստանը պատրաստել է շատ լավ բացում, որն իրականացրել է հատուկ կազմակերպություն: Մրցումային օրերը կմեկնարկեն մարտի 1-ից»,- ասաց Արթուր Հովհաննիսյանը: 

ԿԳՄՍ նախարար Ժաննա Անդրեասյանի փոխանցմամբ առաջնության անցկացման համար պետական բյուջեից հատկացվել է շուրջ 500 միլիոն դրամ: 

«Երեւանում անցկացվելիք հրաձգության Եվրոպայի առաջնությունը պատմական իրադարձություն է: Մեծ աշխատանք է արված, որպեսզի կարողանանք պատշաճ մակարդակով հյուրընկալել տարբեր մասնակիցների:

Սպասում ենք 40 երկրների պատվիրակությունների, շուրջ 450 մարզիկ եւ մարզիչ: Առաջնությունում կտեսնենք 70 մեդալային հավաքածուի խաղարկություն: Ձեւավորվել է միջգերատեսչական հանձնաժողով, որը համակարգում է նախապատրաստական աշխատանքները: Խոսքը գնում է հրաձգության մասին, ինչը ենթադրում էր որոշակի յուրահատկություններ նախապատրաստական փուլում, փաստաթղթերի եւ դրանց ընթացակարգերը կարգավորելու անհրաժեշտ թույլատրություն եւ այլն: Այս առումով շնորհակալ եմ Ներքին գործերի եւ

Պաշտպանության նախարարությանը, Պետեկամուտների կոմիտեին աջակցության համար: Կարծում եմ՝ առաջնության օրերին առիթ կունենանք տեսնել նաեւ մեր հավաքականի ներկայացուցիչների հաջող մրցելույթները: Հաջողություն եմ մաղթում մեր 26 հրաձիգներին եւ, հուսամ, որոշ մրցաձեւերում կունենանք նաեւ հաղթանակներ եւ հաջողություններ: 

Ծրագրել էինք ձեռք բերել մարզագույքի գոնե մի հատվածը, որը հետագայում կուղղվի մարզադպրոցներում տվյալ մրցաձեւերի զարգացմանը: Առաջնության անցկացման համար պետությունը հատկացրել է շուրջ 500 միլիոն դրամ, որի մեջ ներառված է նաեւ մարզագույքի ձեռք բերումը: Հրաձգության ֆեդերացիայի հետ քննարկել ենք հետագա զարգացման հայեցակարգը: Պետությունը պատրաստակամ է մարզաձեւի զարգացման ուղղությամբ աշխատանքներ իրակացնել: 

Հույս ունեմ Եվրոպայի առաջնության օրերին բազմաթիվ երկրպագուներ տեսնել մարզահամերգային համալիրում: Գրեթե բոլոր մրցաձեւերում ունենք ներկայացուցիչներ: Հույս ունեմ, որ քաղաքացիները, հայ երկրպագուները կգան եւ կաջակցեն մեր մարզիկներին»,- ասաց Ժաննա Անդրեասյանը: 

Հայաստանը Եվրոպայի առաջնությանը կմասնակցի 26 հրաձիգով: