#MilanoCortina2026. Կարինա Ակոպովան եւ Նիկիտա Ռախմանինը «Արցախ» ծրագրով 12-րդն են
09:16 16 փետրվարի, 2026Հայաստանի Կարինա Ակոպովա - Նիկիտա Ռախմանին սպորտային զույգը «Արցախ» ծրագրով 12-րդ տեղը գրավեց եւ հաղթահարեց Միլանում անցկացվող ձմեռային Օլիմպիական խաղերի ծրագրով գեղասահքի մրցման որակավորման փուլը: Առաջին անգամ Օլիմպիական խաղերին մասնակցող եւ Հայաստանը ներկայացնող սպորտային զույգն ապահովեց իր մասնակցությունը փետրվարի 16-ին անցկացվելիք ազատ ծրագրում:
Կարինա Ակոպովան եւ Նիկիտա Ռախմանինը մասնակցեցին Արա Գեւորգյանի հեղինակած «Արցախ» ստեղծագործության համանուն ծրագրով եւ վաստակեցին 66.27 միավոր: Տեխնիկան գնահատվեց 38.66 միավոր, բարդությունը՝ 28.11 միավոր:
Օլիմպիական խաղերի կարճ ծրագրում որակավորման փուլը հաղթահարեց լավագույն 16 զույգը:
Հիշեցնենք, որ Ադրբեջանը ՄՕԿ-ին բողոք էր ներկայացրել Հայաստանի օլիմպիական զույգի կարճ ծրագրի «Արցախ» անվան վերաբերյալ: Միջազգային Օլիմպիական կոմիտեն բավարարել էր բողոքը եւ փոխել ծրագրի անունը պաշտոնական ցանկում, նշելով՝ «Արա Գեւորգյանի ստեղծագործություն»:
Հայ երկրպագուների շրջանում բողոքի մեծ ալիք էր բարձրացրել անվան փոփոխության կապակցությամբ, Հայաստանի գեղասահքի ֆեդերացիան, Հայաստանի Օլիմպիական կոմիտեն խուսափում էին մեկնաբանություններից:
Չնայած Ադրբեջանի ջանքերին, «Արցախ» ստեղծագործությունը Միլանի Ice Skating Arena-ում հնչեց, բայց ներկայացվեց որպես Արա Գեւորգյանի ստեղծագործությունը: Հանրային հեռուստաընկերության եթերում ուղիղ հեռարձակման ընթացքում մարզական մեկնաբանները նույնպես չարտաբերեցին «Արցախ» անվանումը՝ հայ օլիմպիականների ծրագիրը ներկայացնելով՝ «Արա Գեւորգյանի հրաշալի ստեղծագործություն»:
Կարինա Ակոպովան եւ Նիկիտա Ռախմանինը փայլուն հանդես եկան Օլիմպիական խաղերում, որին մասնակցում էին առաջին անգամ եւ առաջին անգամ էլ ներկայացնում Հայաստանը: Սպորտային զույգը NEWS.am Sport-ի հետ զրույցում նշել էր, որ Օլիմպիական խաղերում կարճ ծրագիրը «Արցախի» հնչյունների ներքո շատ կարեւոր է ինչպես իրենց համար, այնպես էլ Հայաստանի: Նշենք, որ Կարինա Ակոպովան ազգությամբ հայ է եւ նախորդ ամառ է իր մարզական զուգընկերոջ հետ փոխել մարզական քաղաքացիությունը:
Կարինա Ակոպովայի եւ Նիկիտա Ռախմանինի մասնակցությամբ Օլիմպիական խաղերի գեղասահքի մրցաշարի զուգասահքի ազատ ծրագիրը փետրվարի 16-ին կմեկնարկի Երեւանի ժամանակով 23:00-ին: Հայաստանի օլիմպիական զույգը հանդես կգա հնդկական մոտիվներով երաժշտության ծրագրով:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.