Միքայել Միքայելյան․ Ինքս ինձ չէի ների, եթե «Ադրբեջան» գրվածքով դուրս գայի մեկնարկի

Ինքս ինձ չէի ների, եթե «Ադրբեջան» գրվածքով դուրս գայի մեկնարկի: Եթե որեւէ մեկը կարծում է, որ ես «Ադրբեջան» բառը չպետք է փակեի եւ այդ գրվածքով դուրս գայի մրցելույթի՝ մտածելով, թե սպորտը սպորտի մասին է ու ինձ դրանից լավ զգայի, ուրեմն ես ամենաանարժան եւ անպատիվ մարդը պետք է լինեի: Իմ քայլը պարզ է եւ պարզաբանման կարիք չունի:

Այս մասին NEWS.am Sport-ի թղթակցի հետ զրույցում ասաց Հայաստանի առաջատար դահուկորդ Միքայել Միքայելյանը:

Իտալիայում անցկացված աշխարհի գավաթի խաղարկության փուլում դահուկորդ Միքայել Միքայելյանը մեկնարկի դուրս գալիս կպչուն ժապավենով փակել էր մրցաշարի հովանավորի «Ադրբեջան» անվանունը: Նրա քայլը բուռն արձագանք ստացավ հանրության շրջանում: ԿԳՄՍ նախարար Ժաննա Անդրեասյանը հայ մարզիկի քայլի մասին ասել էր, որ դիրքորոշում կհայտնի դահուկային սպորտի ֆեդերացիային ուղղված հարցման պատասխանից հետո: ԿԳՄՍ նախարարության հարցումը ֆեդերացիային Միքայել Միքայելյանի քայլի պարզամբանման պահանջն էր, որին ֆեդերացիան պատասխանել է, որ հայ մարզիկի քայլը պարզաբանման կարիք չունի:

Միքայել, ինչպե՞ս եւ ո՞ր պահին որոշեցիր փակել «Ադրբեջան» բառը: Ի՞նչը քեզ դրդեց այդ քայլին:

Աշխարհի գավաթի խաղարկության այս փուլում 4 մեկնարկ եմ ունեցել: 4-ում էլ մրցումային համարների շապիկների վրայի հովանավորների անունները տարբեր էին: Այդ օրվա մրցման շապիկի վրա գրված էր «Ադրբեջան»: Մրցումային համարների շապիկները ստանում ենք մեկնարկից 2 ժամ առաջ: Քանի որ մեր նպատակը ելույթ ունենալն էր, ես կամ պետք է դուրս չգայի մեկնարկի, կամ էլ ինչ-որ կերպ փակեի «Ադրբեջան» անվանումը: Ես հաստատ պետք է փակեի այդ անունը, ինքս ինձ չէի ների, եթե «Ադրբեջան» գրվածքով դուրս գայի մեկնարկի: Փակեցի ու դուրս եկա մեկնարկի:

Միայնակ ես որոշե՞լ: Հայրդ, որը նաեւ հավաքականի եւ քո անձնական մարզիչն է, ի՞նչ ասաց որոշմանդ մասին:

Հայրս էլ լիարժեք կողմ էր իմ որոշմանը. նույնիսկ չքննարկեցինք: Մեկնարկից առաջ, երբ գնացել էի նախավարժանքի, վերադարձա, հայրս ասաց՝ «Տեսե՞լ ես, թե ինչ է գրված շապիկի վրա»: Բացեցինք, նայեցինք, վերցրի ու գնացի մեկնարկի, փակեցի անունը եւ մասնակցեցի: Կողքից որեւէ արձագանք չեմ ստացել: Այնտեղ յուրաքանչյուրի նպատակը լավ մրցելույթն է, իմը՝ նույնպես:

Ի՞նչ տեղի ունեցավ մրցելույթից հետո:

Ինձ մրցավարները կանչեցին: Նրանց հետ մենք երկար տարիներ աշխատում ենք եւ շատ լավ հարաբերությունների մեջ ենք՝ ինչպես ես, այնպես էլ մեր ֆեդերացիան: Կանչեցին եւ հետաքրքրվեցին, թե ինչու եմ փակել «Արդրբեջան» անունը: Ներկայացրեցի խնդիրը: Ասացին, որ ինձ ամբողջովին հասկանում են եւ իրենց համար մեծ հաշվով տարբերություն չկա՝ այնտեղ «Ադրբեջան» է գրված, «Սկեչերս», թե «Ռոլեքս»: Ասացին, որ խնդիր է հովանավորի անունը փակելը, որը միջազգային ֆեդերացիայի օրենքի խախտում է, քանի որ բոլոր հովանավորները պետք է տեսանելի լինեն: Ասացին, որ այս պարագայում պարտավորված են ինձ տուգանել խախտման համար, ինչը ես նորմալ ընդունեցի: Հասկանալի էր, որ իրենց համար արժեքները երկրորդական են եւ որպես ժյուրի, այս հարցին օրենքի տեսանկյունից են գնահատական տալիս:

Ինձ խնդրեցին, որ հաջորդ անգամ նման քայլ չանեմ: Չխոստացա, որ չեմ փակի այդ անունը շապիկիս վրա տեսնելով: Խոստացա, նախապես տեղեկացնել քայլերիս վերաբերյալ, վատագույն դեպքում ուղղակի մեկնարկի դուրս չգալ, եթե այդ անունը նորից լինի իմ մրցումային համարի շապիկին:

Հանրության այս բուռն արձագանքից հետո, ի՞նչ ես կարծում՝ ի՞նչ կանես հաջորդ անգամ, կփակե՞ս նորից:

Կա երկու տարբերակ. կամ մեկնարկի դուրս չեմ գա, կամ նորից ժապավենով կփակեմ այդ անունը: Ուղղակի մեկ այլ խնդիր էլ կա. մեր նպատակը լավագույն կերպով հանդես գալն է, լավ արդյունքներ գրանցելը: Գումարներ, մեծ աշխատանք, էներգիա ծախսելով՝ հասնել մրցավայր ու ինչ-որ գրվածքի պատճառով մեկնարկի դուրս չգալ, ճիշտ չեմ համարում: Ւմ միավորների եւ արդյունքների վրա այս տուգանքը չի ազդում, եթե հետագայում էլ տուգանվեմ, էլի չի ազդելու, միայն ֆինանսական տույժ է, որն ինձ համար, մեզ համար երկրորդական է. առաջնայինը՝ մեր արժանիքներն են:

ԿԳՄՍ նախարարը քո քայլի վերաբերյալ ասել է, որ սպորտը պետք է լինի սպորտի մասին: Այս արտահայտությունը ճնշում չի գործադրո՞ւմ քեզ վրա:

Ամեն մարդ ունի իր կարծիքն իմ քայլի վերաբերյալ: Եթե մտածում են, որ սխալ եմ արել իմ քայլով, թող անձնամբ ինձ դիմեն: Եթե որեւէ մեկը մտածում է, որ ես «Ադրբեջան» բառը չպետք է փակեի եւ այդ գրվածքով դուրս գայի մրցելույթի՝ մտածելով, թե սպորտը սպորտի մասին է ու ինձ դրանից լավ զգայի, ուրեմն ես ամենաանարժան եւ անպատիվ մարդը պետք է լինեի: Փառք Աստծո, ազատ երկրում ենք ապրում, որտեղ ամեն մարդ կարող է ունենալ իր կարծիքը: Մեկի համար ես ճիշտ եմ, մյուսի համար՝ սխալ:

ԿԳՄՍ-ն պահանջել է քո քայլի պարզաբանումը: Ինչպիսի՞ն է քո վերաբերմունքն այս պահանջին:

Ուզում եմ հասկանալ, թե ինչ իմաստով է պարզաբանման պահանջը: Վերաբերմունքս նորմալ կլինի, եթե նախարարությունը պարզաբանում է ուզում ստեղծված իրավիճակի վերաբերյալ, թե ինչու է «Ադրբեջան» գրությունը հայտնվել իմ մրցումային համարի էլաստիկ շապիկի վրա եւ այլն: Բայց եթե պահանջում են պարզաբանում, թե ինչու եմ ես ժապավենով փակել , ուրեմն ես այդ մարդկանց հետ խոսելու ոչինչ չունեմ եւ իմաստ էլ չկա խոսելու: Իմ արած քայլը արդեն իսկ պարզ է:

Աշխարհի գավաթի այդ փուլում 72-րդ տեղը զբաղեցրիր: Ինչպե՞ս ես գնահատում արդյունքդ:

72-րդն եմ ընդհանուր հաշվարկով, բայց ես մի քանի մեկնարկ ունեցա այս մրցաշարում տարբեր մրցատարածություններում:

Առաջին մրցատարածությունում փայտս կոտրվեց: Սպրինտն էր ու շատ կարճ էր: 120 դահուկորդ էր մասնակցում: Այդ մրցատածությունն այդքան էլ լավ չստացվեց: Մինչեւ փայտս փոխեցի, ժամանակ կորցրի, մրցատարածությունն էլ ընդամենը 1,5 կմ էր, այդ պատճառով մեկնարկն անհաջող ստացվեց:

Մրցելույթները գումարվում են իրար: Յուրաքանչյուր մրցելույթից միավորներ ես հավաքում, որից հետո հաշվարկվում է ընդհանուր արդյունքը, զբաղեցրած տեղը:

Առաջին մեկնարկը, որը փայտս կոտրվելու պատճառով ձախողվեց, ինձ հետ գցեց ընդհանուր միավորների հաշվարկից: Հաջորդ մրցատարածություններում բավականին առաջ եկա: 20 կմ մրցատարածությունում 60-րդն էի: 20 կմ մրցատարածությունում առաջին տեղին պարտվել էի 2 րոպե: 20 կմ-ի մեջ 2 րոպեն չնչին տարբերություն է, բայց այդ 2 րոպեի մեջ 60 դահուկորդ հասավ եզրագիծ: Պատկերացրեք, թե ինչպիսի պայքար է եղել:

Միլան-2026 ձմեռային Օլիմպիական խաղերի վարկանիշային միավորները լիարժեք լրացրե՞լ ես:

Քվոտան դեռ անցյալ տարվանից էի ապահովել, բայց վերջնական պատասխանները կհրապարակվեն հունվարի 20-25-ին: Ես միայն գիտեմ, որ բոլոր չափանիշներով իմ վարկանիշային միավորներն ապահովել եմ եւ ունեմ քվոտա: Ինչ վերաբերում է՝ կգնամ Օլիմպիական խաղեր, թե ոչ, այս պահին ոչինչ չեմ կարող ասել: Վստահություն կա, որ  գնալու եմ:

Լուսինե Շահբազյան