Սպորտի նախարարը հերքում է մեդալի մաքսազերծման համար 47 000 դրամ պահանջելու փաստը. ՀԾՖ գլխավոր քարտուղարը վճարել է 470 դրամ
17:27 17 դեկտեմբերի, 2012«Նման բան չկա, Փաշիկ Ալավերդյանի տված ինֆորմացիան` հայ ծանրորդի մեդալի մաքսազերծման մասին, չի համապատասխանում իրականությանը», ասաց NEWS.am Sport-ի խմբագրություն ահազանգած Սպորտի նախարար Հրաչյա Ռոստոմյանը, որը հերքեց ծանրամարտի ֆեդերացիայի գլխավոր քարտուղար Փաշիկ Ալավերդյանի տարածած հայտարարությունն այն մասին, թե հայ ծանրորդի նվաճած մեդալը մնացել է մաքսակետում եւ դրա դիմաց մաքսային ծառայությունը պահանջում է 47 000 դրամ մաքսազերծման գումար:
«Այդ լուրը չի համապատասխանում իրականությանը: Նման բան չկա: Ես հերքում եմ այդ լուրը: Փաշիկ Ալավեդրյանի տիրապետած ինֆորմացիան անիրական է»,- ասաց Հրաչյա Ռոստոմյանը:
Մաքսատնից քիչ առաջ վերադարձած Փաշիկ Ալավերդյանը NEWS.am Sport-ի թղթակցին հայտնեց, որ մեդալը վերցրել է մաքսատնից՝ վճարելով ոչ թե 47 հազար դրամ, այլ՝ 470 դրամ։
«Ես այսօր գնացի մաքսակետ, այնտեղ ինձ ասացին, որ մեդալի դիմաց գումար չեն պահանջել մաքսազերծման համար: Ինձ մաքսակետի աշխատողներն ասացին, որ ոչ թե 47 000 դրամ են պահանջել, այլ 470 դրամ պետական հարկ: Երբ ես Ադրբեջանում եմ եղել, ինձ ասել էին, որ մաքսակետից թղթեր են եկել, որ մեդալը Հայաստան տեղափոխելու համար պահանջվում է 47 000 դրամ գումար: Ես դեռ այն ժամանակ զարմացա, թե նման բան չի կարող լինել: Այդ պատճառով էլ այսօր հասա մաքսակետ: Հենց այս պահին մաքսակետից վերադառնում եմ Երեւան, մեդալն էլ ձեռքիս է: Մուծել եմ 470 դրամ գումար պետական հարկ եւ մեդալը այժմ կհասնի իր հասցեատիրոջը: Փաստորեն 470-ի եւ 47 000-ի զրոների սխալմունք է եղել: Ամեն ինչ կարգին է, ոչ մի խնդիր չկա: Ես վերադառնում եմ մաքսակետից, առանց որեւէ ֆինանսական տույժ վճարելու»,- ասաց Փաշիկ Ալավերդյանը:
Հիշեցնենք, որ Փաշիկ Ալավերդյանը NEWS.am Sport-ի թղթակցի հետ զրույցում ասել էր.
«Մեր լավագույն ծանրորդներից Հայկ Հակոբյանը 2011թ. համաշխարհային ուսանողական խաղերում գրավել էր չորրորդ տեղը: Ոսկե մեդալակիրը դոպինգ օգտագործելու համար հետագայում որակազրկվել է եւ մեր մարզիկը բարձրացել է երրորդ տեղ եւ նվաճել բրոնզե մեդալ: Նրան վերադարձվել է բրոնզե մեդալը: Ուսանողական սպորտի միջազգային կազմակերպությունը ուղարկել է մեդալը Հայաստան: Սակայն այդ մեդալը այժմ մնացել է Հայաստանի Արարատյան մաքսակետում: Հայաստանում այդ մեդալը ներկրելու համար մաքսազերծում են պահանջում` 47 հազար դրամ: Ասում են՝ արի մուծի այդ գումարը, մեդալդ տանք քեզ։ Այդ մեդալն արժե ընդամենը 10 եվրո` մեր գումարով 5 հազար դրամ: Իսկ սահմանին ասում են` բա ծախս ենք արել, բերել, հասցրել ենք այստեղ, պիտի մաքսազերծենք»։
Պատրաստեց Լուսինե Շահբազյանը
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.