Հակոբ Սերոբյան․ Ինձ համար՝ Մամիկոն Խաչատրյանը հաղթեց

Ինձ համար՝ Մամիկոն Խաչատրյանը հաղթեց, Համլետ Մանուկյանն էլ շտապեց, հակառակ դեպքում չեմպիոնը նա էր դառնալու: Շատ ուրախ եմ այս մեդալի համար: Հրաշալի արդյունք է:

Այս մասին NEWS.am Sport-ի թղթակցի հետ զրույցում Ջակարտայից ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը:

Ինդոնեզիայի մայրաքաղաքում անցկացվող սպորտային մարմնամարզության աշխարհի առաջնությունում Եվրոպայի փոխչեմպիոն, երիտասարդների աշխարհի փոխչեմպիոն Մամիկոն Խաչատրյանը նժույգ թափեր վարժությունում նվաճեց իր առաջին մեդալը մեծահասակների աշխարհի առաջնությունում:

Եզրափակիչում հայ մարմնամարզիկը վաստակեց 14.600 միավոր, հավասար միավոր վաստակեց նաեւ տիտղոսը նվաճած չինացի մարմնամարզիկը: Եվրոպայի չեմպիոն, երիտասարդների աշխարհի կրկնակի չեմպիոն Համլետ Մանուկյանը 14.433 միավորով 4-րդն է:

Պարոն Սերոբյան, շնորհավորում եմ աշխարհի փոխչեմպիոն ունենալու կապակցությամբ: Սպասո՞ւմ էիք, որ Մամիկոն Խաչատրյանը կդառնա մեդալակիր:

Մամիկոն Խաչատրյանի արծաթե մեդալը շատ ուրախացրեց բոլորիս: Հրաշալի արդյունք է: Մենք լավ էինք պատրաստվել, մեդալների ակնկալիք ունեինք: Եզրափակիչը դիտելով՝ ավելի պարզ դարձավ, որ մեր տղաներն ունեն այդ ուժերը: Համլետ Մանուկյանը նույնպես մեդալակիր կարող էր դառնալ: Եթե ոտքերը չծալեր, նա միանշանակ չեմպիոն էր:

Չեմ ուզում որեւէ մեկից դժգոհել, այսպես ստացվեց: Ինձ համար՝ Մամիկոնը հաղթեց: Որպես մրցավար եմ գնահատում, կողքից նայելով եմ ասում, այսօր նա հաղթեց: 1 տասնորդական ավել պետք է ստանար, բայց չեմ դժգոհում մրցավարների գնահատականից: Այդպես գնահատեցին, ոչինչ չենք կարող ասել:

Չեմպիոնի տիտղոսը նվաճած չինացի մարմնամարզիկը նույնքան միավոր վաստակեց: Ի՞նչը մրցավարները չգնահատեցին Մամիկոնի վարժությունում: 

Չինացի մարմնամարզիկը հավասար գնահատական ստացավ, բայց մեր վարժությունն ավելի բարդ էր: Բարդություն հաշվող մրցավարներ կան, կան նաեւ մրցավարներ, որոնք սխալներն են հանում: Քանի որ Մամիկոնն ավելի շատ սխալներ էր արել, բայց վարժությունն ավելի բարդ էր, նրա եւ չինացու գնահատականը եկավ, հավասարվեց: Այս պարագայում մեր բարդությունն առաջնահերթ չհամարվեց, այլ մաքրությունը գնահատվեց: Չինացի մարզիկն առավելություն ստացավ մաքրության շնորհիվ:

Եթե լինեին նույն բարդության վարժություններ, երկուսը կլինեին ոսկե մեդալակիր:

Ես ասել էի, որ սպասում էի մեդալների: Բոլորս էլ հավատում էինք, որ այս տղաները պատրաստ են եւ ուժեղ են: Ոչ թե ես էի սպասում մեդալի, այլ մենք՝ բոլորս: Այս թիմում բոլորն իրենց ներդրումն ունեն՝ մարզիչները, մարզիկները, մենք բոլորս ենք հասնում արդյունքի:

Համլետ Մանուկյանին ի՞նչը պակասեց:

Համլետին չեմ կարող ասել՝ ինչը պակասեց: Շտապեց: Վերջում ոտքերը ծալեց: Չեմ ասում՝ լարվածությունը խանգարեց, բայց ես դա չեմ ընդունում: Որտեղ լինի, երբ լինի, տաք, թե ցուրտ, պետք է անեն այն, ինչ կարողանում են: Ուժեղ մարզիկը ոչնչին պետք է ուշադրություն չդարձնի՝ առաջինն է, վերջինն է: Նրանք պետք է լինեն վստահ եւ այդպես էլ կան: Իրենք տեսնում են, որ մենք էլ ենք վստահ: Նրանք ամեն ինչ պետք է հաղթահարեն:

Համլետին ոչինչ չի խանգարել: Ոչինչ, այսպես էլ է լինում։ Նրանք դեռ շատ երիտասարդ են, առաջին անգամ են մասնակցում: Նրանց առջեւ դեռ մոտ 15 տարի ժամանակ կա: Իրենք գիտեն, որ պատրաստ են: Ինքս չէի ասել նրանց այդ մասին, միայն ասել էի՝ արեք ձեր վարժություններն՝ ինչպես կարողանում եք, լավ կլինի: Մրցումից հետո հիմա նրանք հասկացան, որ իրենց պատրաստել ենք աշխարհի չեմպիոններ լինելու, առաջին-երկրորդ տեղեր գրավելու համար: Իրենք համոզվեցին, ես էլ գիտեի, որ նրանք կարող են, ինչին ենք տանում այս տղաներին: Անհամեստություն չլինի, բայց ակնկալում էի չեմպիոնություն:

Ի՞նչպիսին եղան արձագանքները եզրափակիչից հետո:

Մեծ արձագանքների արժանացանք, բոլորն էլ մոտեցան շնորհավորեցին, թուրքերը, ադրբեջանցիները եւս: Սա մեծ արդյունք է, մեծահասակների աշխարհի առաջնություն է: Շատ երկրներ կան, որ նույնիսկ եզրափակիչի մասնակից ունենալն է մեծ հաղթանակ նրանց համար: Մենք էլ շատ ուրախ ենք, արծաթե մեդալն իսկապես շատ լավ արդյունք է: Գոհ եմ իմ տղաներից:

Վստահ կարող եմ ասել, որ երկուսն էլ որակավորման փուլում ավելի վատ հանդես եկան, քան եզրափակիչում, մասնավորապես՝ Մամիկոն Խաչատրյանը: Ավելի լարված էին այնտեղ: Չեմ կարող հաշվել, թե Քաթարում հավաքների ժամանակ քանի անգամ էին իրենց վարժություններն արել՝ մոտ 40 անգամ երեւի: 

Ուզում եմ առանձնահատուկ նշել այսօրվա եզրափակիչում Արթուր Դավթյանի մեծ դերակատարումը: Ես նրան հանձնարարել էի մրցահարթակում աշխատել տղաների հետ: Արթուրի ներկայությունը շատ է օգնում տղաներին, նա իր խորհուրդներով, իր վստահությամբ շատ է աջակցում տղաներին: Ես տեսնում եմ, որ տղաները ոգեշնչվում են Արթուրից, փորձում լինել նրա պես պրոֆեսիոնալ: Քանի որ ես մրցավար եմ, մրցաշարերի ժամանակ իրավունք չունեմ թիմի հետ լինել, այդ հարցում բացի մեր մարզիչներից, թիմի հետ աշխատում է նաեւ Արթուրը, եւ արդյունքը այս տղաների փայլուն մրցելույթներն են: Աշխարհի առաջնությունում Արթուրն էլ շատ օգնեց, որ մեր տղաները հաղթահարեն լարվածությունը եւ լավագույնս հանդես գան:

Լուսինե Շահբազյան