Մամիկոն Խաչատրյանը՝ Ջակարտայից․ Այս նվաճումը թիմային աշխատանքի արդյունք է

Այս նվաճումը թիմային աշխատանքի արդյունք է: Ուրախ եմ մեդալակիր դառնալու կապակցությամբ, որի համար շնորհակալ եմ մեր մարզիչներին, ընկերներիս, ընտանիքիս անդամներին:

Այս մասին NEWS.am Sport-ի թղթակցի հետ զրույցում Ջակարտայից ասաց աշխարհի փոխչեմպիոնի կոչումը նվաճած 18-ամյա Մամիկոն Խաչատրյանը:

Ինդոնեզիայի մայրաքաղաքում անցկացվող սպորտային մարմնամարզության աշխարհի առաջնությունում Եվրոպայի փոխչեմպիոն, երիտասարդների աշխարհի փոխչեմպիոն Մամիկոն Խաչատրյանը նժույգ թափեր վարժությունում նվաճեց իր առաջին մեդալը մեծահասակների աշխարհի առաջնությունում:

Եզրափակիչում հայ մարմնամարզիկը վաստակեց 14.600 միավոր, հավասար միավոր վաստակեց նաեւ տիտղոսը նվաճած չինացի մարմնամարզիկը:

Մամիկոն, շնորհավորում եմ աշխարհի առաջնությունում առաջին մեդալդ նվաճելու կապակցությամբ: Ի՞նչ զգացողություններ ունես:

Շնորհակալ եմ շնորհավորանքի համար: Մեծահասակներում մեր առաջին աշխարհի առաջնությունն էր, բնական էր, որ լարվածությունն ու պատասխանատվությունը շատ մեծ էր: Մեր մարզիչները պատրաստել էին մեզ, շատ լավ մարզավիճակով էինք եկել աշխարհի առաջնության: Ուրախ եմ մեդալակիր դառնալու կապակցությամբ, որի համար շնորհակալ եմ իմ մարզիչներին, ընկերներին, ընտանիքիս անդամներին: Նրանց շնորհիվ ես կարողացա մեդալ նվաճել: Այս նվաճումը թիմային աշխատանքի արդյունք է: Տխրում եմ միայն Համլետի համար:

Եզրափակիչում ամենավերջինը մասնակցեցիր: Լարվածությունը մե՞ծ էր:

Հոյակապ պատրաստ էինք: Պետք է մեր լավ վարժությունը կատարեինք: Եզրափակիչում լարվածություն կար, բայց արդեն գործիքի վրա կար կարեւոր խնդիր՝ անել առավելագույնը եւ լավագույնը: Ընթացքում դժվար էր հասկանալը՝ իմ կատարած վարժությունը մեդալային է, թե ոչ: Արդեն վերջում ավարտելիս հավատացի, որ մեդալին մոտ եմ:

Քեզ հավասար միավոր վաստակեց չինացի մասնակիցը, որը նվաճեց տիտղոսը: Ի՞նչը քեզ պակասեց, որ գերազանցես նրան:

Իմ վարժությունն ավելի բարդ էր, բայց նա մեկ տասնորդական ավել գնահատվեց, որովհետեւ ավելի մաքուր էր նրա վարժությունը: Սա նաշանակում է, որ պետք է ավելի շատ աշխատենք, ավելի լավ կատարենք մեր վարժությունը, որպեսզի առանց խոսքի կարողանայի հաղթել նրան: Եթե այսպես ստացվեց, ուրեմն ասյդես էր պետք. Աստծո կամքն էր: Ինձ այս իրավիճակն ավելի ոգեշնչեց, որ հաջորդ աշխարհի առաջնությունում ավելի լավ կատարեմ իմ աշխատանքը:

Մրցակցության մասին ի՞նչ կասես:

Աշխարհի առաջնություն էր, շատ բարդ էր, մեծ մրցակցություն կար: Ուղղակի պետք է հաղթահարել լարվածությունը, դժվարությունը եւ անել այն, ինչ կարողանում ես եւ անել այնպես, ինչպես քեզ պատրաստել են մարզիչները:

Աշխարհի առաջնություն մեկնելիս հավատո՞ւմ էիր, որ մեդալակիր կդառնաս:

Յուրաքանչյուր մրցաշարի հավատով եմ մեկնում, բոլորս ենք հավատով գնում մարզումների, հավաքների եւ մրցաշարերի, որ մեդալներ պետք է նվաճենք: Այստեղ էլ եկել էինք հաղթելու, մեդալակիր դառնալու մեծ հավատով:

Լուսինե Շահբազյան