Հայաստանի թիավարության ֆեդերացիայի նախագահը հրաժարական է տվել

23:39   10 դեկտեմբերի, 2012

Հայաստանի կանոեի եւ թիավարության ֆեդերացիայի ընդհանուր ժողովը բավարարել է առողջական խնդիրների պատճառով հրաժարական ներկայացրած ֆեդերացիայի գործող նախագահ Հրաչյա Խուդոյանի հրաժարականը: Որոշվել է կիրառել համանախագահների ինստիտուտը ֆեդերացիայի համար: Տեղի ունեցած քվեարկությամբ, միաձայն, համանախագահներ են ընտրվել Լեւոն Ղազարյանը եւ Մելիք Եսայանը: Ընտրվել է նաեւ յոթ հոգուց բաղկացած մարզչական խորհուրդ եւ երեք հոգուց բաղկացած վերստուգիչ հանձնածողով:

Ներկաները լսել են ավագ մարզիչների զեկույցները հաշվետու ժամանակաշրջանի համար: Ելույթ ունեցողներն իրենց մտահոգությունն են արտահայտել մարզաձեւի զարգացմանը խոչնդոտող խնդիրների վերաբերյալ՝ համապատասխան չափանիշներին բավարարող ջրային տարածքների բացակայություն, մարզագույքի պակաս, հայտնում է Սպորտի նախարարության լրատվական ծառայությունը:

Սպորտի նախարար Հրաչյա Ռոստոմյանը նշել է, որ լավատեղյակ է մարզաձեւում առկա խնդիրներին եւ լավ պատկերացնում է դրանց լուծման ուղիները:

«Թիավարությունն այն մարզաձեւն է, որը Հայաստանում ունի լավ ավանդույթներ: Պետք է դրանք պահպանել եւ զարգացնել, ինչը հնարավոր է ֆինանսական ներդրումների, կազմակերպչական աշխատանքի եւ հոգատար վերաբերմունքի շնորհիվ»,-նշել է Հ. Ռոստոմյանը եւ խոստացել, որ նախարարությունն իր հնարավորությունների սահմաններում աջակցություն կցուցաբերի ֆեդերացիային:



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։