Սեյրան Նիկողոսյան. Մեդալներ կունենանք, լավ մարզավիճակում ենք մոտենում ԵԱ- ին
14:08 23 փետրվարի, 2026Հրաձիգները շատ լավ մարզավիճակում են մոտենում Եվրոպայի առաջնությանը: Կունենանք մեդալներ, բայց չգիտեմ՝ քանիսը եւ ինչ գույնի: Հուսամ՝ Երեւանում անցկացվող հրաձգության Եվրոպայի առաջնությունը զարկ կտա Հայաստանում մարզաձեւի զարգացմանը:
Այս մասին լրագրողների հետ հանդիպմանն ասաց հրաձգության Հայաստանի հավաքականի գլխավոր մարզիչ Սեյրան Նիկողոսյանը:
Երեւանի Կարեն Դեմիրճյանի անվան մարզահամերգային համալիրում փետրվարի 27-ից մարտի 5-ը կանցկացվի հրաձգության Եվրոպայի առաջնությունը, որին Հայաստանը կմասնակցի 26 հրաձիգով:
«Եվրոպայի առաջնության նախապատրաստական փուլը նորմալ տեմպերով առաջ է գնում: Բոլոր խնդիրները լուծված են, շատ մեծ աշխատանք է արվել: Մի փոքր վախ ունեի զենքերի դիմավորելու եւ ճանապարհելու հարցում: Հուսամ՝ ամեն ինչ նորմալ կընթանա:
Հավաքական թիմը մարզումների մեջ է: Բոլորը շատ լավ մարզավիճակում են: Կունենանք մեդալներ, բայց չգիտեմ՝ քանիսը եւ ինչ գույնի:
Նախկինում միշտ երազել էի՝ թեկուզ 5 ներկայացուցիչով մասնակցել Եվրոպայի առաջնությանը կամ այսպիսի խոշոր մրցաշարի: Հիմա ունենք 26 մասնակից եւ մեր երկրում է անցկացվում: Հայաստանում մարզաբազաների խնդիր ունենք, այս առումով շատ բարդ վիճակում ենք: Միայն մեկ նորմալ, գործող մարզադպրոց ունենք: Գյումրին, Վանաձորը, Երեւանը չունեն մարզադպրոցներ: Ակնկալում եմ, որ Երեւանում անցկացվող հրաձգության Եվրոպայի առաջնությունը զարկ կտա երկրում մարզաձեւի զարգացմանը: Վստահ եմ, որ մեդալ կունենանք եւ վստահ եմ, որ ոչ 1 մեդալ, այլ շատ: Չեմ կարող հստակ ասել, թե ինչ գույնի: Հրաձգություն է, գուցե մեկը 0,1 միավորով հետ մնա ոսկե մեդալի համար պայքարից: Այդ պատճառով չեմ ցանկանում ժամանակից շուտ խոստումներ տալ, մի փոքր էլ բախտի գործոնը կա: Հրաձգությունը շատ երկրներում է զարգացել: Եվրոպական երկրներն են ֆավորիտների շարքում: Վստահ կարող եմ ասել, որ Հայաստանում էլ է մարզաձեւը սկսել զարգանալ: Մենք նույնպես ֆավորիտ երկրների շարքում ենք: Արդյունքները կտեսնենք կրակելուց հետո. լավ է լինելու:
Եվրոպայի առաջնությանը պատրաստվել ենք մի քանի փուլերով: Տարին սկսել ենք Մյունխենում անցկացված միջազգային մրցաշարով: 4 մասնակից ունեինք օլիմպիական մրցաձեւերում: Մեդալներ չնվաճեցինք, բայց արդյունքները բարձր էին, լավ տեղեր ենք գրավել:
Միջազգային մրցաշարից հետո Երեւանում հավաք ենք անցել, մարզումներն այս պահին դեռ շարունակվում են: Կմասնակցենք բարձր մակարդակով»,- ասաց Սեյրան Նիկողոսյանը:
Սեյրան Նիկողոսյանի գլխավորած հավաքականի կազմում Եվրոպայի առաջնությանը կմասնակցեն՝
Հրացան` Հրաչիկ Բաբայան, Արտյոմ Գրիգորյան, Միհրան Գաբրիելյան
Ատրճանակ` Բենիկ Խլղաթյան, Զավեն Իգիթյան, Գևորգ Մելքոնյան, Էլմիրա Կարապետյան:
Շարժվող թիրախ` Հովհաննես Մարգարյան, Գոռ Խաչատրյան, Հայկ Մինասյան, Տիգրան Մանուկյան, Լիլիթ Մկրտչյան, Գոհար Հարությունյան, Արուսյակ Գրիգորյան, Մարի Ղազարյան, Մարիամ Մկրտչյան:
Շարժվող թիրախ (երիտասարդներ)` Համլետ Կարենյան, Մանվել Գրիգորյան, Գոռ Մարտիրոսյան, Արման Բարսեղյան, Վլադիմիր Առաքելյան, Անահիտ Սարգսյան, Աիդա Ազատյան, Լիլիթ Մկրտչյան, Յանա Հակոբյան, Նատալի Իսախանյան:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.