Էդուարդ Սպերցյան․ Կփորձենք վաղը բնավորություն ցույց տալ եւ լավ արդյունքի հասնել

Պորտուգալիան աշխարհի լավագույն հավաքականներից մեկն է: Կփորձենք վաղը բնավորություն ցույց տալ եւ լավ արդյունքի հասնել

Այս մասին լրագրողների հետ հանդիպմանն ասաց Հայաստանի հավաքականի կիսապաշտպան, Ռուսաստանի չեմպիոն «Կրասնոդարի» ավագ Էդուարդ Սպերցյանը:

«Ես չեմ ցանկանում խոսել «Կրասնոդարից» իմ հեռանալու մասին: Ես պրոֆեսիոնալ ֆուտբոլիստ եմ:  Մենք պատրաստվում ենք վաղվա կարեւոր խաղին եւ կենտրոնացած եմ վաղվա դիմակայության վրա:

Թիմում շատ լավ մթնոլորտ է: Եղիշե Մելիքյանին ճանաչեցինք որպես մարզիչ: Գիտենք, որ նա խաղացել է հավաքականում, բայց որպես մարզիչ նոր ենք աշխատում նրա հետ: Բավականին խստապահանջ է: Վերջին 5 օրերին առավելագույն ուժ ենք ներդրել, որպեսզի լավ արդյունքի հասնենք: Հուսանք, նույնը կլինի նաեւ վաղվա խաղում:

Ֆիզիկապես շատ լավ մարզավիճակում եմ եւ կփորձեմ ամեն գնով օգնել հավաքականին այս կարեւոր խաղում:

Ինձ համար մեծ պատիվ է ամեն անգամ ազգային հավաքական հրավիրվելը: Երբ գալիս եմ Հայաստան՝ անբացատրելի հույզեր եմ ապրում:

Բոլորս գիտենք, որ Պորտուգալիան աշխարհի լավագույն հավաքականներից մեկն է: Կփորձենք վաղը բնավորություն ցույց տալ դաշտում եւ լավ արդյունքի հասնել»,- ասաց Էդուարդ Սպերցյանը:

Ասուլիսի ընթացքում հարց հնչեց հանրահայտ փոփ երգչուհի Ջենիֆեր Լոպեսի մենահամերգից հետո «Հանրապետական» ստադիոնի խոտածածկի ներկայիս վիճակի մասին, բայց ՀՖՖ ներկայացուցիչները թույլ չտվեցին լրագրողին շարունակել հարցը՝ շրջանցելով թեման:

Հայաստանի հավաքականը պատրաստվում է Պորտուգալիայի թիմի դեմ աշխարհի առաջնության ընտրական հանդիպմանը, որը տեղի կունենա սեպտեմբերի 6-ին Երեւանի Վազգեն Սարգսյանի անվան «Հանրապետական» ստադիոնում եւ կմեկնարկի 20:00-ին։    

Լուսինե Շահբազյան

Լուսանկարը՝ Էմմա Ասատրյանի